7
TOTECO tetajtolsencahua xitahuac
1 TOTECO, ta cati tinoDios,
ipan ta nimotemachía para techmanahuis.
Techmaquixti inimaco nochi cati nechtoquilijtinemij.
2 Nocualancaitacahua itztoque quej tecuanime huan sinta ta amo techmanahuis,
nechcocototzase huan amo aqui nechmaquixtis.
3 TOTECO, sinta nelía nijhuicasquía tajtacoli,
quinamiqui ma nechcualancaitaca.
4 Sinta nijcuepilijtosquía ica cati amo cuali se nohuampo cati cuali itztoya nohuaya,
huajca quena.
5 Sinta quej nopa nijchijtosquía,
huajca ma nechtepotztoca nocualancaitaca.
Ma nechajsiti huan ma nechhuilana,
huan ma nechpinahualti,
pero amo aqui quej nopa nijchihuilijtoc.
6 Ximotanana, TOTECO, ica cualanti.
Xicualani miyac ica nocualancaitacahua quej inijuanti nechcualancaitaj.
Ximoquetza iniixpa nocualancaitacahua cati tahuel cualantoque.
Xiquinfuerzajhui ma nechchihuilica cati xitahuac.
7 Se tonali masehualme ten nochi talme mitzyahualojtose,
huan ta tiquintajtolsencahuas campa timosehuijtoc ipan mosiyaj cuajcualtzi nepa ilhuicac.
8 Quena, TOTECO tiquintajtolsencahuas nochi masehualme ipan nochi talme.
Huajca nojquiya techtajtolsencahua na, TOTECO, ica cati cuali nijchijtinentoc.
Ta cati más tihueyi,
technextijtoc iniixpa nochi masehualme para amo nijpiya tajtacoli.
9 Ta, tiToteco Dios, cati titetajtolsencahua xitahuac.
Xijtachili inintalnamiquilis masehualme huan xijyejyeco cati quipiyaj ipan iniyolo.
Xijtamilti cati quichihuaj nopa amo cuajcualme,
pero techchihua tielise titemachme tojuanti cati timonejnemiltíaj cuali moixpa.
10 Toteco Dios nechyahualojtoc para nechmanahuis.
Quinmaquixtía cati quipiyaj iniyolo xitahuac iixpa.
11 Toteco Dios yaya se juez cati tetajtolsencahua xitahuac.
Mojmosta cualani ica amo cuajcualme.
12 Sinta se masehuali amo moyolcuepas,
Toteco Dios quitentis imacheta para quitzontamiltis.
Huan quicualtalis icuahuitol cati ica quimictis.
13 Ya quicualtalijtoc itatehuijca teposhua huan quinhualica imaco para temictis.
Quipixtoc miyac cuataminti cati lementoque para tetzontamiltis sinta amo moyolcuepaj.
14 Se masehuali cati amo cuali san quinequi tecocos,
huan san moilhuía cati fiero hueli quichihuas huan teipa icamaco quisa san istacatili.
15 Se cati quichihua se ostot para quimasiltis seyoc,
teipa ya huetzis campa taxajqui.
16 Pampa nochi tamanti cati amo cuali cati se masehuali quinchihuilía sequinoc,
teipa mocuepas ipan ya.
17 Pero na nijtascamatis TOTECO pampa yaya xitahuac.
Nihuicas tiohuicat para nijhueyichihuas TOTECO, Yaya Cati Más Hueyi.