29
Se huicat ten ihueyitilis TOTECO
1 Xijhueyichihuaca TOTECO,
amojuanti aniilhuicac ejcahua.
Xijhueyichihuaca TOTECO cati quipiya hueyi ichicahualis huan itatanex.
2 Xijhueyichihuaca TOTECO por ihueyitilis,
pampa ya nopa quinamiqui para yaya cati tahuel hueyi.
Xijhueyichihuatij TOTECO cati itztoc campa tahuel tacuajcualtzi huan tatzejtzeloltic.
3 Quema TOTECO camanalti,
caquisti quej tatomonilot cati chicahuac ipan hueyi at.
Itoscac Toteco Dios cati itztoc ipan ilhuicac caquisti quej tatomonilot ipan ilhuicac tahuel chicahuac.
Quena, TOTECO itoscac monanquilía iixpa nopa hueyi at ica nochi ihueyitilis.
4 Itoscac TOTECO quipiya chicahualisti.
Quena, itoscac quipiya tahuel miyac chicahualisti.
5 Itoscac tahuel temajmati huan quema TOTECO camanalti,
quichihua para ma ixtzayanica tiocuame.
Quena, Toteco quintapana nochi tiocuame ipan tali Líbano.
6 Quichihua ma huihuipicaca nochi cuatitamit ipan talme Líbano huan Sirión.
Quinchihualtía nopa cuame ma mojmolinica quej piltorojtzitzi huan pilhuacaxtzitzi cati huitontehuaj.
7 Quema TOTECO camanalti,
quimajcahua tilelemecti.
8 Quema TOTECO camanalti,
huihuipica nochi huactoc tali.
Quena, hasta quichihua para ma huihuipica nopa huactoc tali Cades.
9 Quema TOTECO quiijtohua para oncas tatomonilot,
huajca quichihua ma ixtzayanica nopa ahuacuame huan quicahua tapepestic ipan cuatitamit.
Ipan ichaj nepa ilhuicac nochi quihueyichihuaj huan quiijtohuaj: “Tahuel cuajcualtzi mohueyitilis.”
10 TOTECO tanahuatiyaya quema oncac nopa tahuel miyac at cati momanqui ipan nochi taltipacti.
Huan TOTECO noja tanahuatía huan tanahuatis para nochipa.
11 TOTECO quinmaca chicahualisti nochi imasehualhua.
Quena, TOTECO quintiochihua huan quinmaca tasehuilisti ipan iniyolo.