13
पुन्पिह कीयलाह विजाता पीटो
(मार्कल 4:1-9; लूकाल 8:4-8)
1 अदे दिया येसु लोताह पेसिसि सम्दुरकचुल अनजि उदतोग़.
2 वेल्ला मुलु ओना पेग़्के गोह्डिनाङ गोह्डिङ वांदुर अदिह्कु ओग़ु एग़कचुल उंद ओडातगा अनजि काग़्हतलाह उदतोग़. कतमतोर पया ओना मुनेह दडकचुल नितोर.
3 पया ओग़ु वेल्लाङ पोल्लोङ पुन्पिह कीयनाङ पीटोने वेहता बोटटोग़. उंद पीटो इह मता: “केंजाटु, वीतवाल ओर्वोग़ विजा वीतलाह पेसतोग़.
4 ओग़ वीतनेके उडुन विजा अग़दगा अरता, अदिनु पिटेङ वासि कतम तिताङ.
5 उडुन विजा आद बंडाना जागाते अरता. अगा आदता पोग़ोन बर्बर तोळ्यो मताह्कु अद तोळ्यो ऊबिसि अग्डा विजा चिट्पटे मोन्ह्टटा.
6 मति ईर्क लोप्पा अनवाह्कु एद तेग़तस्के पोर्काङ वाग़ताङ, पया वतिस डोलताङ.
7 ओसो उडुन विजा कोये-जपिना जागाते अरता. पया कोये-जपिङ बेर्सिसि अग्डा पेसना विजातुन हव्कताङ, बेर्स एवोङ.
8 उचुन विजा इसि राब जागाते अरता. अरताह्कु अदु उंद-उंद मोदुदुह्कु बेगा डेडा वीसा (30), बेगा मूंड वीसाङ (60), बेगा नूरु (100) इद्रमलेह्का तेना पंटा वाता.
9 मियग्डाहि बोरिह्क पुनदलाह गिर्दा मन्ह्ता, नावा पोल्लोतुन बेस केंजाटु!”
10 पया माट कग़यवालोरोम ओनगा वासि ताल्ह्कतोम, “निमा लोकुरिह्कु पुन्पिह कीयनाङ पीटोने बाराह्क वळ्ह्कसोर मह्निन, गूरु?” इतोम.
11 येसु पया माक इतोग़ “मीक इतेके देवुळि तना राजेमताङ मकतव पोल्लोन पुनदलाह बुद ईता, ओरिह्क बार एवो.
12 केंजाटु, बोनगा पुनदनद बुद मन्ह्ता, ओन्कु देवुळि ओसो इंका ईयग़ा, ओन्कु वेल्लाय दोर्कग़ा. मति बोनगा पुनदनद बुद इले, ओनगा उचुन मतद बुदतुन वने देवुळि ऊंदिस ओयग़ा.
13 अदिनेनाह्कु नना पुन्पिह कीयनव पीटोने ओरिन वळ्ह्किह्नन, बह इतेके ओर तमाङ कोंडाने नावाङ कबस्किन ऊळिह्तोर, तमाङ केव्कने नावाङ पोल्लोन केंजिह्तोर, मति तमा बुदते ऊळलाह, केंजलाह, पुनदलाह ओर गळ्स आस्तोर.
14 यसयाल इनवाल तना कालमतोरा लोप्पा मुने रासतद देवुळता कबुर इह वेहतह्ता:
‘ओर लोकुर नावाङ केंजलाह कोनि केंजसोर मंदनुर,
मति ओरिह्क बेस्केन तेळियो आयग़ा;
नावाङ कबस्किन ऊळलाह कोनि ऊळसोर मंदनुर,
मति अविना अर्तम ओरिह्कु बेस्केन तेळियो आयग़ा.
15 बाराह्क इतेके ओरा बुद गळ्स आता;
केव्कने केने-केने केंजिह्तोर ओसो तमाङ कोंडाङ पिहतह्तोर.
अद्रम आसि ओर कोंडाने ऊळ पग़वोर,
केव्कने केंज पग़वोर,
बुदते पुनदा पग़वोर,
अहे सव्रेम आयलाह नयगा वावोर,’
इनजि देवुळ यसयन इन्ह्ता. इद पोल्लो नावाङ केंजवोरा लोप्पा ईसा करल आता.
16 “मति मीट बारा नावाङ कबस्किन ऊळिह्निर, नावाङ पोल्लोन केंजिह्निर इतेके मीट देय्वातोरिर.
