18
येसुन हव्कलाह पोयतह्तोर
(मत्याल 26:47-56; मार्कल 14:43-50,53-54; लूकाल 22:47-53)
1 इचोन वळ्ह्किसि, येसु माट कग़यवालोरा संगे पेसतोम, पेसिसि किद्रोन इनदनद लपातुन वेंडिसि अबर बाजे अतोम. अगा जय्तुन मराङ ओग़्सतद उंद जागा मता, अगान माट नेङतोम.
2 येसु ऊक-ऊके माट कग़यवालोरा संगे अद जागाते कलियिन्दोग़, अदिह्क ओन कोंटेतोरा कयदे पोस एवल यहुदाह्क वने इद जागा एर्का मता. येसु अदे जागातगा दोर्कनोग़ इनजि यहुदाल पुतोग़.
3 अदिह्कु पेर्मालोर ओसो परुसिर वेर लोहतोर पह्रातोर, ओसो रोम राजेमतोर सीपय्कना उंदि पल्टन, वेरिन सबेटोरिन यहुदाल अग़ तोहचोर ततोग़. वेर सोह्ळाङ, कंदिस्क ओसो वीस्राङ पोसि अगा वातोर.
4 नाक बाताल आयनद मन्ह्ता इनजि येसु कतम पुनजिय मतोग़, पया ओग़ ओरा मुनेह वासि “मीट बोन पर्ह्किह्निर?” इनजोर ओरिन ताल्ह्कतोग़.
5 अस्के ओर “नासरेत नाटेनोग़ येसुन पर्ह्किह्नोम,” इनजोर इतोर. अस्के येसु ओरिन इतोग़, “ओनन ननान आंदन!” (अस्के ओन नाळेह कीस पोस एवल यहुदलवने ओरा संगे अगान निच मतोर.)
6 येसु ओरिन “ओनन ननान आंदन,” इनजोर इतस्के, ओर देवुळता लावते पेग़्के गुचिसि पेत वेळ्किस अरतोर.
7 पया येसु ओसो ओरिन ताल्ह्कतोग़, “मीट बोन पर्ह्किह्निर?” अस्के “नासरेततोग़, येसुन पर्ह्किह्नोम,” इनजि ओर इतोर.
8 “नना मीक ‘ओनन आंदन,’ इनजोर वेहतन, अले! नाक पर्ह्किह्निर इतेके वेरिन नावाङ कग़यवालोरिन विळ्साटु,” इनजि येसु ओरिन इतोग़.
9 बाराह्क इतेके “बोरिन निमा नाक ईतिन, ओरग्डाहि वग़ोग़वने लेसोग़ आयनोग़,” इद्रम येसु मुने देवुळबाबान वळ्ह्किस मतोग़, अद पोल्लो करल आयलाहि “वेरिन विळ्साटु,” इतोग़.
10 सिमोन पत्रुनगा उंद दाळो कसेग़ मता, ओग़ अदिन तेंडिसि पेर्माना साकुर केवान वग़ोन हव्कलाह अद कसेटे ईतोग़, मति अद कसेग़ि ओग़ साकुर केवाना सिरप तिनळ केवदुन पोडोह देगनाह दल्गता. (ओग़ साकुर केवाना पेदिरि माल्कोसि आंदु).
11 अस्के येसु पत्रुन इतोग़, “नीवा कसेटुन दाळोतगा तोग़्का, रा. बाबाल नयेनाह्क तासतद तिपलतुन नना मुर्तिय एनोन आयकना?”
12-13 पया अगा वातोर सीपय्क, ओरा मुक्याल ओसो मंदिरता पह्रातोर, वेर सबेटोर येसुन पोस दोहचि, ओन मुने अनाल इनवानगा ओतोर. बाराह्क इतेके अद वर्सा मोदुल पेर्माल कयपाल इनवाल मतोग़, वेनाय मामाल अनाल आंदोग़, ओग़ मुनेतोग़ मोदुल पेर्माल आंदोग़.
14 “वग़ोग़ मन्कल लोकुरेनाह्क हायना, इवटेन मावा पाय्दा आयग़ा,” इद्रम इनजि यहुदिराङ पेदल्किन मुने वेहच मतोग़, ओग़ वेग़े कयपाल इनवाल आंदोग़.
