14
Yesu tɔwɛ yuula mʋ abɩɩlapʋ mʋ nkɔlɔ
1 Nɩɩ Yesu tɔwɛ mʋ abɩɩlapʋ mʋ yɛ, “Fan man yɛgɛ fanɛ nkɔlɔ ɩ ŋmaa fanɛ. Fan kɔɔlɛ Ɩbwaarɛ gyii kɛ fan kɔɔlɛ ngbaa mɛ gyii.
2 Ibu damantɛ ɩ bʋ Mɛ‐Sɛ kɩkpaara sʋ. Nɩɩ ɩ daa ɩ man gyɛ kanɩn nɩn, naafɔɔ n tɔwɛ fanɛ. N kpee n naa lɔŋɔ ɔkyɩnakpa sa fanɛ.
3 Nɩɩ n kan kpee naa lɔŋɔ ɔkyɩnakpa sa fanɛ mʋ, n biti n bwii ba taa fanɛ kpee mɛ asɛ, kɛ fan naa kyɩna katɩn mʋ nɩɩ n tɛ mʋ.
4 Fen nyi ɔkpa mʋ, nɩɩ fen nyi katɩn mʋ nɩɩ n kpee mʋ.”
Yesu ɩ gyɛ ɔkpa mʋ
kpee Ɩbwaarɛ asɛ
5 Nɩɩ Tomasi tɔwɛ Yesu yɛ, “Ɔnyɩrɩpɛ, a man nyi katɩn mʋ nɩɩ fii kpee. Nɩɩ nɛnɛ nɩɩ an biti a waa bɩɩ ɔkpa mʋ?”
6 Nɩɩ Yesu lɛɛ kɔnɔ yɛ, “Mɛ ɩ gyɛ ɔkpa mʋ yɛ kesintin mʋ yɛ nkpa mʋ. Ɔkʋ mɛɛ taalɛ kpee Mɛ‐Sɛ asɛ, amɔɔ ɔ bɔla mɛ sʋ.
7 Nɩɩ fan kan fan nyi mɛ kesintin tɔ mʋ, naafɔɔ fan nyi Mɛ‐Sɛ mʋ gbaa. Lɩɩ nbɩɩnbɩɩ nɩmʋ ɩɩ sʋ ii kpee mʋ, fen nyi mʋ, nɩɩ fen wu mʋ.”
8 Nɩɩ Filipu tɔwɛ yɛ, “Ɔnyɩrɩpɛ, kaapʋ anɛ Fʋ‐sɛ mʋ, kʋtɔ mʋ nɩɩ ki tiri anɛ nɩn.”
9 Tʋtɔ nɩɩ Yesu lɛɛ kɔnɔ yɛ, “Filipu, amɔɔ fʋ man nyi mɛ, halɩɩ kanan mʋ nɩɩ n kyɩna fanɛ asɛ kyɛɛrɛɛ falɛ? Ɔsa kʋmaa mʋ nɩɩ o wu mɛ mʋ, o wu Mɛ‐Sɛ mʋ. Mɩnɛ ɩ waa nɩɩ fʋ bɩla fɩɩ tɔwɛ yɛ, ‘Kaapʋ anɛ Fʋ‐sɛ mʋ?’
10 Abɛɛ fʋ man kɔɔlɛ gyii yɛ n maa Mɛ‐Sɛ mʋ an gyɛ kʋkʋlʋn? Asɩn mʋ nɩɩ n tɔwɛ fanɛ mʋ man gyɛ mɛ gbaa‐gbaa mɛ lɛɛ. Amaa Mɛ‐Sɛ mʋ nɩɩ ɔ bʋ mɛ tɔ mʋ ii sun mu kusun.
11 Kanɩn sʋ fan kɔɔlɛ mɛ gyii fɛɛ n maa tɔwɛ yɛ, n maa Mɛ‐Sɛ mʋ an gyɛ kʋkʋlʋn. Nɩɩ ɩ man gyɛ kanɩn gbaa mʋ, fan kɔɔlɛ mɛ gyii lɩɩ asɩn kyinkyinsa mʋ nɩɩ fan wu n maa waa falɛ sʋ.