17 इह केंजाट, नना वेहतह्नन, नेंड मीट बेव ऊळिह्निर, केंजिह्निर, अविनु मुनेतोर देवुळता कबुरतोर ओसो सेतेमतोरु इद्रम वेल्लाटोरे ऊळलाह, केंजलाह पप्ळेम आंदुर. मति ओरिह्कु ऊळ दोर्को, केंज दोर्को. लेवेके पर्ह्किह्तोर, मतेके पोग़िह्तोर!
18 “मीटु इंजेके विजाता पीटोता अर्तमतुन पुन्ह्टु.
19 अद विजा इतेके देवुळ राजेम कीयना लोप्पाडा बेसता कबुरि. इद कबुरतुन बोग़ केंजिह्तोग़, मति ओन्क तेळियो आस्ता, ओना जीवातगा वीततद विजातुन देयह्कना मुक्याल वासि ऊंदिस ओस्ता. इद्रमतोर लोकुर विजा अरतद अग़दा जागालेह्का आस्तोर.
20-21 बेद आदतगा विजा अरता, अद इहलेह्का आस्ता. बोर कबुरतुन गिर्दाते चट्नेन केंजिह्तोर, मति अद पोल्लो जीवाते गडवाह्कु गळ्के बहे दीरा पोयतह्तोर. पया देवुळता पोल्लोतुन नमतेनाह्क अड्सनाय, तिपलाय वाता इतेके चट्नेन ओर विस्वसते पेग़्के अरयह्तोर.
22 कोये-जपिङ मतद जागा इहलेह्का आंदु. बोर कबुरतुन केंजिह्तोर, मति सम्सरमताङ आल्सुळ्क ओसो अनम-दनमता उळ्बे, इव कोयेन लेह्काडाङ देवुळता पोल्लोतुन ओरा जीवातगा मोंट एवोङ, पया अद पोल्लो बातय पाय्दाता आयो.
23 मति राब जागा इहलेह्का आंदु. बोर कबुरतुन केंजिह्तोर, काळ्ङिह्तोर, पया ओरु पलत पेसिसि बेसताङ कबस्क कीस्तोर. बेद्रम राब जागातगा अरतद विजा उंद-उंद मोदुदुह्कु बेगा डेडा वीसा (30), बेगा मूंड वीसाङ (60), बेगा नूरु (100) इद्रमलेह्का तेना पंटा वाता, अद्रमता राब जागालेह्का ओर मन्कलोर आस्तोर, अद्रमता पंटालेह्का ओराङ कबस्क दिसनुङ.”
अकल रोंडाता पुन्पिह कीयनद पीटो
24 ओसो उंदि पुन्पिह कीयनद पीटो येसु माक वेहतोग़. “देवुळता राजेम कीयनाङ अडोङ इहलेह्का आंदुङ. बोग़ो ओर्वोग़ तना पोलमते बेसता गोह्कना विजा वीततोग़.
25 मति सबेटोर उंजतस्के नग़्का ओना कुळ्सातोग़ वासि गोह्कनगा अकलतुन वीतिसि अतोग़.
26 पया पोटाङ आसि मीतस्के गोह्कना एन्क दिसताङ, अस्के अकलवने दिसता.
27 “अस्के लोता ओर्युलतोर वासि माल्कान इतोर, ‘महरज, निम इसि नीवा पोलमते बेसता विजा वीतिस मतिन गदा? अगा पया अकल रोंडा बेनाह वाता कोनि?’ इनजि इतोर.
28 ‘इद कबळि नावा कुळ्सातोना बोनाय मंदग़ मति!’ इनजि माल्कल ओरिन इतोग़. ‘निमा बह इह्निन, माट अकलतुन तह्ककोम पया?’ इनजि ओर्युलतोर माल्कान ताल्ह्कतोर.
29 ‘एंह एंह, आयो, अकलतुन तह्कनेके मीट ओका वेला गोह्किन बार तह्ककिर!
30 कोयनाह्जोम अव वलियसोर अहे मनिङ. पया कोयाना वेलाते नना कोयवालोरिन वेहतकन, “मुने अकल रोंडातुन कोय्म्ह्टु, कोसि, तानाङ पिनयाङ कीस, गुम कीसि बोळ्सिसीम्ह्टु. पया नावाङ गोह्किन मात्रमि डोमेते दोसाटु,” इनदकन,’ इनजि माल्कल ओर्युलतोरिन वेहतोग़. देवुळता नेयमवने इहे आयग़ा.”