पत्रु “येसुन पुनोन” इन्ह्तोग़
(मत्याल 26:69-70; मार्कल 14:66-68; लूकाल 22:55-57)
15 पया सिमोन पत्रु ओसो नना, माट येसुना पयाह-पयाह दायलाह आतोम. नना अनाल इनवाल पेर्मान पुताह्कु, येसुना संगे ओर नाकु पेर्माना रेसातगा नेङलाह ईतोर.
16 मति पत्रु इसि पलत अग़दगा निच मतोग़. अदिह्कु नना पेर्माना पुतोनन मताह्कु, मल्स पलत वासि अग़दुन केपनद पिलातुन वेहतन, अद पया नाकु पत्रुन लोप्पा ओयलाह ईता.
17 अस्के अद अग़ केपनद ओर्युल लेया पत्रुन इता, “निमा इंका ओग़ मन्कना कग़यवनिने बहे, एय?” इनजोर ताल्ह्कता. अस्के “एंह-एंह, नना आयोन!” इनजि पत्रु तान इतोग़.
18 अद तूकने ईङम मता, अदिह्कु सेवा-साकुर केवालोर ओसो मंदिरताङ पह्रातोर ईकिना किस निर्विह कीसि, आग़सोर निच मतोर. अस्के ओरा नडुम पत्रुवने निचि किस आग़सोर मतोग़.
पेर्माना मुनेह येसुना बयन
(मत्याल 26:59-66; मार्कल 14:55-64; लूकाल 22:66-71)
19 इद्रम आनेके पेर्माल येसुनु तनाङ कग़यवालोरा लोप्पा ओसो तना काग़्हमुळता लोप्पा ताल्ह्कतोग़.
20 येसु ओन इतोग़, “नना कतमतोरा मुनेह पिंगम-पंगमे वळ्ह्कतन. नना कुस्क्ने बातय वळ्ह्कोन, मति बेगा सबे यहुदिर कलियिंदुर अगा, इतेके सास्त्रम काग़्हतना लोह्कने आय, मंदिरते आय, इद्रमताङ जागाने नना अमेसा काग़्हन्दन.
21 मोसानाङ अडोङ वेहतपु, साक्सिर लेवाये नाक बार्किया ताल्ह्किह्निन? नना बाताङ काग़्हतन, अदिन बोर केंजतोर, ओरिह्क एर्काय मन्ह्ता. ओरिने ताल्ह्किस ऊळा,” इनजि येसु इतोग़.
22 येसु अह इतस्के, अगा निच मनवाल मंदिरता पह्रातोग़ ओर्वोग़ येसुन सेळेल इनह सापुळ ईतोग़, ईसि इतोग़, “निमा पेर्मान इह बह इह्निन?”
23 “नना बेदाय गल्ति पोल्लो वळ्ह्किस मतेके, बाताल गल्ति वळ्ह्कतनो, अदिन वेहा. मति करल वळ्ह्किस मतेके निमा नाक बाराह्क नल्ह्तह्निन?” इनजि येसु इतोग़.
24 अस्के अनाल इनवाल पेर्माल तना अने, मोदुल पेर्माल कयपानके येसुन दोहतदिन लेहवाये, अहे लोहचीतोग़.
पत्रु ओसो येसुन पुनोन इन्ह्तोग़
(मत्याल 26:71-75; मार्कल 14:69-72; लूकाल 22:58-62)
25 पया सिमोन पत्रु किस अग़सोर निच मतस्के, ओर ओन ताल्ह्कतोर, “बह, निमावने ओनाङे कग़यवनिना?” इतस्के “एंह-एंह, नना आयोन,” इनजोर पत्रु कैंगम आतोग़.
26 अगा निच मनवालोरगा पेर्माना ओर्वोग़ साकुर केवाल मतोग़, पत्रु नांगा बोना केवदुन डायिस मतोग़, ओनाय जीवातोग़ ओग़ आंदोग़. पया ओग़ पत्रुन इतोग़, “नीक बह नना ओना संग जय्तुन मराना जागातगा मतिन अस्के ऊळोन, डा?”
27 तेला मति पत्रु “एंह-एंह, नना आयोन,” इनजोर पका कैंगम आतोग़. अदे गट्काते तलाकोग़ कूसता.
