14
देवुळता पेदिरते एते मीहवाल योहनिन हव्किह्तोर
1 अद तूकने गालिल पटटा राजाल, एरोद अंतिपस इनवाल, येसु कीताङ कबस्किन केंजतोग़.
2 वेग़ राजाल मुने देवुळता पेदिरते एते मीहवाल योहनिन हव्किस मतोग़, अदिह्के वेग़ येसुना लोप्पा इह इतोग़, “ओग़ कोनि निटमे योहन मंदनोग़! ओग़ हासि ओसो तेग़्कतोग़ बहे, अदिह्के ओग़ अचोटाङ डीसाताङ कबस्क कीया पग़यह्तोग़,” इनजि तनाङ सेवकिरिन वेहतोग़.
3-4 योहनि, एरोद राजाल, वेरा नडुम कट्लाङ इह आताङ. राजाना दादाल पिलिप वेग़ जीवात मनेकेने, वेना मुते, एरोदियसि इनदनदिनु, राजाल तना लोन ओतोग़. अस्के योहन राजानगा वास इतोग़, “नीवा कीतद कबळ मोसानाङ अडोङ वेहतपु पोलो, महरज,” इनजि वेहतोग़. इद पोल्लोत्कु एरोद राजाल ओङ आसि योहनिन दोहचि जेलते वाटटोग़.
5 अचोटग्डाहि योहनिन राजाल हव्कलाह ऊळिंदोग़ मति वेग़ देवुळता कबुरतोग़ मन्ह्तोग़, इनजि लोकुर योहनिन मान ईंदुर, अदिह्क राजाल लोकुरिह्क रेयिसि योहनिन हव्कोग़ आसि.
6 पया एरोद राजाना पुटटा दियाता सीता सालमेटे कीयना उंद दिया एवता, अद दिया राजाल कुळ्पि ईतोग़. अस्के राजाल ततदु तमिना मुते इतेके, एरोदियसिना मयळि लोकुरा मुनेह एंदिसि राजान गिर्दा कीता.
7 गिर्दा आसि राजाल तान इतोग़, “निमा बाताल ताल्ह्ककिन अदिन नना नीक ईकन,” इनजि राजाल किरिया कीस वेहतोग़.
8 ताना तलोग़ काग़्हच मतपु अदु राजान इता, “पेपि, देवुळता पेदिरते एग़ मीहवाल योहनिना तला उंदि दळ्याते कीसि नाक तायु,” इनजोरे पिला ताल्ह्कता.
9 तेन केंजिस राजाह्कु बेस दल्गो मति कुळ्पतगा वाता मुडा मुनेह किरिया कीस वेहतद पोल्लोतुन मिळ्ह्ता वावो आंदु.
10 अदिह्के राजाल जेलतगा योहनिन हव्किस ओना तला ततलाह तनाङ सीपय्किन उकुम ईतोग़.
11 दळ्यात कीसि तला ततस्के पया एंता पिलातुह्क ईतोर, अदु पया तना तलिनगा ओसीता.
12 पया योहननाङ कग़यवालोर ओना सेत्तातुन ओयलाह वातोर, अह कीसि ओन पोहतोर. पया इद पोल्लोतुन ओरु येसुनगा अनजि वेहतोर.
येसु एयुङ अजर्कना मुडुह्क तिहतह्तोग़
(मार्कल 6:30-44; लूकाल 9:10-17; योहन 6:1-14)
13 इद पोल्लो केंजिसि येसु माट कग़यवालोरोम बार उंद ओडाते उदिस पेसतोम पया बेदो पेळ्ह्कल जागातके केमेन अतोम. ओग़ अतदिन पुनजि लोकुर ओना पेग़्के-पेग़्के तमाङ नाह्कनाहि ताकसोर अतोर.
14 पया येसु ओडाताहि पेसिस ऊळतोग़ अस्के वेल्लाय मुल नावा अग़ ऊळिह्तोर, इन्ज पुतोग़. ओरिन ऊळिसि, वेन्कु ओरा मान वसता, अस्के ओर ततोरिनु रोगमतोरिनु वेग़ सव्रे कीतोग़.
15 पोळ्द अरनेके माट कग़यवालोरोम येसुनगा वास इतोम, “गूरु, इद पेळ्ह्कल जागा मन्ह्ता, इगा इतेके तिंदलाह बातय दोर्को, ओसो पोळ्द इतेक अनजोर मन्ह्ता. वेर मात्रमि एरे-गूरेताङ नाह्कनगा अनजि तम्क तिंदलाह असिस तयिर, वेरिन लोहा,” इतोम.
16 “आयो, असलाह ओरिह्क दाया पोयो. मीटे ओरिह्क तिंदलाह ईम्ह्टु,” इनजोर येसु माक इतोग़.