नूङ पेनेम ओसो ओयता पिंडि, इविनाङ पीटोङ
(मार्कल 4:30-34; लूकाल 13:18-21)
31 पया देवुळता राजेम बेद्रम बेर्सग़ा, तेन पुन्पिह कीयलाह येसु ओसो रेंड पीटोङ वेहतोग़. “देवुळता राजेम इहलेह्का आंदु. बोग़ो ओर्वोग़ तना लकाते नूङ पेनेम वीततोग़.
32 केंजाटु, नूङ इतेके पका उड्ला पेनेम मन्ह्ता, ऊळविरा? तेला मति वलियतस्के बेरा मरा आस्ता, अस्के तानाङ कांदानगा पिटेङ वासि उदिह्ताङ.”
33 येसु पया ओरिह्कु दुस्रा उंद पीटो वेहतोग़. “देवुळता राजेम इहलेह्का आंदु. बेद उंद आंचाळि इचुने ओयता पिंटुन मूंड कुळाङ पिंटगा काल्पता. अस्के मनेक मनेक अग्डा पूरा पिंडि ओयता.”
34 इव सबे पोल्लोङ येसु लोकुरिन पुन्पिह कीयनाङ पीटोने वेहतोग़. पुन्पिह कीयनाङ पीटोङलेवा येसु ओरा संगे बाताये वळ्ह्कोग़ आंदोग़.
35 इदिनलोप्पा देवुळ तना कबुरतोना संगे मुने वेहच मता, अद पोल्लो इंजेके करल आता, अद इह मन्ह्ता:
नना नावा तोडटे पुन्पिह कीयनाङ पीटोङ वेहतकन.
बूम पुटटग्डाहि मकिस मतव पोल्लोनु नना वळ्ह्किस तोहतकन.
येसु अकलता पीटोतुन तेळियिह कीस्तोग़
36 पया येसु लोकुरिन विळ्सिसि लोन अतोग़. अस्के माट कग़यवालोरोम ओनगा वास इतोम, “गूरु, पोलमते वीतता अकलता पीटोतुन माक पङ्ने तेळियिह कीस वेहा,” इद्रम ताल्ह्कतोम.
37 अस्के ओग़ माक वेहतोग़, “केंजाटु, बेसता विजा वीतवाल इतेके माने-मन्कना नडुम पुटटोनन, ननाने आंदन.
38-39 पोलमि, इद बारा दुनिया आंदु. बेसता विजा इद बारा देवुळतुन मावा राजाल इनजि नमवालोरु. अकलतुन वीतवाल इतेके अदे देयह्कना मुक्याल आंदु. अकल रोंडा इद बारा तानाङ केंजवालोरु. पंटा कोयाना वेला इद बारा बूम मारनद आक्रि वेला, अस्केने देवुळ कतमतोरा नेयम कीयग़ा. ओसो कोयवालोर इतेके देवतुल्क आंदुङ.
40 “अस्के बेद्रमि अकल रोंडातुन कोसि, गुम कीस मनजि किसतगा वाटिह्तोर, अद्रमि इद बूमता आक्रि वेलाते आयग़ा.
41 अद वेलाते माने-मन्कना नडुम पुटटोनन, नना नावाङ देवतुल्किनु लोहतकन. नावा राजेमते वायलाह एवोरिनु ओसो लाग्वाङ केवालोरिनु वेरिन कतमतोरिने अव देवतुल्कु नावा राजेमताहि पेहचीयनुङ.
42 देवतुल्क ओरिनु ओंडे कीसि मळ्गना पिववद किसबटटगा वाटनुङ. अगा अमेसा केयना, अळयना, मुडुर-मुडुर पल्क कोग़्कना आयग़ा.
43 अस्के सेतेमतोर तमा देवुळबाबाना राजेमते पोळ्द दींचतप लेह्का देवुळता संगे मांजसोर मंदनुर. बोरिह्कु पुनदलाह गिर्दा मन्ह्ता, नावा पोल्लोतुन बेस केंजिर!
देवुळता राजेमता दारा
44 “देवुळता राजेम कीयनव अडोङ इहलेह्का मन्ह्ताङ. बोग़ो ओर्वोग़ दुस्रोना पोलमते बोंदालोप्पा मकिह कीस तासताङ कल्दर्किन नसिबलेह्काने ऊळतोग़. पया अविन अगान मिसिसि पका गिर्दा आसि लोन अतोग़. अनजि ओग़ तना पूरा मालसोमतुन वमिसि, अव कोताने अदे पोलमतुन असतोग़, बह इतेके अव कल्दर्कु अद पोलमतगा मताङ.