गुमसिना मुनेह येसु
(मत्याल 27:1-2,11-31; मार्कल 15:1-20; लूकाल 23:1-25)
28 पया यहुदिराङ पेदल्क पङ आयनामुनेने येसुनु कयपानग्डाहि रोम सर्करतोग़ गुमसिनगा ओतोर. माकु आवना पंडुमता पोल्वाते लोह्कने जावा उनडना मन्ह्ता, अगा दुस्रा जाततोना लोन अतेके माट विटळ आयकल, इनजि ओर गुमसिना लोता लोप्पा नेङोर.
29 अदिह्क पिलाति इनवाल गुमसि लोता पलत पेसिस ओरिन इतोग़, “मीट वेग़ मन्कना बेद कसुर तासिह्निर?”
30 ओर येसुनगा बेदे कसुर तास पग़वाह्कु ओर पिलातिन इतोर, “वेग़ कसुरतोग़ आयवेके माट वेन नियके पोस तवोम आवेरोम, महरज” इतोर.
31 “अह इतेके मीटे वेन ओसि, मीवाङ अडोङ मतपु वेना नेयम कीम्ह्टु,” इनजि पिलाति इतोग़. अस्के यहुदिराङ पेदल्क इतोर, “मावा अडोना उतुरते ओन हव्कना गावले, मति मीट रोम सर्करतोरिरे माकु बोनाय हव्कनद नेयम कीयलाह अदिकर एविर!”
32 (येसु तना बेद हामुरते हायवल मतोग़, अदिन वेहतह्पा बेव पोल्लोङ वळ्ह्किस मतोग़, अव करल आयनेनाह्क इह आता. बाराह्क इतेके सिरप रोम सर्करतोरे हव्कनागुटातगा सिक्सा कीस हव्किंदुर.)
33 अस्के पिलाति लोता लोप्पा अनजि येसुन तनगा केयिस ताल्ह्कतोग़, “बह, निमा यहुदिरा राजानिना?”
34 “नना बेद्रमता राजानन, इद नीवाय इसबते वळ्ह्किह्निना, आयवेके यहुदिरा इसबते वळ्ह्किह्निना?” इनजि येसु इतोग़.
35 “निमा नाक यहुदिरा लोप्पा बाराह्क ताल्ह्किह्निन? नना यहुदि जाततोनना? नीवाय लोकुर, नीवाङे पेर्मालोर कोनि नीक नयके पोस ततोर. नीवा बेद कसुरतुह्कु ओर नीकु तमा राजाल इनजि मानेम आयोर?” इनजोर पिलाति येसुन इतोग़.
36 येसु इतोग़, “इद दुनियातोर नाक राजाल केवोर. नावा राजेम इद दुनियाता मन्ज मतेके, नना यहुदिराङ पेदल्कना कयदे अरयनायो इनजोर नावा सेवा केवालोर लळय कीस मनेर. मति नावा राजेम इद बूमता आयो,” इतोग़.
37 अस्के पिलाति ओन इतोग़, “अह इतेक निमा राजानिना?” येसु ओन इतोग़, “निमा इह्निन, अहे. राजाल आयनेनाह्के नना इद बूमते पुट वातन ओसो सेतेमता लोप्पा वेहतलाह. बोर सेतेमते ताकिह्तोर, ओर नावाङ पोल्लोङ केंजिह्तोर.”
38 “सेतेम इतेक बातालि, बोर पुन्ह्तोर?” अह इनजोर पिलाति लोताहि ओसो पलत पेसिसि यहुदिराङ पेदल्किन इतोग़, “नाक वेनगा बातय कसुर दिसो.
39 मति आवना पंडुम दिया जेलते मतोन वग़ोन नना विळ्सना, इद्रम मीवा काय्दा मन्ह्ता. अदिह्क मीट इह्निर इतेके नना मियेनाह्कु यहुदिरा राजान विळ्सकन,” इनजि ओरिन इतोग़.
40 अस्के ओर पका केयिस-केयिस इतोर, “वेन विळ्समा, मति मयेनाह्क बरबसिन विळ्सा!” (बरबसि इनवाल बेरा डाकु आंदोग़, ओग़ जेलते मतोग़.)