17 “आ माटु! मयगा बेचोकु, सिरप एयुङ आरिङ, रेंडे अटटव मीन्क मन्ह्ताङ,” इनजि माट इतोम.
18 “अले, अविन नयके ताटु,” इनजोर येसु इतोग़.
19 पया ऊळाटु, येसु मुडुन इळ्न रोंडातगा उद वेहतोग़, पया अव एयुङ आरिन ओसो रेंड मीन्किन पोसि, पोग़ोन ऊळिसि, देवुळतुन जोहर कीसि आरिन किळ्ह्तोग़. अह कीसि “वांटाट,” इनजि येसु आरिङ, मीन्क माक कग़यवालोरिह्क ईतोग़, माट पया मुडुह्क वांटटोम.
20 पया वेर सबेटोर पका पंजनाह तितोर. तिन्ज-उन्ज पिसतव किळ्केङ माट गुम कीनेके, बारा डालाङ पेसताङ.
21 तिनवालोर मुलु एयुङ अजर्क (5000) कोय्तोरे मतोर, ओसो आस्कु, पिलाङ-पेकोर वेरा इतेके लेकाय इले मति!
येसु एता पोग़ोट्क ताकिह्तोग़
(मार्कल 6:45-52; योहन 6:16-21)
22 पया तिन्ज-उन्ज मारतस्केने येसु माक कग़यवालोरिन इतोग़, “नना लोकुरिन मल्स लोहतलाह पयाह मह्नन, मीट मात्रम ओडाते उदिसि सम्दुरता अबर बाजे वेंडिस अन्ह्ट, रा.” अस्के माट अहे कीतोम.
23 पया लोकुरिन लोहचि, बार कीसि, येसु वग़ोग़े गुड्रापोग़ोन देवुळता संगे वळ्ह्कलाह अतोग़. नग़्का आस मता मति ओग़ अगान मतोग़.
24 अद वेलाते मावा ओडा सम्दुरता नडुमकसाते दडटग्डाह जेक मता. अस्के वळ्युते एताङ लचाङ ओडातुन इळ्सोह-ओळ्सोह कींदुङ.
25 अस्के पया येसु नग़्काळाङ मूंड-नालुङ एगसोरे (इतेके तलाकोग़ कूसना जोक-जोक) सम्दुरता एता पोग़ोट्क मयके ताकसोरेन वातोग़.
26 एता पोग़ोट्क येसु ताकसोर वानेके माट ऊळिसि “एता मसमि वास्ता, रा!,” इनजोर रेयिस केयतोम.
27 अस्के तोप्नेन येसु माक केयतोग़, “नना रा, रेयमाटु, दीरा कीम्ह्टु,” इनजोरे इतोग़.
28 अस्के सिमोन पत्रु येसुन इतोग़, “बोग़, निमाया गूरुनिन? अह इतेके नाकु नियके एता पोग़ोट्क वायलाह वेहा,” इतोग़.
29 “अले अह इतेक वाय,” इनजोर पत्रुन येसु इतोग़. पया पत्रु ओडाताहि पेसिसि एता पोग़ोट्क ताकसोर येसुनके दायलाह बोटटोग़.
30 मति दूंदते वायनाङ बेराङ लचान ऊळिसि पत्रु रेयिसि मुळ्न्दसोर मतोग़. अस्केने, “नाक पिसिह कीम गूरु, नना मुळ्न्दिह्नन,” इनजोर ओग़ केयतोग़.
31 तोप्नेन पया येसु ओन पोयतोग़. पोसि “बह रा, निमा विस्वस लेवपु! नना नीक पिसिह कीकन इनजि निम नमविना?” इनजि येसु ओन इतोग़.
32 पया इसि ओर इर्वुर ओडातगा वास उदतस्के अद वळ्यु बेके मायतायो, बेके मायोयो!
33 अस्के ओडातगा मतोरु “सामि, निमा निटमे देवुळता मग़निन,” इनजोर ओनाङ काल्क मोळ्कतोर.
34 ताना पया माट सम्दुरतुन वेंडिसि गेनेसरेत एरियाते एवतोम.
35 अग्डोरु येसुन पुताह्कु एरेगूरेताङ सबे नाह्कने कबुर लोहतोर. अस्के ओर सबे दुकिनोरिन येसुनके पोस वातोर.
36 “गूरु, नीवा गेंदे कोङतुन मात्रम माक बोय ईम, अस्के माट बेस आयकोम,” इनजोर ओर दुकह्लोर येसुन काल्गडेम अरतोर. अहे बय्तुर कोङतुन बोयतोर, ओर सबेटोर सव्रेम आतोर.