45 “देवुळता राजेम कीयनव पोल्लोङ इहलेह्का ओसो मन्ह्ताङ. बोग़ो वीकुरतोग़ बेसताङ मोतिङ पर्ह्कलाह बजरते अतोग़.
46 ओन्क उंदि पका दाराता मोति दोर्कतस्के, ओग़ अनजि तना पूरा मालसोमतुन वमिसि अव कोताने इदे मोतितुन असतोग़. इद्रमलेह्का देवुळता राजेमतगा वायना इतेके दुनियाता सबे मालसोमतुन पेग़्के कीसि देवुळतुन पर्ह्काटु.
वदता पीटो
47 “देवुळता राजेम कीयनव अडोङ ओसो इहलेह्का मन्ह्ताङ. मीन्क पोयवालोर गुंजना वदि एतगा आहतह्तोर, अस्के नेह्नाङ-लाग्वाङ सबे रीतिनाङ मीन्क वदते लोप्पा अरयह्ताङ.
48 अद वदमेंडु मीन्क आस्ताङ, अस्के पोयवालोर तान दडकचुल गुंजिह्तोर. पया वेरु उदिस मनजि बेव बेसताङ, अविनु आचिसि कोंड्राते तासिह्तोर, अहे लाग्वान बारा पोहचीस्तोर.
49 अद्रमि इद बूमता आक्रि वेलातस्के आयग़ा. देवतुल्क वासि लाग्वोरिनु सेतेमतोराहि एग़्पिह कीयनुङ.
50 एग़्पिह कीसि ओर लाग्वोरिनु पिववद किसबटटा सिक्सातगा वाटिसीयनुङ. अगा अमेसा केयना-अळयना, मुडुर-मुडुर पल्क कोग़्कना आयग़ा.
51 “इव सबे पोल्लोङ मीक तेळियताङा?” इनजि येसु माक कग़यवालोरिन ताल्ह्कतोग़. “इंगो गूरु, माक तेळियताङ,” इनजि माट इतोम.
52 “अह इतेके, बेद्रम लोता माल्काल तना विजाबडटाहि पाळ्नाङ, पूनाङ इद्रमताङ मालसोमतुन पेहतह्तोग़, अद्रमलेह्काने मीटवने देवुळता राजेम कीयनाङ अडोङ कग़यतोरिर दुस्रोरिन काग़्हतकिर. अस्के मीटु पाळ्ना काग़्हमुळ ओसो नावा पूना काग़्हमुळ मीवा पोटाताहि पेहच काग़्हतकिर,” इनजि येसु माक इतोग़.
तमा नाटेनोर येसुन पास्किह्तोर
(मार्कल 6:1-6; लूकाल 4:16-30)
53 पया इव पुन्पिह कीयनव पीटोङ वेहच मारतस्के, येसु अग्डाहि पेसिस अतोग़.
54 तमा नाग़ नासरेतते वासि ओरा पार्तनाता लोतगा ओरिह्कु देवुळताङ पोल्लोङ वारमता पोल्वादियाते काग़्हन्दोग़. इतेके अव पोल्लोन केंजिसि ओरु सबेटोर बयल आतोर. “वेन्क अचोटा बुदि, अचोटाङ बेराङ कबस्क कीयना डीसा, बेग्डाहि दोर्कता, रा?
55 वेन इसि माट पुनोम, वड्लाना मग़ि आयोग़ा? वेना तलोग़ मरियालि आयोया? ओसो वेनाङ तमोर याकुबि, योसेपि, सिमोनि, यहुदाल वेरे इनजि माट पुतोमे.
56 ओसो वेनाङ सबे एलास्क इगाने मन्ह्ताङ इसि. पया वेन्कु अचोटा बुद, डीसा बोग़ ईतोग़?” इनजि नाटेनोर येसुन पास्कतोर.
57 अद्रम आसि ओर येसुन, नमोम इतोर. अस्के येसु ओरिन इतोग़, “देवुळता कबुरतोन्क दुनियामेंड मान दोर्किह्ता, मति कुदता नाटे अहे लोते मात्रमि मान दोर्को. अद्रमे नाक इंका ओर अहे ऊळिह्तोर”
58 ओर येसुन नमवाह्कु अगा ओग़ु बेरा डीसाताङ कबस्क वेल्लाङ केवोग़.