62
David motemachi san ipan Toteco
1 Na san ipan Toteco Dios nimochiya para yaya ma nechmanahui,
pampa san ya hueli temaquixtía.
2 Nimotatía ipan ya para amo teno nechajsis.
San yaya nechmaquixtía huan nechmocuitahuía quema huala taohuijcayot.
Amo teno hueli nechpanos.
3 Pero ¿hasta quema tamis nocualancaitacahua nechtehuise?
Ayecmo nijpiya más chicahualisti quej tanahuatijquet ipan notanahuatilis.
Nocualancaitacahua quisencahuaj quenicatza huelis nechtahuisose.
Nechitaj quej se tapepecholi o tepamit cati huetzisnequía.
4 Quena, san moilhuíaj san sejco quenicatza huelis nechtzontamiltise.
Quinpactía quitacaquilise istacatili huan tacajcayahualisti.
Ica inincamac nechcamanalhuíaj cuajcualtzi,
pero ipan iniyolo nechtelchihuaj.
5 Pero na san nimochiya ipan Toteco Dios,
san nimochiya para yaya ma nechmanahui,
pampa san ya hueli temaquixtía.
6 Nimotatía ipan ya para amo teno nechajsis.
San yaya nechmaquixtía huan nechmocuitahuía quema huala taohuijcayot,
yeca san ipan ya nimotemachía.
7 San Toteco Dios hueli nechmaquixtis huan sempa nechhueyitalis iniixpa sequinoc.
Yaya nechtatía huan nechfuerzajmaca.
Nechmocuitahuía para amo ma nechajsi cati fiero.
8 ¡Annomasehualhua, nochipa ximotemachica ipan Toteco Dios!
Xijpohuilica nochi cati eltoc ipan amoyolo,
pampa san yaya hueli techmocuitahuis ica cati amo cuali.
9 Amo teno nelía ininpati masehualme iixpa Toteco,
masque cati tominpiyaj o cati teicneltzitzi.
Sinta se quintalisquía ipan balanza para quintamachihuas sinta etique quej se tamanti cati tahuel ipati,
momacas cuenta para melahuac amo etique pampa masehualme itztoque san quej ajacat.
10 Masehualme, amo ximoilhuica para antatehuise para anquitanise más tomi.
Amo ximoilhuica antachtequise para anmoricojchihuase.
Huan sinta anmochihuase anricos,
amo ximohueyimatica, yon amo ximotemachica ipan amotomi.
11 Nijmati ya ni, pampa miyac huelta Toteco Dios nechilhuijtoc:
san yaya quipiya nochi chicahualisti.
12 San ta, Toteco, titeicnelía mojmosta.
Huan tijtaxtahuía sese masehuali quej quinamiqui ica cati quichijtoc.