5
सामि ओसो वायह्पा तयर मन्ह्टु
1-2 कले नग़्का कुस्क्ने वायना लेह्कान, सामि ओसो वायनद दिया वने मनदग़ा इनजोर मीट बेस पुतिर. अदिनेनाह्क मावोर विस्वसिरिर! इंजेके येसुसामि बेस्के मल्स वायनोग़, अस्के बह-बह आस्ता इनजोर मियेनाह्क रासलाहि गर्ज इले.
3 “इंजेके सुकम मन्ह्ता, रेय इले,” इनजोर मन्कलोर इनदह्पा, दोम्ह्क्ने ओरा पोग़ोन बेरा गोसा वायग़ा. पोटात मनदनद आंचाह्क दोम्ह्क्ने नोयनद सुरु आस्ता, अद्रमलेह्काने आयग़ा. मन्कलोर बेगाने मकिस पिस पग़वोर.
4 मति मावोर विस्वसिरिर, मीट ईकळते मतप देवुळतुन पुनवोरा लेह्का मनविर. अदिनेनाह्क कले कुस्क्ने वातस्के जीवा गाबर आयना लेह्कान, अद दिया वातस्के मीट गाबर आयविर आयकिर.
5 मीट सबेटोर विस्वसिरिर वेह्चते मतप लेह्कान, पियलते मतप लेह्कान, बेस बुदते मनवालोरिर आंदिर. उच्वुर मन्कलोर कीयना लेह्कान, माट नग़्का ईकळते मतप लेह्का उंजिस मनवालोर दुनियाता मन्कलोरल आयवल.
6 अदिनेनाह्क विस्वस केवोरा लेह्का, बाताले पुनवा उंजतप मनवल, मति सामिना अग़ ऊळसोर उसरते मनदकल, बेसतल बुदते मनदकल.
7 उंजवालोर इतेके नग़्का उंजिह्तोर, ओचवालोर नग़्का ओचिह्तोर;
8 माट बारा पियलता वेह्चते पिसवालोर मन्कलोरल, माट बेसतल बुदते ओचवा मनदकल. सीपय तना अर्युलतुन राका कीयलाहि कचता जगा केग़यना लेह्कान, विस्वसतुन ओसो जीवा कीयनद पोल्लोतुन अमेसा पोस मनदकल. ओसो सीपय तना तलातुन राका कीयलाहि कचता टोपि मुचना लेह्कान, देवुळि माक पिसिह कीयनद पोल्लोतुन आसा कीकल. इवु (विस्वस, जीवा कीयनद, आसा कीयनद) माक ईकळताङ सबे आकाङ-दोकानाहि राका कीयनुङ.
9 नना इव पोल्लोन बाराह्क रासतन इतेके, सिक्सा ईयलाहि देवुळि माक निल्पिह केवो, मति मावा येसुसामि किर्स्तु मयेनाह्क डोलताह्कु, माक पिसिह कीयलाहि निल्पिह कीता.
10 मावा येसुसामि ओसो वायह्पा, माट जीवात मतेकाय, डोलिस मतेकाय, माट ओना संगे पिसना इनजोर ओग़ मयेनाह्क डोलिस मतोग़.
11 अदिनेनाह्क मीट इंजेके कीय्ह्निर अद्रमलेह्कान, ओर्विह्क-ओर्वोग़ दीरा ईम्ह्टु ओसो ओर्विह्क-ओर्वोना विस्वसतुन बेर्सिह कीम्ह्टु.
आक्रिताङ पोल्लोङ
12-13 मावोर विस्वसिरिर! मियगा उच्वुर कह्टेम कीसोर मीक सामिना अग़दे ताकिह कीस्तोर, अहे मीक सेतेमता अग़ तोहतह्तोर. ओरिन मान ईम्ह्टु. ओर अद्रमता सेवा कीयनाह्कु, ओरिन जीवा कीसि ओरिह्क पूरा कदर ईम्ह्टु. ओर्विना-ओर्वोग़ गूनमते मन्ह्टु इनजोर मीक अर्जि कीय्ह्नोम.
14 मावोर विस्वसिरिर! ओसो उंद पोल्लो वेहतह्नन: कबळतुह्क लंडालोरिन बुदि काग़्हाटु, आरेम आतोरा जीवातुह्क सितुर कीसीम्ह्टु, विस्वसते मेग़्कवोरिह्क तोळ ईम्ह्टु, सबेटोर मन्कलोरा संगे ओङ आयवा मन्ह्टु.
15 उसर मन्ह्टु, बोग़े बोना लाग्वाता बद्ला लाग्वाङ केमाटु. मति ओर्विह्क-ओर्वोग़ ओसो सबेटोर मन्कलोरिह्क वने बेसताङ कबस्क कीसीयलाह अग़ ऊळसोर मन्ह्टु.
16 अमेसा बेस गिर्दा आसोर मन्ह्टु.
17 दिनम पार्तना कीसोर मन्ह्टु.
18 मीक बाताल आतेकाय देवुळतुन जोहर कीम्ह्टु. मीट किर्स्तु येसुना मुडगा मनवालोरिर, अद्रमलेह्काने कीयना इनजोर देवुळता विचर मन्ह्ता.
19-20 देवुळि वेहनाह कीयनद कबुरतुन बोग़ाय वेहतेक तान पास्कमाट. पास्कतेके देवुळता जीवाता कबळतुन रोमिह कीतप आस्ता.
21 मति सबे पोल्लोङ देवुळतग्डाह मन्ह्ताङा, इलेङ इनजोर सेतेम पर्ह्किस ऊळाट. बेव सेतेम पोल्लोङ मन्ह्ताङ, अविस्किन पोस मन्ह्टु.
22 सबे रीतिनाङ लाग्वाङ पोल्लोनग्डाहि जेक मन्ह्टु.
23 सुकम ईयनद देवुळि मीक पूरा पवित्र कीयि; मीवा बुदतुन, मीवा जीवातुन, मीवा मेंदुलतुन पूरा राका कीयि; अस्के मावा येसुसामि किर्स्तु ओसो वायह्पा, मीट बेदे कसुरलेवा मनदकिर.
24 मीक केयतद देवुळि अद्रमलेह्काने मीक तासिह्ता, बाराह्क इतेके, ताना वेहतद पोल्लो अमेसा करलताये.
25 मावोर विस्वसिरिर! मयेनाह्क वने पार्तना कीम्ह्टु.
26 सबेटोर विस्वसिरिर ओर्विह्क-ओर्वोग़ जीवा वाटसोरे जोहर कीम्ह्टु.
27 इद सीटटुन अग्डोर सबेटोर विस्वसिर केंजनाह अर्वाटु इनजोर नना सामिना अदिकरते वेहतलाह आतन.
28 मावा येसुसामि किर्स्तुना देय्वा मियगा मनि.