95
Se huicat para tijpaquilismacase huan tijhueyichihuase Toteco
1 ¡Xihualaca, ma tihuicaca para TOTECO!
Quena, ma tihuicaca ica paquilisti para tijhueyimatise Toteco cati techmaquixtía huan techtatía para amo teno techajsis.
2 Ma tiyaca iixpa Toteco para tijtascamatise ica nochi toyolo.
Ma tijpaquilismacaca ica huicat.
3 Pampa TOTECO yaya se Dios Cati Tahuel Hueyi.
Yaya nopa Hueyi Tanahuatijquet huan amo quej nochi sequinoc taixcopincayome cati masehualme quinhueyichihuaj.
4 Imaco eltoc nochi nopa ostot cati más huejcata huan nopa tepeme cati más huejcapantique.
Nochi iaxca ya.
5 Yaya iaxca nopa hueyi at huan taltipacti,
pampa yaya quichijchijqui.
6 Xihualaca, ma tijhueyichihuaca huan ma timoixtapachoca iixpa TOTECO,
yaya cati techchijchijqui.
7 Pampa yaya toDios huan tojuanti tiimasehualhua.
Tiitztoque quej tiiborregojhua cati yaya quinmocuitahuía.
Xijtacaquilica ama cati quiijtohua Toteco:
8 “Amo ximoyoltetilica quej israelitame quichijque huejcajquiya ipan nopa huactoc tali cati itoca Meriba huan Masah.
9 Nopona amohuejcapan tatahua nechyejyecojque para quiitase taya nijchihuas.
Huan quichijque ya ni masque ipa ya quiitztoyaj nopa huejhueyi tiochicahualnescayot cati na nijchijtoya iniixpa.
10 Para cuarenta xihuit nicualantoya inihuaya,
pampa iniyolo huan inintalnamiquilis eltoya huejca ten na.
Huan hasta ama amo motemacatoque quitoquilise notanahuatilhua.
11 Yeca ica nohueyi cualancayo nitatestigojquetzqui para amo quema calaquise campa nijsencajtoya ma mosiyajquetzaca.”