28
Toteco quitacaquilía quema timotatajtíaj
1 TOTECO, tinotamanahuijca.
San ica ta nimotatía.
Ta cati nimitztzajtzilía techpalehuiqui.
Amo ximohuexnequi para technanquilis,
pampa sinta amo technanquilis,
san nimotemacas para ma nechmictica.
2 Xijcaqui nocamanal quema nimitztajtanía tapalehuili.
Techchihuili cuenta quema nimomatanana huan nitachía imelac motiopa cati tahuel tatzejtzeloltic.
3 Amo techtatzacuilti inihuaya masehualme cati amo cuajcualme cati san quichihuaj cati amo monequi.
Inijuanti camanaltij cuajcualtzi ica sequinoc,
pero quipiyaj nochi cati amo cuali ipan iniyolo.
4 Xiquincuepili nochi cati amo cuali quichijtoque ica cati amo cuali nojquiya.
Xiquintaxtahui ica cati fiero san se quej fiero quinchihuilijtoque sequinoc.
5 TOTECO, inijuanti amo quichihuilíaj cuenta nochi cati tijchijtoc,
huajca tiquintzontamiltis huan amo quema tiquintananas sempa.
6 TOTECO, nimitzpaquilismacas pampa tijtacaquilijtoc cati nimitztajtanijtoc.
7 TOTECO, yaya nochicahualis huan notamanahuijca ten nochi cati mahuilili.
Ipan ya nimoneltemachijtoc huan nechpalehuijtoc,
yeca ipan noyolo nijpiya miyac paquilisti.
Nihuicas huan nimitztascamatis, TOTECO.
8 TOTECO, ta tiquinpixtoc momaco nochi momasehualhua.
Yeca san ipan ta motemachía motanahuatijca cati tijtapejpenijtoc.
9 Xijmaquixti moaltepe, TOTECO.
Huan xiquintiochihua inijuanti cati moaxcahua.
Techmocuitahui quej se quinmocuitahuía ipilborregojhua.
Techhuica momaco para nochipa.