12 N tɔwɛ fanɛ kesintin, ɔsa kʋmaa mʋ nɩɩ ɛɛ kɔɔlɛ mɛ ee gyii mʋ, ee biti ɔ waa atɔ mʋ nɩɩ n waa mʋ. Ee biti ɔ waa ɩmʋ nɩɩ ɩ kyɔ falɛ gbaa, lɩɩ fɛɛ n kpee Mɛ‐Sɛ mʋ asɛ nɩn.
13 Nɩɩ kʋtɔ kʋmaa mʋ nɩɩ fan kʋlɛ mɛ kɩtɩɩ tɔ sʋ mʋ, n biti n waa sa fanɛ, kɛ mɛ, Obii mʋ n bɩya bʋnyaa sa Mɛ‐Sɛ mʋ.
14 Kʋtɔ kʋmaa mʋ nɩɩ fɛn kʋlɛ mɛ lɩɩ mɛ kɩtɩɩ tɔ sʋ mʋ, n biti n waa sa fanɛ.” Yesu da mʋ kɔkɔlɔ sʋ yɛ Kayaayu Kyɩrɛkyɩrɛ mʋ kii biti kɩ ba.
15 Nɩɩ Yesu tɔwɛ mʋ abɩɩlapʋ mʋ yɛ, “Nɩɩ fan kan fan sʋ kebiti sa mɛ mʋ, fen biti fan buu mɛ kɔnɔsa.
16 N biti n kʋlɛ Mɛ‐Sɛ kɛ ɔ sa fanɛ Ɔkyɛtɔpʋ pʋpwɛ mʋ nɩɩ ee biti ɔ baa ɔ bʋ fanɛ asɛ kakpaa.
17 Mʋ ɩ gyɛ Kayaayu Kyɩrɛkyɩrɛ mʋ nɩɩ ɛɛ lɛɛ Ɩbwaarɛ kesintin mʋ ɛɛ kaapʋ. Dulinya abi ba mɛɛ yɛ ba taalɛ kɔɔlɛ mʋ, lɩɩ fɛɛ ba man nyi mʋ, nɩɩ be mee wu mʋ. Amaa fanɛɛ fanɛ fan nyi mʋ, lɩɩ fɛɛ ɔ bʋ fanɛ asɛ, nɩɩ ee biti ɔ baa ɔ bʋ fanɛ tɔ.
18 N mɛɛ yɛ n yɛgɛ fanɛ fɛɛ aŋmengyi, n biti n bwii ba fanɛ asɛ.
19 Ɩ san gbɛrɛɛ, dulinyaa abi ba man bɩla yɛ ba wu mɛ. Amaa fanɛɛ fanɛ bɩrɛ fen biti fan wu mɛ. Lɩɩ fɛɛ n maa tɛ nkpa tɔ falɛ, fanɛ gbaa fanɛ fen biti fan baa fan tɛ nkpa tɔ.
20 Kanɩn kakɛ maŋa fen biti fan bɩɩ fɛɛ n maa Mɛ‐Sɛ an gyɛ kʋkʋlʋn, nɩɩ n maa fanɛ gbaa an gyɛ kʋkʋlʋn.
21 “Ɔkʋmaa mʋ nɩɩ ɔ kɔɔlɛ mɛ kɔnɔsa, nɩɩ o buu ɩmʋ mʋ, mʋ ɩ gyɛ ɔmʋ nɩɩ ɔ sʋ kebiti sa mɛ. Ɔkʋmaa mʋ nɩɩ ɔ sʋ kebiti sa mɛ mʋ, Mɛ‐Sɛ gbaa ii biti ɔ nyɛ kebiti sa mʋ. Ngbaa mɛ n biti n nyɛ kebiti sa mʋ, kɛ n lɛɛ mɛ n‐yɩɩ kaapʋ mʋ.”
