10
Se netatajtili para quitajtanis TOTECO ma quipalehuiqui
1 TOTECO, ¿para ten huejca tiitztoc huan timotatía quema na nijpiya tequipacholi?
2 ¡Xiquita, TOTECO!
Amo cuajcualme tahuel mohueyimatij huan quintepotztocatinemij cati teicneltzitzi para quincocose.
Ma masica ipan nopa taquetzti cati inijuanti quisencajtoque para sequinoc.
3 Nopa amo cuajcualme mohueyimatij ica nochi cati fiero quinequij quichihuase.
Huan masehualme cati quinequij san inijuanti quipiyase nochi tamanti,
quintelchihuaj nochi sequinoc hasta ta, TOTECO, mitztelchihuaj nojquiya.
4 Nopa amo cuajcualme nel mohueyimatij huan amo mitztemohuaj, Toteco Dios.
Amo quema mitzelnamiquij pampa moilhuíaj amo tiaqui para tiquintatzintoquilis taya quichihuaj.
5 Ama quisa cuali nochi cati amo cuajcualme quichihuaj,
huan yeca san mohueyimatij,
huan motanahuatilhua amo quintepanitaj.
San quinhuetzquilíaj nochi inincualancaitacahua.
6 Huan moilhuíaj:
“Amo quema topantis se tenijqui.
Nochipa tipactose huan amo quema techajsis tequipacholi.”
7 ¡Xitacaqui, TOTECO!
Quema camanaltij masehualme cati amo cuajcualme,
san quisa tatelchihuali, istacatili huan nochi cati ica tacajcayahuaj.
¡Xiquita, TOTECO!
Nochipa tacajcayahuaj huan quinyolcocohuaj sequinoc para ma quipiyaca tequipacholi.
8 Motatíaj nechca pilaltepetzitzi para teojchiyase,
huan quema amo aquij quinita,
quimictíaj se cati amo teno quichijtoc.
Quinichtacachiyaj cati teicneltzitzi huan quinmictíaj san pampa quinequij.
9 Quej se tecuani cati motatijtoc campa tacoyontoc,
masehualme cati fiero inintalnamiquilis san quichixtoque para quipantise se cati amo quipiya fuerza para quiitzquise.
Teipa quihuilanase nopa teicneltzi campa amo aqui huelis quipalehuis.
10 Cati quinitzquijque quipiyaj miyac chicahualisti.
Yeca cati teicneltzitzi nimantzi huetzij iniixpa.
11 Nopa amo cuajcualme moilhuíaj:
“Toteco Dios amo quielnamiqui ten tijchihuaj.
Yaya moixtzactoc huan amo quema quiita teno.”
12 Ximotanana, TOTECO Dios, ximomatanana.
Amo xiquinelcahua cati teicneltzitzi huan cati amo quipiyaj chicahualisti.
13 Amo xiquincahuili amo cuajcualme ma mitzhuetzquilica.
Amo xiquincahuili ma moilhuica para ta amo tiquintatzacuiltis.
14 Toteco Dios, tiquitztoc ten quichijtinemij.
Tiquitztoc sesen tamanti cati amo cuali cati inijuanti quisencahuaj.
Xiquinsencahuili nopa tatzacuiltili cati quinamiqui.
Cati teicneltzitzi san motemachiyaj ipan ta para xiquinmanahui.
Ta tiinintapalehuijca nochi cati icnotzitzi.
15 Xiquinmapostequi nopa masehualme cati amo cuajcualme.
Xiquintatzacuilti por nochi cati fiero quichijtoque.
Xiquintaxtahui por sesen tamanti cati quichijtoque.
Amo xiquelcahua yon se.
16 TOTECO, ta tiTanahuatijquet cati titanahuatis para nochipa huan amo quema tamis.
Tiquintzontamiltis ipan motal nochi masehualme cati amo mitzixmatij,
inijuanti san polihuise.
17 TOTECO, ta tijtacaquilía cati mitztajtaníaj teicneltzitzi.
Tiquinfuerzajmaca huan tiquinpalehuía.
Tiquinchihuilía cuenta quema mitztzajtzilíaj.
18 Ta tiquinmanahuía icnotzitzi huan cati taijyohuíaj.
Quej nopa, masehualme cati san tasencahualme ica soquit ayecmo huelis quintemajmajtise.