2
किर्स्तु मल्स वायनामुने लाग्वोग़ मन्कल दिसनोग़
1 मावोर विस्वसिरिर! इंजेके मावा येसुसामि किर्स्तु ओसो वने वायनदिना लोप्पा, अहे माट ओनगा जमा आयनदिना लोप्पा, उंद पोल्लो वेहतह्नन:
2 सामि ओसो मल्स वायनद दिया वाताये इनजोर माट देवुळता लेकाते वेहतोम, इलवेके काग़्हतोम, इलवेके सीटटे रासिस लोहतोम, इनजोर मीट केंजतेके, जल्दि कंद्रेम आयमाटु, रेयमाटु.
3 इद्रम बह तेला बोग़े मन्कनाङ पोल्लोने मीट लेसमाटु. मुने सबेटोर मन्कलोर देवुळता पोल्लोतुन केंजोम इनजोर विरुद कीयनद कालम वायग़ा. पया देवुळताङ अडोन पास्कवाल मन्कल दिसनोग़. (ओना लाग्वा बुद ओन पूरा बूळेम आयनेकेन ओसीयग़ा.) ताना पयाये सामि वायनद दिया वायग़ा.
4 ओग़ लाग्वोग़ मन्कल ननाये निटम देवुळतन इनजोर वेहचि देवुळता मंदिरतगा उदनोग़. मन्कलोर मोळ्कनव सबे पेन्क-हानास्क, सबे देवुळ्क नावा मुनेह बाताङ इलेङ इनजोर ओग़ पोंगनोग़.
5 नना मीवा संगे मतस्के मीक इव पोल्लोन वेहतन, सीता इलेया?
6-7 इंजेक वने देवुळताङ अडोन केंजवद बुदि दुनियाता मन्कलोरिन कुस्क्ने ताकिह कीस्ता इनजोर मीट पुतिर. इदे बुदतेनाह्कु ओग़ देवुळताङ अडोन पास्कवाल मन्कल तनाय कगोते सबेटोरिह्क दिसनोग़. इंजेके ओर्विना राजेम ताकिह्ता, मति उंद दिया ओग़ मायनोग़.
8 ओग़ मायतस्केने देवुळताङ अडोन पास्कवाल दिसनोग़. मति येसुसामि वातस्के, ओग़ अडोन पास्कवान तना ऊकुरते हव्कनोग़. येसुसामि वायनदिन ऊळिसिये ओग़ लाग्वोग़ु बूळेम आयनोग़.
9 ओग़ अडोन पास्कवाल देयह्कना मुक्याना सबे लाव अग़्के वायनोग़. बामना लेह्काडाङ कबस्किन सीनाङ इनजोर तोहतनोग़, ओसो इव देवुळतग्डाङ इनजोर मन्कलोर इनाह ओरिन नाळेह कीयनोग़.
10 सबे रीतिनाङ लाग्वाङ कबस्क तोहतनोग़, ओनाङ कबस्कु बूळेम आयनद अग़दे अनवालोरिन नाळेह कीयनुङ. ओरु येसु किर्स्तुना सेतेम पोल्लोतुन केंजोर, केंजतेके देवुळि ओरिन पिसिह केवालि.
11 ओर सेतेम पोल्लोतुन केंजवाह्कु, जोलतुन नमिर इनजोर देवुळि ओरिन पूरा लेसनाह कीयग़ा.
12 अस्के सेतेम पोल्लोतुन नमवा, लाग्वा कबळते गिर्दा आतोर सबेटोर मन्कलोरिन देवुळि कसुर तोहतग़ा.
विस्वसिर बेसता कबुरतुन मेग़्किस विस्वस कीसोर दायना
13 मति मावोर विस्वसिरिर, सामि जीवा कीतोरिर! मीट पवित्र जीवाता मेटे सिरसिर आसि, सेतेम पोल्लोतुन नमिसि पिसना इनजि, देवुळि मुनेताहि मीक आचता. अदिनेनाह्क मीवासाटि माकु देवुळतुन अमेसा जोहर कीयलाह ओजिह्ता.
14 बेद बेसता कबुरतुन माट मीक पोकुर कीतोम, ताना मेटेने देवुळि मीक केयता. मावा येसुसामि किर्स्तुना डीसाते मीट कलियना इनजोर मीक केयता.
15 अदिनेनाह्क मावोर विस्वसिरिर! मीवा विस्वसते मेग़्किस मन्ह्टु. माट मावा तोडटे आयि, सीटटे आयि काग़्हतव पोल्लोन पोस ताकाटु.
16 माक जीवा कीतोग़ु, माक दया कीसि पूरा मावा जीवातुन सितुर कीतोग़ु, अहे आसा ईतोग़ु मावा देवुळबाबाल ओसो मावा येसुसामि किर्स्तु;
17 वेरु मीवा जीवातुन सितुर कीयिर, मीट अमेसा बेसताङ कबस्क कीयलाहि, बेसताङ पोल्लोङ वळ्ह्कलाहि मीक मेग़्किह कीयिर.