53
Masehualme cati huihuitique
(Salmo 14:1-7)
1 San se masehuali cati tahuel huihuitic moilhuía ipan iyolo para amo onca Dios.
¿Para ten quej nopa quiijtohua?
Eltoc pampa iyolo tahuel fiero huan san quichihua cati amo cuali.
Amo aqui se masehuali cati quichihua cati nelxitahuac.
2 Toteco Dios hasta nepa ilhuicac quinhualtachilía masehualme,
para quiitas sinta onca se cati nelía quitemohua huan quichihua cati cuali.
3 ¡Pero amo!
Nochi masehualme mocuectoque ipan tajtacolot.
Quena, nochi tajtacolchijtoque huan mochijtoque amo tapajpactique.
Amo aqui quichihua cati senquisa cuali,
yon se.
4 ¿Huelis amo quipiyaj inintalnamiquilis nopa tajtacolchijca masehualme?
Inijuanti quintzontamiltíaj momasehualhua quej elisquíaj pantzi cati quicuaj huan amo quinequij quitemose Toteco Dios.
5 Pero ajsis tonali quema Toteco Dios quinpinahualtis huan quintatzacuiltis nopa masehualme.
Quena, quintzontamiltis huan inintacayohua mocahuase tepejtoque campa hueli.
Amo aqui quintalpachos pampa yaya quintahuelcajtoc.
6 ¡Cuali elisquía sinta Toteco hualasquía ten altepet Jerusalén huan quinmaquixtis nochi israelitame!
Israelitame san huelis itztose ica paquilisti quema Toteco Dios quichihuas para inijuanti cati imasehualhua ma tatanica.