6
Quenicatza ma timotatajtica quema timotequipachohuaj
1 TOTECO, amo techajhua quema ticualani.
Amo techtatzacuilti quema tahuel ticualantoc.
2 Techtasojta, pampa nimococohua.
TOTECO, techchicahua, pampa tahuel nechcocohua nochi notacayo.
3 Nihuihuipica ica majmajti huan amo nijmati taya nijchihuas.
Huan ta TOTECO, ¿hasta quema tihualas para techtananas?
4 Xihuala, TOTECO, techmanahuiqui para amo nimiquis.
Techmaquixti pampa tahuel techicnelía.
5 Amo aqui cati mictoc huelis mitzelnamiquis.
¿Ajquiya huelis mitzhueyichihuas sinta mictoc huan ya quitalpachojtoque?
6 Ya tanqui nofuerza ica choquisti.
Sese tayohua nichoca miyac hasta nijtamixolonía notzonteto.
7 Nichocatoc miyac hasta nechcocohua noixteyol huan ayecmo hueli nitachiya.
Quena, nichoca quema nimoilhuía cati nocualancaitacahua nechchihuilijtoque.
8 Techtalcahuica, tajtacolchijca masehualme,
pampa TOTECO quicactoc quenicatza nichoca.
9 Yaya quicactoc cati nijtajtanijtoc,
huan quiselijtoc nonetatajtilis.
10 Nochi nocualancaitacahua pinahuase huan huetzise.
Ica se talojtzi TOTECO quintahuisos ipan pinahualisti.