3
पोलु तिसलुनितोर विस्वसिरिन पार्तना कीयलाह वेहतह्तोग़
1 मावोर विस्वसिरिर! आक्रिते इद पोल्लो वेहतह्नन: माट येसुसामिना पोल्लोतुन पोकुर कीयलाह आतोम. अदिनेनाह्क अद पोल्लो चट्पिट दुनियामेंड पोकुर आयि, मियगा आतप लेह्का सबेटोर लोकुर वने तान मान ईसि केंजिर इनजोर मयेनाह्क पार्तना कीम्ह्टु.
2 अहे ओसो सबेटोर विस्वस केवोर, अदिनेनाह्क विरुद केवालोर मन्कलोरग्डाहि, तेल्वे मन्कलोरग्डाहि देवुळि माक पिसिह कीयना इनजोर वने पार्तना कीम्ह्टु.
3 मति सामि सेतेमतोग़ आंदोग़. ओग़ मीक मेग़्किह कीयनोग़ ओसो देयह्कना मुक्याल मियगा वावाह मीक राका कीयनोग़.
4 मीक माट उकुम ईतप लेह्का मीट कीयलाह आतिर, मुनेह ओसो मीट कीसोरेन मनदकिर इनजि सामि मीक ताकिह कीस्तोग़ इनजोर ओनगा नावा बर्वस मन्ह्ता.
5 देवुळि मीक बेचोन जीवा कीता इनजोर पुनदलाहि, ओसो येसु किर्स्तु बेद्रम तिपलते दीरा पोस मेग़्किस मतोग़, अद्रम मीट वने तिपलते दीरा पोस मेग़्किस मनदलाहि, सामि मीक ताकिह कीयेग़.
कबळ कीयलाह लंडा आयवालोर विस्वसिरिन पोलु रेय्पिह कीस्तोग़
6 इंजेके मावोर विस्वसिरिर! मावा येसुसामि किर्स्तुना पेदिरते मीक उकुम ईयलाह आतोम: उच्वुर विस्वसिर कबळतुह्क लंडालोर आतोर, माट मीक काग़्हतव पोल्लोना लेह्का ताकोर, अद्रम मनवालोरा संगे गोत आयमाट.
7-8 माट मियगा मतस्के बेद्रम मनदना इनजि तोहतोम. बोनगान ताल्ह्किसि तिनोम. मति बोनगान मोता आयनद आयो इनजोर नग़्का-पिळ्विळ पियल-पोळ्द तिपल आसि, एपुर पोहच कबळ कीस तितोम. मीट वने मावा लेह्कान मनदना इनजोर पुतिरे.
9 मियगा मोता आयलाह माक अदिकर मताये, मति माट अद्रम आयोम. मीट वने मावा लेह्कान मनदना इनजोर मीक तोहतलाहि, मावाङ कय्कने कबळ कीस तितोम.
10 कबळतुह्क लंडा आयवाल मन्कल तिनमाकेग़ इनजोर माट मियगा मनदह्पा उकुम एवोमा?
11 माट इद्रम बाराह्क रासिह्नोम इतेके मियगा उच्वुर विस्वसिर कबळतुह्क लंडा आसि तिरियिह्तोर, आपुना कबळ-काम केवा दुस्रोराङ कबस्कनगा कय्क वाटिह्तोर इनजोर माट केंजतोम.
12 अद्रमतोर मन्कलोर केमेन आस कबळ कीसि, आपुना कह्टेमतुन तिनिर इनजोर येसुसामि किर्स्तुना पेदिरते ओरिन अर्ज कीसि उकुम ईय्ह्नोम.
13 मति मावोर विस्वसिरिर! मीट इतेके आरेम आयवा बेसताङ कबस्क कीसोर मन्ह्टु.
14 इद सीटटे माट रासतद पोल्लोतुन बोग़ाय केंजवेके, ओन ऊळिस मन्ह्टु, ओन्क लजा वानाह ओना संगे कलियमाट;
15 मति ओन कोटुलतोना लेह्का वने ऊळमाटु, मावोग़ विस्वसि इनजोर सीता कीसि ओन बुद वेहाटु.
आक्रिताङ पोल्लोङ
16 सुकम एवाल सामि मीक अमेसा सबे रीतते सुकम ईयेग़. सामि मीट सबेटोरा तोळ मनेग़ इनजोर पार्तना कीय्ह्नोम.
17 इचानाह नना वेहचोर अतन, ओर्वोग़ राससोर अतोग़, इंजेके नना पोलुनन नावाय कयदे मीक “जय येसु” इनजोर रासलाह आतन. नना इद्रमे सबे सीटिनगा ननाय रास वेहतन इनजोर मारिह कीय्ह्नन.
18 मावा येसुसामि किर्स्तुना देय्वा मीट सबेटोरगा मनि.