11
Ma timotemachica ipan Toteco para techpalehuis
1 Amo techilhui:
“Ximochololti cuatita huan ximomanahuiti quej se totot.”
Amo monequi nicholos pampa na nimotemachijtoc ipan TOTECO.
2 Nochi quiijtohuaj:
“Xiquita, nopa masehualme cati mosisiníaj quicualtalíaj cuahuitoli huan cuataminti,
huan motatijtoque para quinmaquilise masehualme cati itztoque xitahuaque.”
Masque quej nopa quiijtohuaj, amo melahuac.
3 Masque quiijtohuaj:
“Ayecmo oncas leyes huan amo aqui tanahuatis xitahuac,
huan huajca monequi masehualme cati cuali iniyolo ma choloca pampa amo aqui huelis quinmanahuis”, amo melahuac inincamanal.
4 Pero TOTECO itztoc ipan itiopa cati tatzejtzeloltic nepa ilhuicac.
Yaya mosehuijtoc ipan isiyaj cuajcualtzi nepa ilhuicac huan noja tanahuatía.
Quiita nochi ten quichihuaj masehualme.
Quitajtachilía sese inemilis.
5 TOTECO quinyejyecohua cati quichihuaj cati cuali,
pero masehualme cati amo cuajcualme huan cati quinpactía mosisiníaj, amo quinequi quinitas.
6 TOTECO quichihuas ma huetzi ticoli cati xahuantoc ininpani cati quichihuaj cati amo cuali.
Quena, quintitanilis azufre cati lementoc para ma huetzi ininpani,
huan quintatis ica se ajacat cati tahuel totonic.
7 TOTECO, yaya nelcuali.
Quinicnelía cati nemij xitahuac.
Huan masehualme cati xitahuac iniyolo quiitase ixayac,
huan quimatise para Toteco quicualita cati quichihuaj.