17
येसु तनेनाह्क देवुळतुन ताल्ह्किह्तोग़
1-2 इव गोटिङ वळ्ह्कतस्के, येसु पोग़ोटा बूमतके ऊळतोग़, अह कीस देवुळता संगे वळ्ह्कतोग़, “ए बाबा, नावा हायना कगो एवता. बोरिन निमा नाक ईतिन, ओरिह्क सबेटोरिह्क नना अमेसाता जीवा ईयना इनजि, नाक निमा माने-मन्कना पोग़ोन अदिकर ईतदे मन्ह्ता. अहलेह्का बाबा, नना नीक मान ईयना इनजि निमा नाक मान ईमु.
3 निमा वग़ोनिन सेतेम देवुळतिन इनजि नीक पुनदना, ओसो निमा लोहतोन पिसिह केवान येसुन पुनदना, इदे अमेसाता जीवा आंदु.
4 बेद कबळ निमा नाक कीयलाह ईतिन, अदिन मारिह कीसि नना इद बूमतगा नीक मान ईतन.
5 ए बाबा, इद दुनिया पुटनामुने बेद्रम माट इर्वल ऐंगे डीसातोरल मतल, अद्रमे इंजेके नीवा संगे नाक डीसातोग़ आयलाह ईमु.
येसु तनाङ कग़वालोरेनाह्क देवुळतुन ताल्ह्किह्तोग़
6 “बोर मन्कलोरिन निमा इद दुनियातोरग्डाहि नाक ईतिन, वेरिह्क निमा बेद्रमतोनिन इनजि नना पुन्पिह कीतन. वेर नीवाङ मन्कलोर आसि वेरिन निमा नाक ईतिन. ओसो वेर नीवा पोल्लोतुन केंजिस अहलेह्का कीतोरु.
7 बेद डीसा, बेद बुदि, बेव पोल्लोङ निमा नाक ईतिन, अव कतमे निटम नियग्डाहि वातव आंदुङ, इनजोर वेरिह्क इंजेक तेळियता.
8 बाराह्क इतेके बेव गोटिङ निमा नाक वेहतिन, अविस्किन नना वेरिह्क वेहतन. नना वेहतस्के वेर अविस्किन पोयतोर, पोसि नना नियग्डाहि पेसिस वातन इनजोर वेर करले पुतोर, ओसो निमाने नाक लोहतिन इनजि वेर नमतोर.
9 वेरेनाह्क नना इंजेके नीक ताल्ह्किह्नन. नना दुनियातोरेनाह्क ताल्ह्कोन, मति बोरिन निमा नाक ईतिन, सिरपि ओरेनाह्के ताल्ह्किह्नन, बाराह्क इतेके वेर नीवाये लोकुर आंदुर इनजोरे.
10 बोर-बोर नावा लोकुर आंदुर, ओर कतमतोर नीवा वने लोकुर आंदुर. ओसो बोर नीवा लोकुर, ओर नावा वने लोकुर. ओसो वेरा नडुमि नावा डीसा तोहतद मन्ह्ता.
11 नेटाहि नना इद बूमते ओसो मनोन आयकन. नना नियके वाय्ह्नन, मति वेर इतेके इद बूमतेन मंदनुर. ए पवित्र बाबानिन, बहलेह्का माट इर्वल उंद आस मह्नल, अहलेह्का वेरवने उंद पट आयना इनजि वेरिन काप आडा. ओसो निमा नाक नीवा लाव ईतिन, अद लावते वेरिन काप आडा.
12 नना वेरा संगे इद दुनियाते मनेके, नाक ईतद नीवा पेदिरता लावते, वेरिन राका कींदन. बोग़ बूळेम आयवल मन्ह्तोग़, ओन यहुदान विळ्सिसि वेरग्डाहि बोग़े बूळेम आयोग़. बाराह्क इतेके ओग़ बूळेम आयवाना लोप्पा सास्त्रमते रासतद पोल्लो करल आयना इनजि इव गोटिङ आयनाय गावले.
