52
Toteco tetasojta huan tetajtolsencahua
1 ¡Xijtacaquili ta cati timoilhuía para tahuel tihueyi!
¿Para ten timohueyimati ica cati fiero tiquinchihuili imasehualhua Toteco Dios?
Toteco Dios quipixtoc itaicnelilis para nochipa.
2 Pero ta nochipa timoyolilhuía san cati fiero tiquinchihuilis sequinoc.
Huan nochi istacatili cati quisa mocamaco eli quej se cuchillo cati tahuel tatequi.
3 Achi más mitzpactía tijchihuas ten fiero huan amo cati cuali.
Huan nojquiya achi más mitzpactía istacatili huan amo cati melahuac.
4 Mitzpactía titeistacahuis.
Huan mitzpactía tiquijtos camanali cati tecocohua.
¡Tiistacatica tacat!
5 Yeca Toteco Dios mitztzontamiltis para nochipa.
Mitzhuilanas para mitzquixtis ten mochaj,
huan ayecmo tiitztos ipan ni taltipacti campa itztoque masehualme.
6 Nochi masehualme cati quitepanitaj Toteco,
quiitase cati yaya quichihuilis nopa fiero masehuali,
huan momajmatise.
Huajca inijuanti quihuetzquilise huan quiijtose:
7 “Xiquitaca cati ipantic ne masehuali cati amo quitepanita Toteco Dios.
San motemachi ipan itomi huan nochi tamanti pajpatiyo cati yaya quipiya,
huan quichijtinenqui cati amo cuali.”
8 Pero na cuali niijcatoc quej se olivo cuahuit,
huan Toteco nechyahualohua para nechmocuitahuis.
Na nimotemachía ipan Toteco para yaya ma nechtasojta nochipa.
9 NoTeco Dios, na nochipa nimitztascamatis por nochi nopa cuali tamanti cati tijchijtoc.
Huan san ipan ta nimochiyas para techtasojtas,
pampa nochi quimatij para ta nelía tijpiya hueyi moyolo ica cati moaxcahua.