15
Oyu gbaa‐gbaa mʋ yɛ n‐yaabi
1 Nɩɩ Yesu tɔwɛ mʋ abɩɩlapʋ mʋ yɛ, “Mɛ ɩ gyɛ wayɩn oyu gbaa‐gbaa mʋ nɩɩ kɩɩ sɔyɩ abi, nɩɩ Mɛ‐Sɛ ɩ gyɛ oyu mʋ ɔdɔɔpʋ.
2 Kayaa‐bi kʋmaa mʋ nɩɩ kɩ kyaa mɛ sʋ nɩɩ kɩ mɛɛ sɔyɩ abi mʋ, ɛɛ ŋɛ kɩmʋ nɩn ɛɛ fɔyɩ, nɩɩ kayaa‐bi kʋmaa mʋ nɩɩ kɩɩ sɔyɩ abi mʋ, ɛɛ kpaalɛ kayaa‐bi mʋ kɛ kɩ nyɛ sɔyɩ abi tii sʋ.
3 Lɩɩ asɩn mʋ nɩɩ n tɔwɛ sa fanɛ sʋ mʋ, fan tɛɛ waa kyɩrɛkyɩrɛ.
4 Fan baa fan bʋ mɛ asɛ, kɛ ngbaa mɛ n baa n bʋ fanɛ asɛ. Kɩyaa‐bi nkʋn mɛɛ taalɛ sɔyɩ abi, amɔɔ kɩ kyaa oyu mʋ sʋ. Kanɩn maŋa nɩɩ fanɛ gbaa fanɛ fɛn mɛɛ taalɛ sɔyɩ abi, amɔɔ fan bʋ mɛ asɛ.
5 “Mɛ ɩ gyɛ oyu mʋ, nɩɩ fanɛ ɩ gyɛ kɩmʋ n‐yaabi mʋ. Ɔsa kʋmaa mʋ nɩɩ ɔ kan ɔ bʋ mɛ asɛ, nɩɩ ngbaa n bʋ mʋ asɛ sʋ mʋ, ee biti ɔ sɔyɩ abi gaa, fɛɛ kanan mʋ nɩɩ kayaa‐bi kyaa oyu sʋ nɩɩ kɩɩ sɔyɩ abi mʋ. Ɩmʋ sʋ nɩɩ fan man tii mɛ sʋ bɩrɛ, fɛn mɛɛ taalɛ waa sɛhn.
6 Nɩɩ ɔkʋmaa mʋ nɩɩ ɔ man kan ɔ bʋ mɛ asɛ bɩrɛ, o du nɩn fɛɛ kayaa‐bi mʋ nɩɩ ba ŋɛ tʋʋ nɩɩ kɩ wʋlɛ. Kanɩn n‐yaabi nɩɩ bɛɛ tasɛ bɛɛ tʋʋ fʋlɔn tɔ, kɛ ɩ dɩyɛ mʋ.
7 Nɩɩ fan kan fan bʋ mɛ asɛ, nɩɩ mɛ asɩn mʋ bʋ fanɛ tɔ mʋ, kʋtɔ kʋmaa mʋ nɩɩ fen biti, nɩɩ fan kʋlɛ Ɩbwaarɛ mʋ, ee biti ɔ waa sa fanɛ.
8 Nɩɩ fan kan sɔyɩ abi gaa, mʋ nɩɩ ɩɩ kaapʋ fɛɛ fan gyɛ mɛ abɩɩlapʋ mʋ, ɩmʋ ɩ nyɛ lɛɛ Mɛ‐Sɛ bʋnyaa mʋ ifuli kaapʋ.
9 “Fɛɛ kanan mʋ nɩɩ Mɛ‐Sɛ mʋ sʋ kebiti sa mɛ mʋ, kanɩn maŋa nɩɩ ngbaa mɛ n sʋ kebiti sa fanɛ. Ɩmʋ sʋ fan kyaga sʋ kyɩna mi kebiti mʋ tɔ.
10 Nɩɩ fan kan buu mɛ kɔnɔsa mʋ, n biti n kyaga sʋ nyɛ kebiti sa fanɛ, fɛɛ kanan mʋ nɩɩ n buu Mɛ‐Sɛ kɔnɔsa nɩɩ ɔ sʋ kebiti sa mɛ mʋ.
11 N tɔwɛ fanɛ ɩnɩmʋ nɩn kɛ mi kensi‐gyii ɔ kyɩna fanɛ tɔ, kɛ fanɛ kensi‐gyii mʋ ɔ naa lʋwɛ kyɛɛkyɛɛ.
12 Mɛ kɔnɔsa ɩ gyɛ yɛ, Fan nyɛ kebiti sa abaa, fɛɛ kanan mʋ nɩɩ n nyɛ kebiti sa fanɛ mʋ.
13 Kebiti kɩ man bʋ tɔ kɩ kyɔ kɩnɩmʋ fɛɛ ɔkʋ maa wu sa mʋ kyɛmɩnɛ ana.
14 Nɩɩ fan kan buu mɛ kɔnɔsa mʋ bɩrɛ, fan gyɛ mɛ kyɛmɩnɛ ana nɩn.
15 N mɛɛ bɩla yɛ n tɩɩ fanɛ mɛ ayaafɔlɛ, lɩɩ fɛɛ kɩyaafɔlɛ man nyi kʋtɔ mʋ nɩɩ mʋ‐nyɩrɩpɛ ɩɩ waa. Amaa n tɩɩ fanɛ mɛ kyɛmɩnɛ ana nɩn, lɩɩ fɛɛ kʋtɔ kʋmaa mʋ nɩɩ n bɩɩla lɩɩ Mɛ‐Sɛ asɛ mʋ, n lɛɛ kaapʋ fanɛ.