13 “नना इंजेके नियके वाय्ह्नन, बाबा. मति वेरा जीवाते नावा गिर्दा पूरा मारना इनजि नना इद बूमते मनेकेने इव गोटिङ वेहतह्नन.
14 नना नीवाङ पोल्लोङ वेरिह्क काग़्हतन. दुनियातोर इतेक वेरिन कोंटे कीसोर मन्ह्तोर, बाराह्क इतेके बहलेह्का नना इद दुनियातोनन आयोन, अहलेह्का वेरवने इद दुनियातोर आयोर.
15 ‘निमा वेरिन इद बूमताहि पेहचीम,’ इनजोर ताल्ह्कोन. मति ‘वेर इद बूमते मनेके देयह्कना मुक्यानग्डाहि वेरिन पिसिह कीम,’ इनजि नना नीक ताल्ह्किह्नन.
16 बहलेह्का नना इद दुनियातोनन आयोन, अहलेह्का वेरवने इद दुनियातोर आयोर.
17 नीवा सेतेम पोल्लोता संगे नीके माळना इनजि वेरिन अलग कीस तासा.
18 बहलेह्का निमा नाकु दुनियातोरगा लोहतिन, अद्रमे ननावने वेरिन इद दुनियातोरगा लोहतन.
19 ओर सेतेम पुनजि दुनियाताहि अलग ताकना इनजि, ननावने इद दुनियाताहि अलग आस ताकिह्नन.
येसु सबे विस्वसिरेनह्क देवुळतुन ताल्ह्किह्तोग़
20 “नना सिरप वेरेनाह्के आयो, मति बोर वेरा पोल्लोतुन केंजिसि नाक नमनुर, ओरेनाह्क वने नना नीक ताल्ह्किह्नन.
21 ए बाबा, बेद्रम निमा नना ऐंगे जोळते मह्नल, अहे ओर सबेटोर उंद आसि मयगा जोळेम आस मनिर, अस्के निमा नाक लोहतिन इनजोरे दुनियातोर पुंदनुर.
22-23 निमा नाक लोहतिन, ओसो बेचोन निमा नाक जीवा कीतिन अचोने ओरिन वने निमा जीवा कीतिन, इनजोर दुनियातोर पुंदनेनाह्क ओर कतमतोर उंद एका आयिर. बहलेह्का माट इर्वल उंद आस मह्नल, अहलेह्का ओरवने उंद एका आयिर: नना ओरगा जोळेम आस मह्नन, ओसो निमा नयगा. इदिनेनाह्क बेद्रम निमा नावा संगे उंद आसि नाक मान ईतिन, अद्रमे नना ओरा संगे उंद आसि अदे मान ओरिह्क ईतन.
24 “बाबा, ओरिन निमाने नाक ईतिन. ओर नावा डीसातुन ऊळनेनाह्क, बेगा नना दाय्ह्नन, अगाने ओरवने नावा संगे मनदना, इदे नावा विचर आंदु. अद डीसा निमा नाक ईतिन बाराह्क इतेके दुनिया पुटनामुनेने नाक जीवा कीतिन.
25 “ए सेतेमतोग़ बाबानिन, नीक दुनियातोर पुनोर मति नना नीक पुह्नन. ओसो निमा नाक लोहतिन इनजोरे नाक नमवालोरवने पुन्ह्तोर.
26 बेद्रम निमा नाक जीवा कीय्ह्निन, अद्रमे वेरवने जीवा केवालोर आयना, ओसो ननावने वेरगा जोळेम आस मनदना इनजि, ओर नीक पुनदलाह नना ओरिन पुन्पिह कीसीतन, ओसो कीसोर मंदकने,” अह इनजि देवुळता संगे येसुनाङ गोटिङ मारताङ.