14
गोरे पिला ओसो तना मन्कलोर
1 अद्रमलेह्काने नना सियोन मेटातगा गोरे पिला निच मतदिन ऊळतन. ताना संगे उंद लाक रेंड वीसाङ नालुङ अजर्क मन्कलोर निच मतोर. ओराङ मुंजिनगा गोरे पिलाता पेदिर ओसो ताना देवुळबाबाना पेदिर रासिस मता.
2 पया देवुळदीपताहि उंद लेङ केंजतन. अद लेङु, एताङ राल्क नेकना लेह्कान, गुंळ्जना लेह्कान नेकिस मता. ओसो जेतुर एचना लेह्का वने नेकिस मता.
3 पया उंद लाक रेंड वीसाङ नालुङ अजर्क (1,44,000) मन्कलोरु, देवुळता राजकुर्सिता मुनेह, नालुङ जन्वर्कना मुनेह, पेदल्करा मुनेह पूना पाटा वाग़तोर. ओरिन विळ्सिस बोरे अद पाटातुन कग़य पग़वोर. पूरा बूमतोर मन्कलोरग्डाहि, देवुळि ओरिने कर्सा ईसि विळ्सिह कीस मता.
4 वेर मन्कलोर कुव्रा मतोर, वेर आस्कना संगे उंजिसि तम्क कळ्वोग़ केवोर. गोरे पिला बेके आतेक अके वेर पयाह-पयाह अंदुर. पूनाङ वंजिना कोडि अलग कीस तासना लेह्कान, वेर वने देवुळतेनाह्क ओसो गोरे पिलातेनाह्क अलग आतोर.
5 वेराङ तोडिनाहि बेस्केन जोल पोल्लो पेसो. वेर बाताले कसुर लेवोर मतोर.
मूंड देवतुल्क मूंड कबुर्क ततह्ताङ
6 पया नना उंद देवतुलि मोयुदगा पग़यनद ऊळतन. तानगा बूमतग मनवालोर सबे जातिनोर, कूळिनोर, दुस्राङ-दुस्राङ बासाङ वळ्ह्कवालोर, सबे देसेह्कनोर मन्कलोरगा पोकुर कीयलाहि, अमेसा मनदनद बेसता कबुर मता.
7 अद जोरते इद्रम इता: “देवुळि नेयम कीयनद दिया एवता. अदिनेनाह्क तान्क रेयाटु, तान जोहर कीम्ह्टु. पोग़ोटा बूमि, इळ्ता बूमि, सम्दुर ओसो एताङ कनिर्क इविस्किन पंडटद देवुळतुन मोळ्काट,” इनजोर इता.
8 अद अतापया दुस्रा देवतुल वाता, वासि इद्रम इता: “बूळेम आता, बूळेम आता, पका बेरा बेबिलोन इनदनद सहर बूळेम आता. अद सहरतोर आस्क-कोय्तोर ओर्विह्क-ओर्वोग़ करब कबस्क कीसि, सबे जातिनोरिन वने कळ्वोग़ कीतोर. इद पोल्लो देवुळ ओङ आनाह, ओरिन पूला अंगुर जोमा ऊहतप लेह्का आता,” इता.
जन्वरतुन मोळ्कवालोर बूळेम आस्तोर
9 अद अतापया ओसो उंद देवतुल वाता. वासि जोरते इता, “बोर-बोर, जन्वरतुन ओसो ताना बोमातुन मोळ्किसि, ताना सीनातुन तमा मुंजतगा आयि, कयदगा आयि, तासतोर;
10 ओर देवुळतग्डाङ देवतुल्कना मुनेह, गोरे पिलाता मुनेह, किसतगा ओसो किसतळ्मिनगा पकाय तिपल आयनुर. एग़ काल्पवद पूला अंगुर जोमा लेह्का सर इनाह देवुळता ओङ मन्ह्ता. अद जोमातुन बट्कितगा दोसिसि ऊहतना लेह्का देवुळि ओरिन पकाय ओङ आता ओसो सिक्सा ईयग़ा.
11 ओरिन तिपल कीयनद किसु अमेसा-अमेसा मळ्गसोर मनदग़ा. ओरा तिपल मायो आयग़ा. ओर जन्वरतुन ओसो ताना बोमातुन मोळ्किह्तोर, ताना पेदिरता सीना तासिह्तोर. अदिनेनाह्क ओर नग़्का-पिळ्विळ पियल-पोळ्द तिपल आसोर मनदनुर.
12 अदिनेनाह्क इद पोल्लोतुन सीता कीसि देवुळताङ अडोङ वेहतप माळसोरे, येसुन विस्वस कीयनदिन विळ्सवोरु, तमा तिपलते दीरा पोस मनदना,” इनजोर इता.
13 पया देवुळदीपताहि उंद लेङ इद्रम वेहतनद केंजतन: “इद्रम रासा: ‘इंजेटाहि सामिन विस्वस कीसोर डोलतोर मन्कलोरिह्क सुकम दोर्कग़ा’ इनजोर रासा,” इता. देवुळता जीवा वने इद्रम इन्ह्ता: “इंगो! निटमे! ओर कीतव बेसताङ कबस्क ओरा साक्सि मन्ह्ताङ. अदिनेनाह्क ओर डोलतस्के तिपल लेवा सुकमते मनदनुर,” इनजोर इता.
बूमता पंटा कोयवालोर
14 पया नना उंद पांड्रि मोयुल मतदिन ऊळतन. अद मोयुदगा ओर्वोग़ उदिस मतोग़. ओग़ माने-मन्कना नडुम पुटटोना लेह्का दिसिंदोग़. ओग़ तना तलातगा बंगरता राजटोपि केग़्स मतोग़. ओना कयदगा पका ओळतद एटळ मता.
15 अस्के उंद देवतुलि मंदिरतग्डाहि पेसता, पेसिसि मोयुदगा उदिस मतोन जोरते इद्रम इता: “बूमतग्डा पंटा अयता. अदिनेनाह्क नीवा एटळ पोस कोय्म,” इता.
16 इतस्के पया, मोयुदगा उदिस मतोग़ तना एटळते बूमतग्डा पंटातुन कोय्तोग़.
17 अस्के ओसो उंद देवतुलि देवुळदीपतग्डा मंदिरतग्डाहि पेसता. तानगा वने ओळतद एटळ मता.
18 अस्के किसता पोग़ोन अदिकर तासनद उंद देवतुलि, दूपम उर्न्जनद जागाताहि पेसता. पेसिसि एटळ पोयतद देवतुलतुन जोरते इता: “बूमतग्डाङ अंगुर पंडिङ पंडटाङ. नीवा ओळतद एटळते अव अंगुर गुतिन कोय्म,” इनजोर इता.
19 इतस्के, अद देवतुलि बूमतग्डाङ अंगुर गुतिन तना एटळते कोय्ता. कोसि अंगुर पंडिन काल्कने ओय्ह्किस जोमा पेग़नद बोंदातगा वाटटा. अद बोंदाता पेदिरि देवुळता ओङ इनजोर मता.
20 सहरता पलते मतद अंगुर्क ओय्ह्कनद बोंदातगा अव अंगुर गुतिन ओय्ह्किस पेग़तोर. पेग़तस्के, पूरा मूंड नूह्क किलोमीटर एवनाह इतप नेतुर पोळ्ङता. अद नेतुर कोडाना मोसोटुन दोहतनद पटा एवनाह निंडिस अता.