125
Toteco quinmocuitahuía imasehualhua.
1 Masehualme cati motemachíaj ipan TOTECO itztoque neltemachme,
quej nopa tepet Sion cati amo mojmolinía,
huan ijcatoc cuali para nochipa.
2 Quej Jerusalén quiyahualojtoque miyac tepeme para quimanahuise,
quej nopa nojquiya TOTECO quinyahualojtoc imasehualhua huan quinmanahuía.
3 Toteco amo quincahuilis ma tanahuatica masehualme cati fiero inintalnamiquilis,
pampa huelis imasehualhua cati itztoque xitahuaque nojquiya pehuase quichihuase tamanti cati amo cuali.
4 TOTECO, xiquinchihuili cati cuali masehualme cati cuajcualme,
huan cati xitahuac iniyolo moixpa.
5 Pero nopa masehualme cati moiyocaquixtijtoque ten nopa ojti ten cuali huan yahuij ipan ojti cati amo cuali, xiquinhuica campa tiquintatzacuiltis.
Huan ma onca paquilisti huan tasehuilisti ipan tali Israel.