8
मेततद एळुङ नंबरता वटेतुन किर्स्तु तेंडिह्तोग़
1 पया बह आता, मेततद एळुङ नंबरता वटेतुन गोरे पिला तेंडटा. अचोटेने पया पोग़ोन देवुळदीपतगा गळ्क मेर्क्ने आता.
2 अस्के देवुळता मुनेह नितनव एळुङ देवतुल्किन ऊळतन. देवुळि अविस्किह्क एळुङ अकुह्क ईता.
3 देवुळता राजकुर्सिता मुनेह दूपम उर्न्जनद बंगरता जागा मता. उंद देवतुलि दूपम बोळ्सनद बंगरता कसला पोसि, दूपम उर्न्जनद जागातगा वास निता. नितस्के देवुळता सबेटोर मन्कलोरा पार्तनाता संगे उर्न्जलाहि तान्क वेल्लाय दूपम दोर्कता.
4 अस्के देवतुल पोस मतद दूपमता उंडुलि देवुळता मन्कलोरा पार्तनाता संगे देवुळता मुनेह एवता.
5 ताना पया अद देवतुल बह कीता, दूपम बोळ्सनद जागाताङ किस तळमिन तना दुपम उर्न्जनद कसलातगा निहता. निहचि अविस्किन इळ्ता बूमतगा वाटिसीता. ईतस्के पया पकाय गुळ्जना, नेकना, मिळ्स्कना, बूम गल्जना इद्रम आया बोटटा.
एळुङ देवतुल्कु एळुङ अकुह्क ऊरिह्ताङ
6 पया अकुह्क पोस मतव एळुङ देवतुल्क तमाङ अकुह्कु ऊरलाह तयर आताङ.
7 मुनेता देवतुलि तना अकुमतुन ऊरता, ऊरतस्के आदुर्कु ओसो किसु नेतुरता संगे कलियिस बूमतगा अरताङ. अरतस्के बूमताङ मूंड चेकानाहि उंद चेका बूमि कर्वता. अग्डाङ मराङ, रोंडा कर्विस नेग़ आताङ.
8 पया दुस्रा देवतुलि तना अकुमतुन ऊरता. ऊरतस्के किस कर्वनद मेटाता लेह्कान बातालो मति सम्दुरतगा अरता. अरतस्के सम्दुर मूंड तूस्क आता. अग्डाहि उंद तूस सम्दुर नेतुर मारियता.
9 नेतुर मारियताह्कु अग्डाङ सबे जन्वर्क डोलताङ. अगा मतव ओडाङ वने बूळेम आताङ.
10 मूंड नंबरता देवतुलि तना अकुमतुन ऊरता. ऊरतस्के बेरा उका, तोरे किस लेह्कान पोतसोर पोग़ोटाहि अरयलाह आता; अस्के बूमतग्डाङ बेरेह्कु, एग़ पेसनाङ कनिर्कु मूंड तूस्क आताङ. पया इद उका उंद तूसताङ बेरेह्कनगा, एग़ पेसनाङ कनिर्कनगा अरता.
11 अद उकातुन कयमुलि इन्ह्तोर. अद अरतस्के मूंड तूस्कनग्डाहि उंद तूसता बेसतल एग़ कयता. एग़ कयताह्कु अद एग़ उटटोर वेल्लाटोर मन्कलोर डोलतोर.
12 नालुङ नंबरता देवतुलि तना अकुमतुन ऊरता. ऊरतस्के पोळ्दु, नेला, उकानगा पीळा अरता. अरतस्के अविस्कना मूंड चेकानग्डाहि उंद चेका ईकळ आता. अदिनेनाह्क पियलि उंद चेका वेह्च इलवा मता. नेलाता ओसो उकाना उंद चेका वेह्च नग़्का इलवा मता.
13 अद्रमलेह्काने पया उंद डेगा पिटे मोयुदगाह्क पग़यिस वायनद ऊळतन. अद पका जोरते इद्रम इनदनद केंजतन: “इंजेके मूंड देवतुल्कु तमाङ अकुह्क ऊरना मन्ह्ता. अव अकुह्क नेकिह्पा सबे बूमतोरिह्क पकाय गोसा आयग़ा! गोसा आयग़ा! गोसा आयग़ा!” इनजोर इनदनद केंजतन.