16 Man gyɛ fanɛ ɩ lɛɛ mɛ. Amaa mɛ ɩ lɛɛ fanɛ, nɩɩ n sun fanɛ yɛ fan naa sɔyɩ abi mʋ nɩɩ ii biti ɩ kyɛɛrɛɛ. Nɩɩ fan kan waa kanɩn mʋ, kʋtɔ kʋmaa mʋ nɩɩ fan kʋlɛ Mɛ‐Sɛ mɛ kɩtɩɩ tɔ mʋ, ee biti ɔ waa sa fanɛ.
17 Mɛ kɔnɔsa ɩ gyɛ yɛ, fan nyɛ kebiti sa abaa.”
Dulinya asa bee kisi
abɩɩlapʋ mʋ
18 Nɩɩ Yesu tɔwɛ yɛ, “Nɩɩ dulinyaa abi ba kan bɛɛ kisi fanɛ mʋ, fan baa fan nyiŋi fɛɛ mɛ nɩɩ ba daa kikisi.
19 Nɩɩ fan kan fan du fɛɛ dulinyaa tɔ abi bɩrɛ, naafɔɔ dulinyaa abi bee biti ba nyɛ kebiti sa fanɛ fɛɛ kɩmʋ asa. Amaa fan man gyɛ dulinyaa abi. Mɛ ɩ lɛɛ fanɛ lɩɩ dulinyaa abi tɔ. Ɩmʋ sʋ nɩɩ dulinyaa abi bee kisi fanɛ mʋ.
20 Fan nyiŋi asɩn mʋ nɩɩ n tɔwɛ fanɛ mʋ yɛ, ‘Kɩyaafɔlɛ mɛɛ taalɛ ɔ kyɔ mʋ‐nyɩrɩpɛ.’ Ɩmʋ sʋ n maa wu awʋrʋfɔ bamʋ abaa tɔ falɛ, kanɩn nɩɩ fanɛ gbaa fanɛ fen biti fan wu awʋrʋfɔ bamʋ abaa tɔ. Nɩɩ ba kan buu mɛ kɩkaapʋ mʋ, bee biti ba buu fanɛ kɩkaapʋ mʋ gbaa.
21 Lɩɩ mɛ kɩtɩɩ sʋ, nɩɩ bee biti ba waa fanɛ ɩnɩmʋ kpini, lɩɩ fɛɛ ba man nyi Ɔmʋ nɩɩ o sun mɛ mʋ.
22 Nɩɩ n daa man ba tɔwɛ asɩn mʋ sa bamʋ nɩn, naafɔɔ ba mɛɛ yɛ ba wu alibi kʋpwɛ. Amaa nbɩɩnbɩɩ ba man sʋ kɔnɔ kɩlɛɛ lɩɩ bamʋ alibi sʋ.
23 Ɔkʋmaa mʋ nɩɩ ee kisi mɛ mʋ, ee kisi Mɛ‐Sɛ mʋ gbaa.
24 N ba waa asɩn kyinkyinsa mʋ nɩɩ ɔkʋ man pɩɩ taalɛ waa bamʋ tɔ. Nɩɩ ba daa ba man wu ɩmʋ bɩrɛ nɩn, naafɔɔ ba mɛɛ yɛ ba wu alibi kʋpwɛ. Amaa nbɩɩnbɩɩ ba wu asɩn kyinkyinsa nɩmʋ kpini. Halɩɩ ɩmʋ kpini gbaa mʋ ba kisi maa Mɛ‐Sɛ.
25 Amaa ɩnɩmʋ ɩ yɛgɛ Asɩnkyan yɩlasa mʋ ɩ ba tɔ. Asɩn mʋ ɩ gyɛ yɛ, ‘Ba kisi mɛ yɛgɛ ɩ man sʋ kasɛ.’
26 “Amaa n biti n sun Ɔkyɛtɔpʋ mʋ lɩɩ Mɛ‐Sɛ asɛ, mʋ ɩ gyɛ Kayaayu Kyɩrɛkyɩrɛ mʋ nɩɩ ɛɛ lɛɛ kesintin lɩɩ Ɩbwaarɛ sʋ ɛɛ kaapʋ.
27 Nɩɩ ɩ dagaa fanɛ gbaa fanɛ fan gyii mɛ n‐yɩɩ sʋ kesintin, lɩɩ fɛɛ fan bʋ mɛ asɛ lɩɩ npiili asɛ.