63
Nijtemohua noTeco
1 ¡Toteco Dios, ta tinoDios!
¡Nelía tahuel nimitztemohua!
¡Quej se masehuali cati tahuel amiqui ipan huactoc tali campa amo onca at,
na ica nochi noyolo huan ica nochi noalma nijnequi nimitzpantis!
2 Nijnequi niquitas mochicahualis huan mohueyitilis quej niquitac ipan motiopa.
3 Pampa motaicnelijcayo más hueyi ipati huan amo nonemilis.
¡Tahuel nimitzhueyimati!
4 Huan nochi tonali quema noja niitztos, nimitztiochihuas.
Huan moixpa nimomatananas huan nimotatajtis ica ta.
5 Huan huajca, quena, nijmatis quej elisquía ya niixhuic ica se tacualisti cati ajhuiyac.
Huan nimitzhueyimatis ica miyac paquilisti.
6 Nochi yohuali quema nimoteca ipan notapech huan amo hueli nicochi,
nimoilhuía ten ta.
Quena, nimoyolilhuía ten ta sese hora.
7 Nimoilhuía quenicatza techpalehuijtoc huan yeca sese tayohua tahuel nipaqui.
Quej se piyo quintatía iconehua ieltapaltzala,
quej nopa ta techtatía na para amo teno nechajsis.
8 Nimotatzquilijtoc ipan ta pampa san ta techmocuitahuía ica mohueyi chicahualis.
9 Nochi cati quinequij nechmictise yase micta.
10 Pampa ya eltoc tasencahuali para miquise,
huan para sequinoc quintzontamiltise ica macheta.
Huan inintacayohua elis tacualisti para nopa tepechichime.
11 Pero na nitanahuatijquet nimopaquilismacas ipan ta, Toteco Dios.
Huan nojquiya paquise nochi sequinoc cati senquisa motemachíaj ipan ta.
Pero nochi cati istacatij,
ta, Toteco, tiquincamatzacuas.