13
सम्दुरता जन्वर
1 पया उंद जन्वर सम्दुरताहि पेसिस वायनद ऊळतन. तान्क दहा कोहक मताङ ओसो एळुङ तलाङ मताङ. दहा कोहकनगा दहा उड्लाङ-उड्लाङ राजटोपिङ मताङ. तानाङ एळुङ तलानगा देवुळतुन पास्कना लेह्काडाङ पेदिर्क रासतव मताङ.
2 नना ऊळतन अद जन्वर, नेग़ालता लेह्का मता. तानाङ नला काल्कु एळ्जताङ नला काल्कना लेह्का मताङ. ताना तोडि डुवलता तोडटा लेह्का मता. इंजेक अद मासुंडि बह कीता इतेके, तना लावतुन, तना उदिस राजेम ताकिह कीयनद राजकुर्सितुन, ओसो बेरा अदिकर जन्वरता कयदे ईता.
3 अद जन्वर डोलना लेह्का ताना उंद तलातगा बेरा नोमुर आस मता; मति अद हामुर ईतप लेह्का मतद नोमुर मायता. अद नोमुर मायतदिन सबे बूमतोर लोकुर बामनाह ऊळतोर. ऊळिसि तान मानेम आस ताना पयाह अतोर.
4 पया मासुंडि तना अदिकरतुन जन्वरतुह्क ईताह्कु, लोकुर मासुंडतुन मोळ्कतोर. ओसो, इद जन्वरता लेह्का बेरा बेदे इले, ताना संगे लळेम आया पग़वाल बोग़े इलेग़, इनजि जन्वरतुन वने मोळ्कतोर.
5 देवुळि अद जन्वरतुन वळ्ह्कलाह ईता. ईतस्के अद पया पका बेराङ-बेराङ पोल्लोङ वळ्ह्कता ओसो देवुळतुन पास्कता. रेंड वीसाङ रेंड नेलाङ आनाह तन्क विचर वातव कबस्क कीयलाहि जन्वरतुह्क देवुळि अदिकर ईता.
6 पया अद जन्वर पकाय देवुळतुन पास्क बोटटा. अद ताना पेदिरतुन, ताना जागातुन, अहे ताना संगे देवुळदीपतगा मनवालोरिन वने पास्क बोटटा.
7 देवुळता मन्कलोरा संगे लळेय आसि ओरिन गेल्सलाह तान्क अदिकर दोर्कता. ओसो सबे कूळिनोरिन, सबे देसेह्कनोरिन, दुस्रा-दुस्रा बासाङ वळ्ह्कवालोरिन, सबे जातिनोरिन ताकिह कीयलाहि देवुळि तान्क अदिकर ईता.
8 देवुळि दुनियातुन पुटिह कीतस्केडाहि मन्कलोर हव्किस मतद गोरे पिलाता अमेसातुह्क पिसवालोरा पुस्तकतगा, बूमतोर मन्कलोरग्डाहि बोर-बोर मन्कलोराङ पेदिर्क रासिस इलेङ, ओर अद जन्वरतुन मोळ्कनुर.
9 पुनवालोर मन्कलोर बेस-नेह्ना केंजिसि विचर कीस ऊळिर, अद इद्रमि:
10 बोरिन-बोरिन जेलते मनदलाह देवुळि तासता,
ओरिन जेलते ओयनुर.
बोरिन-बोरिन तल्वरते डोललाह देवुळि तासता,
ओरिन तल्वरते कोटनुर.
मति देवुळता मन्कलोर तिपलते दीरा पोस मनदना ओसो विस्वस विळ्सवा मनदना.
बूमता जन्वर
11 पया दुस्रा जन्वर बूमतग्डाहि पेसिस वायनद ऊळतन. तान्क गोरेता लेह्का रेंड कोहक मताङ. अद मासुंडता लेह्का वळ्ह्किंदु.
12 इद दुस्रा जन्वर बह कीता इतेके, मुनेता जन्वरता सबे अदिकरतुन पोसि, ताना मुनेह राजेम ताकिह कीता. कीसि अद मुनेता नोमुर मायतद जन्वरतुन पूरा बूमतोर लोकुर मोळ्कनाह कीता.
13 ओसो मन्कलोर ऊळनाह पोग़ोटाहि इळ्ता बूमतगा किस अरनाह कीता; अद्रमता बेरा-बेरा सीना तोहचीता.
14 मुनेता जन्वरता मुनेह सीना तोहतलाह देवुळि तान्क अदिकर ईता. अद सीना तोहचि बूमतगा मनवालोर सबेटोर मन्कलोरिन अद नाळेह कीता. अद पयडा जन्वर बूमतगा मनवालोरिन इद्रम इता: “तल्वर कसेग़ते नोमुर आसि मायतद जन्वरता बोमा पंडाटु,” इता.
15 इतस्के ओर बोमा पंडटोर. बोमातुन जीवा अर्हतलाहि दुस्रा जन्वरतुह्क देवुळि अदिकर ईता. अदिनेनाह्क अद बोमा जीवा अरसि, वळ्ह्कता ओसो तन्क मोळ्कवोर सबेटोर मन्कलोरिन हव्कलाह वेहता.
16 ओसो अद दुस्रा जन्वर बह कीता इतेके, बूमतोर सबेटोर उड्लोर, बेरोर, मता मन्कलोर, गरिबतोर, ओर्युल आयवोर, ओर्युलतोर, वेर सबेटोर तमा तिनळ कयदगा इलवेके तमा मुंजतगा सीना रासनाह कीता.
17 इद सीना लेवा मन्कलोर बेदे मादुन असलाह, वमलाह पग़वोर. इद सीना जन्वरता पेदिरतुन तोहतह्ता इलवेके अद पेदिरता लेकातुन तोहतह्ता.
18 इद पोल्लोतुन पुनदलाह बुदि मनदना. बुद मनवाल मन्कल जन्वरता लेकातुन लेकेग़. अद लेका ओर्वोग़ मन्कन तोहतह्ता. अद लेका आरुङ नुह्कना मूंड वीसाङ आरुङ (666) इचोन मन्ह्ता.