81
Toteco quipiya hueyi iyolo ica nopa taixpanoca israelitame
1 ¡Xihuicaca ica paquilisti para Toteco Dios,
pampa yaya techpixtoc imaco!
¡Ma tijpaquilismacaca!
¡Ma tihuicaca para Toteco Dios yaya cati iTeco Jacob!
2 Ma tihuicaca huan ma tijtzijtzilinica pandero.
Nojquiya ma tijtzotzonaca nopa arpa huan guitarra.
3 Ma tijpitzaca tapitzali quema yancuic metzti,
quema temitoc metzti,
huan ipan sequinoc tonali quema tiilhuichihuaj,
4 pampa Toteco Dios cati eli iTeco tohuejcapan tata Israel techmacatoc nopa tonali para ma tipaquica miyac.
Huan nojquiya eltoc ijcuilijtoc ipan itanahuatilhua para ma tijchihuaca.
5 Huan techmacac para ma tiquelnamiquica cati quichijqui ica José,
huan quenicatza motehui inihuaya nopa masehualme ten tali Egipto,
campa titetequipanojque san tapic.
Nijcajqui camanaltic se cati amo niquixmatqui huan quiijto:
6 “Ama nimechquixtilis nopa tamamali cati anquihuicaj amoajcoltipa,
huan ayecmo anquitananase ica amomax tamanti cati tahuel etic.”
7 Nojquiya quiijto:
“Amojuanti antechtzajtzilijque quema anitztoyaj ipan taohuijcayot huan na nimechmaquixti.
Nimechnanquili hasta ten nepa tepet Sion campa motatía nopa tatomonilot.
Nojquiya ipan tali Meriba nimechyejyecohuili amotaneltoquilis quema anmotequipachohuayayaj pampa amo oncayaya at.
8 Yeca annoisraelita masehualhua,
techtacaquilica quema chicahuac nimechtacahualtía.
9 Amo quema xijhueyichihuaca seyoc cati quitocaxtíaj ‘dios’.
Yon amo xiquinpiyaca taixcopincayome ipan amocalijtic.
10 Pampa elqui na, niamoTECO huan niamoDios,
cati nimechquixti ipan tali Egipto.
Xijtapoca amocamac huan anquiitase sinta amo nimechixhuitis.
Quena, anquiselise nochi tamanti tatiochihualisti cati amechpolohua.
11 ¡Pero amo! Nomasehualhua amo quinejque nechtacaquilise.
Israelitame amo quinejque ma niitzto tatajco inijuanti.
12 Yeca niquintahuelcajqui para ma huihuitiyaca huan ma elica quej popoyotzitzi.
Huan niquincahuili ma quichihuaca cati inijuanti quinequiyayaj.
13 Pero sinta noisraelita masehualhua nechtacaquilijtosquíaj huan quitoquilijtosquíaj noojhui,
14 huajca na san ipan se talojtzi niquinechcapantalijtosquía inincualancaitacahua huan niquintzontamiltijtosquía.”
15 Quena, nochi cati quicualancaitaj TOTECO,
nimantzi moechcapanojtosquíaj iixpa.
Huan itztosquíaj ipan tatzacuiltili para nochipa.
16 Pero Toteco Dios amechtamacasquía ica tacualisti cati más cuali.
Huan amechmacasquía sayolnecti huan nochi cati más anquinequij para amechixhuitisquía.