96
Huicat para tijpaquilismacase Toteco
1 Nochi cati anitztoque ipan taltipacti,
xihuicaca para TOTECO.
Quena, xihuicaca se huicat yancuic.
2 Ma tijhuicatica TOTECO por nochi cati quichijtoc.
Ma tijpaquilismacaca huan ma tijtascamatica por nochi cati techchihuilijtoc.
Huan mojmosta ma titepohuilica para yaya temaquixtía.
3 Ipan nochi taltipacti ma titepohuilica ihueyitilis huan nochi tamanti cuajcualtzi cati quichijtoc.
Huan nochi masehualme ma tiquinpohuilica nopa huejhueyi tamanti cati yaya quichihua.
4 Pampa TOTECO nelía tahuel hueyi huan quinamiqui ma tijhueyimatica.
San yaya nelía temajmati huan ne sequinoc cati masehualme quintocaxtíaj dioses, amo.
5 Pampa nochi nopa dioses cati quinhueyichihuaj ipan sequinoc talme,
amo teno ininpati.
Inijuanti san elij teteyome cati masehualme quinchijchijtoque.
Pero TOTECO yaya quichijchijqui ilhuicacti.
6 Campa itztoc Toteco senquisa onca itatanex huan temitoc ica ihueyitilis.
Huan ipan itiopa onca ichicahualis huan iyejyejca.
7 Nochi anmasehualme ten nochi taltipacti,
xitepohuilica para san TOTECO quipiya chicahualisti huan san yaya hueyi.
8 Xijtepanitaca TOTECO quej quinamiqui.
Xijhualiquilica tacajcahualisti huan xiyaca icalixpa itiopa.
9 Xihualaca huan xijhueyichihuaca TOTECO.
Quena, xijhueyichihuaca ica se amonemilis cati cuajcualtzi huan tatzejtzeloltic.
Huan nochi taltipacti ma huihuipica iixpa.
10 Xiquinpohuilica nochi talme para Toteco tanahuatía.
Taltipacti quitalijtoc cuali huan amo quema mijcuenis campa quitatzquiltijtoc.
Huan Toteco Dios xitahuac quintajtolsencahuas nochi altepeme.
11 ¡Ma paqui ilhuicacti huan nochi taltipacti!
¡Nochi huejhueyi at ma mocoxonica iixpa Toteco ica paquilisti!
12 ¡Ma paqui nopa cuatitamit huan nochi cati onca,
pampa nochi cuame quinextíaj para Toteco tahuel hueyi!
Quena, ma tzajtzica nopa cuame para quipaquilismacase TOTECO,
13 pampa yaya huala.
Quena, yaya hualas para quintajtolsencahuas cati itztoque ipan ni taltipacti.
Quena, quintajtolsencahuas masehualme ipan nochi altepeme quej quinamiqui.
Quena, quema tetajtolsencahuas,
nochi quimatise para quichihua cati melahuac.