4
देवुळतुह्क गिर्दा वायनद मनमुळि
1 मावोर विस्वसिरिर! नना इंजेके आक्रिताङ पोल्लोङ वेहतह्नन; देवुळतुह्क गिर्दा वानाह मनदना इनजोर मीक काग़्हच मतोम. अहे मीट मनदलाह आतिरे. मति इंका ओसो मीट अद्रमलेह्काने मुनेह वने बेर्ससोर अन्ह्ट इनजोर माट येसुसामिना पेदिरते मीक अर्ज कीयलाह आतोम.
2 येसुसामि माक अदिकर ईताह्कु, मीक बाताल-बाताल उकुम ईस मतोम, अदिन मीट पुतिर.
3 मीट पापमलेवा पवित्र आसोर दायना इनजोर देवुळता विचर मन्ह्ता. इतेके: साट्याल कबळताहि जेक मनदना;
4 पवित्रते मनजि, दुस्रोरा मुनेह मीट कदरलेवा मनदनद आयो इनजि, मीट ओर्वोग़-ओर्वोग़ मन्कल साट्याल बुदते ताकवा आपुना मेंदुलतुन आव्रे कीयना.
5 देवुळतुन पुनवोर लोकुर साट्याल विचर्कने ताकिह्तोर, अद्रमलेह्का मीट कीयनद आयो.
6 बोग़े तना तोळतोग़ विस्वसिना मुतेन कव्स मनजि मावोग़ विस्वसिय कोनि इनजोर ओना अडम पापम कीयनद आयो. इद्रमताङ कबस्क केवालोरिह्क सामि सिक्सा ईस्तोग़ इनजोर माट मीक अद्रम बेस्केन केमाट इनजोर मुनेन कळक पोल्लोते वेहच मतोम.
7 बाराह्क इतेके देवुळि माक पवित्रते मनदलाह केयता; साट्याल कबळ कीयलाह आयो.
8 अदिनेनाह्क इद पोल्लोतुन बोग़ पास्किह्तोग़, ओग़ मन्कन पास्कोग़, मति देवुळतुन पास्किह्तोग़, इतेके तना पवित्र जीवातुन मीवा जीवातगा उदिह कीस्ता, अद देवुळतुन पास्किह्तोग़.
9 इंजेके ओर्विह्क-ओर्वोग़ दादाल-तमिन लेह्का जीवा कीयनद पोल्लोतुन मीक रासलाहि गर्ज इले. ओर्विह्क-ओर्वोग़ जीवा कीम्ह्टु इनजोर देवुळि तनाय मीक काग़्हता.
10 मीवा मकिदुनिया पटटोर सबेटोर विस्वसिरिन मीट जीवा कीय्ह्निरे. मति मावोर विस्वसिरिर! इंका ओसो पका जीवा कीसोर मन्ह्टु इनजोर माट मीक वेहतलाह आतोम.
11 माट मीवा संगे मनदह्पा मीक उकुम ईतप लेह्कान, दुस्रोरिह्क तिपल एवा आपुना-आपुना कबळ-कामतुन ऊळाटु, लंडा आयवा कह्टेम कीम्ह्टु.
12 इद्रम मतेके मीवा ताकमुळ विस्वस केवोरिह्क विचर वानाह मनदग़ा, अहे मीट बोनाय पोग़ोन मोता आयविर.
डोलतोर विस्वसिर बेगा दास्तोर?
13 मावोरिर, मीट डोलतोर विस्वसिरेनाह्क आसा इलवोरा लेह्का दुकम आयनद आयो इनजि माट मीकु तेळियिह कीस वेहतह्नोम.
14 डोलतोर विस्वसिरा बह आस्ता इतेके, येसु डोलिसि जीवा अरतोग़ ओसो मल्स वायनोग़ इनजि माट विस्वस कीय्ह्नल. अद्रमे देवुळि डोलतोर विस्वसिरिन मेंदुल अग़्के जीवा अर्हचि ओरिन येसुना संगे देवुळदीपते ततग़ा.
15 माटु सामि वेहतद पोल्लोते मीक इद्रम वेहतह्नोम इतेके, येसु मल्स वायनस्के इद बूमते जीवात मनवालोर विस्वसिर, डोलतोर विस्वसिरा मुने देवुळदीपते अनोर.
16 अस्के येसुसामि देवुळदीपताहि इळ्न रेगनोग़, रेगतस्के बेरा लेङते उकुम ईयनदु, मोदुल देवतुलता आल्का, देवुळता अकुम ऊरनदु, इव सबे केंज वायनुङ. अस्के किर्स्तुन विस्वस कीस डोलतोर मुने जीवा अरयनुर.
17 ताना पयाये माट जीवात मनवालोरल ओरा संगे सामिन कलियलाह, मेंदुल अग़्के मोयुल पोग़ोन वळ्दे दाकल, इद्रमे माट अमेसा ओना संगे मनदकल.
18 इव पोल्लोङ वेहचि पया ओर्विह्क-ओर्वोग़ दीरा ईसोर मन्ह्टु.