7
देवुळि तना मन्कलोरिन सीना तासिस एग़िह कीस्ता
1 पया नालुङ देवतुल्क अताङ, अनजि बूमताङ नालुङ मूलानगा निचि बूमतग्डा नालुङ बाजेना वळदुन रोमिह कीतदिन ऊळतन. अदिह्क बूमतगा, सम्दुरतगा, मरानगा मुर्तिय वळ्य कग़्सवा मता.
2 अव नालुङ आस देवतुल्किह्क बूमतुन ओसो सम्दुरतुन बूळे कीयलाहि अदिकर ईतद मता. पया ओसो उंद देवतुलि पोळ्द पेसनद बाजेताहि पेसिस वायनद ऊळतन. अदु जीवात मनदनद देवुळता सीनातुन पोस मता. पोसि अव नालुङ आस देवतुल्किन जोरते इद्रम इता:
3 “मावा देवुळता सेवातोराङ मुंजिनगा माट बेचानाह सीना तासोम, अचानाह बूमतुन, सम्दुरतुन, मराकिन बूळे केमाट,” इता.
4 अस्के सीना तासतोर लोकुरा लेकातुन नना केंजतन, इस्रयेल लोकुराङ पूरा कूळिनाहि, उंद लाक रेंड वीसाङ नालुङ अजर्क (1,44,000) मन्कलोरिह्क सीना दोर्कता.
5 ओर इद्रम मतोर: यहुदा इनवाना कूळतोर बारा अजर्क (12,000) मन्कलोर, रूबेन इनवाना कूळतोर बारा अजर्क (12,000) मन्कलोर, गाद इनवाना कूळतोर बारा अजर्क (12,000) मन्कलोर,
6 आसेर इनवाना कूळतोर बारा अजर्क (12,000) मन्कलोर, नप्तालि इनवाना कूळतोर बारा अजर्क (12,000) मन्कलोर, मनसे इनवाना कूळतोर बारा अजर्क (12,000) मन्कलोर,
7 सिमोन इनवाना कूळतोर बारा अजर्क (12,000) मन्कलोर, लेवि इनवाना कूळतोर बारा अजर्क (12,000) मन्कलोर, इसाकार इनवाना कूळतोर बारा अजर्क (12,000) मन्कलोर
8 जबलुन इनवाना कूळतोर बारा अजर्क (12,000) मन्कलोर, योसेप इनवाना कूळतोर बारा अजर्क (12,000) मन्कलोर, बिन्यामिन इनवाना कूळतोर बारा अजर्क (12,000) मन्कलोर इच्वुरिह्क सीना दोर्कता.
सबे जातिना मुलु देवुळतुन मोळ्किह्तोर
9 ताना पया नना ऊळतन; सबे जातिनोर, सबे कूळिनोर, सबे देसेह्कनोर, दुस्रा-दुस्रा बासाङ वळ्ह्कवालोर मन्कलोरा मुलु, राजकुर्सिता मुनेह, गोरे पिलाता मुनेह निच मतोर. बोग़े लेक पग़वाह मुल मतोर. मुडा मन्कलोर पांड्रि गेंदेङ उहचि मतोर. ओसो एक्ला-ईंद डेका पोस मतोर.
10 पोसि गिर्दाते इद्रम केयतोर: “राजकुर्सितगा उदतद मावा देवुळि ओसो गोरे पिला, बेरा तिपलताहि माक पिसिह कीताङ,” इनजोर केयतोर.
11 केयिह्पा सबे देवतुल्कु, राजकुर्सिता, पेदल्कना ओसो नालुङ जन्वर्कना सर्ने निच मताङ. पया अव राजकुर्सिता मुनेह दंडुम अरसि देवुळतुन मोळ्कताङ ओसो इद्रम इताङ:
12 “आमेन! मावा देवुळिये सबेट्क बेरा, डीसा तानाये, बुदि तानाये, तान जोहर कीकल, तान मान ईकल, अदिकर तानाये, लाव तानाये, आमेन!” इनजोर इताङ.
13 इतस्के पया, अचोटेने ओर्वोग़ पेदा मन्कल, नाक ताल्ह्कतोग़, “वेर पांड्रि गेंदेङ उहतोर मन्कलोर बोरु? बेग्डाह वातोर?” इतोग़.
14 इतस्के नना, “निमन पुतिन सामि” इतन. इतस्के ओग़ इतोग़, “वेर मन्कलोर पकाय तिपल आतोर; मति पिसतोर. वेर तमाङ गेंदेङ वेडिह कीयलाहि गोरे पिलाता नेतुरते नोग़तोर.
15 अदिनेनाह्क वेर इंजेके देवुळता राजकुर्सिता मुनेह मन्ह्तोर. ताना मंदिरतगा मनजि नग़्का-पिळ्विळ पियल-पोळ्द तान सेवा कीस्तोर. राजकुर्सितगा उदतद वेरा नडुम जागा आसि वेरिन राका कीयग़ा.
16-17 राजकुर्सितगा मनदनद गोरे पिला वेरिन अग़ तोहतग़ा; ओसो देवुळता पिसमुळ ईयनद एताङ कनिर्कनगा ओयग़ा; अदिनेनाह्क इंजेके वेरिह्क कग़्व वसो आयग़ा, एग़ उंडा वसो आयग़ा, एद दल्गो आयग़ा, कांका पोयो आयग़ा. देवुळि तनय वेरा सबे तिपलतुन जेक कीसि, वेरा कनिरतुन उम्ह्चिसीयग़ा,” इनजोर इतोग़.