22 Nɩɩ Gyudasi (man gyɛ Gyudasi Isikariyoti mʋ) tɔwɛ yɛ, “Ɔnyɩrɩpɛ, mɩnɛ waa nɩɩ fii biti fʋ lɛɛ fʋ n‐yɩɩ kaapʋ anɛ nkʋn, nɩɩ man gyɛ dulinyaa abi mʋ?”
23 Nɩɩ Yesu lɛɛ kɔnɔ yɛ, “Ɔkʋmaa mʋ nɩɩ ɔ sʋ kebiti sa mɛ mʋ, ii biti o buu mɛ kɩkaapʋ mʋ. Mɛ‐Sɛ ii biti ɔ nyɛ kebiti sa mʋ, nɩɩ maa Mɛ‐Sɛ an biti a ba mʋ asɛ, kɛ a taa mʋ biliŋi anɛ ayɛ.
24 Ɔkʋmaa mʋ nɩɩ ɔ man sʋ kebiti sa mɛ mʋ, mɛɛ yɛ o buu mɛ kɩkaapʋ mʋ. Kɩkaapʋ mʋ nɩɩ fen nu falɛ man gyɛ mɛ gbaa‐gbaa mɛ kɩkaapʋ, ɩɩ lɩɩ Mɛ‐Sɛ mʋ nɩɩ o sun mɛ mʋ asɛ nɩn.
25 “N maa san n bʋ fanɛ asɛ falɛ sʋ nɩɩ n tɔwɛ fanɛ falɛ asɩn.
26 Amaa Ɔkyɛtɔpʋ mʋ nɩɩ ɔ gyɛ Kayaayu Kyɩrɛkyɩrɛ, mʋ nɩɩ Mɛ‐Sɛ mʋ ii biti o sun mɛ kɩtɩɩ tɔ mʋ, ii biti ɔ kaapʋ fanɛ kʋtɔ kʋmaa kɛ o nyiŋi fanɛ kʋtɔ kʋmaa mʋ nɩɩ n tɔwɛ fanɛ falɛ.
27 Kayɩɩ‐yuuli kɩ baa kɩ bʋ fanɛ asɛ, mɛ gbaa‐gbaa kayɩɩ‐yuuli nɩɩ n sʋ n sa fanɛ. Amaa ɩ man du fɛɛ dulinyaa kayɩɩ‐yuuli mʋ nɩɩ bɛɛ sa mʋ. Fan man yɛgɛ fanɛ nkɔlɔ i nyita, fan man waa kufuu.
28 “Fan nu n maa tɔwɛ fanɛ yɛ, ‘N kpee kɛ n bɩla bwii ba fanɛ asɛ.’ Nɩɩ fɛn kan fen biti mɛ asɩn mʋ, naafɔɔ fanɛ ansi ii biti i gyii fɛɛ n maa kpee Mɛ‐Sɛ mʋ asɛ, lɩɩ fɛɛ Mɛ‐Sɛ mʋ ɩ gyɛ ɔkparɛ ɔ kyɔ mɛ.
29 N wʋla n tɔwɛ fanɛ ɩnɩmʋ kpini nbɩɩnbɩɩ pɔyɩ kɛ ɩ ba waa, nɩɩ ɩ kan ba waa mʋ kɛ fan kɔɔlɛ mɛ gyii.
30 N mɛɛ bɩla yɛ n tɔwɛ fanɛ asɛ kyɛɛrɛɛ, lɩɩ fɛɛ dulinyaa tɔ owura ɩɩ ba. Ɔ man sʋ ɔlʋn mɛ sʋ,
31 amaa i tiri fɛɛ n maa waa kʋtɔ mʋ nɩɩ Mɛ‐Sɛ sa mɛ kɔnɔ yɛ n waa mʋ, kɛ dulinyaa abi ba bɩɩ fɛɛ n sʋ kebiti sa Mɛ‐Sɛ. Fan ba kɛ a lɩɩ nfɩɩ.”