44
Te Kora hani dabego asęani balia po me deli dao.
Te Israel dabego te Godigo augwali tau somainu hanalu wali
1 God, te dago wąį nǫų dabego te nago
polobadu bomai sę yali po te dabolo pusali,
te augwali tǫde bidali sogo.
Tama dena digi te po wabo odai dao.
2 Nago digi te Israel hani isąwai bage
te augwa tǫde sela sąnama,
tama nago te tǫ te da Israel bagego
wąį nǫų dabeba mani,
tama augwali tede bomo elalu bidali.
Nago te gasa hani dabego yali
dwai kolesaga wei ponani,
tiali goli nago te dena wąį nǫų dabe
te bugagia bidimainu elama,
tama hauwa umabo we bidi pedalumainu yai dao.
3 Te wąį nǫų dabego hwįani,
tiali goli augwaligo te tǫ te hwįnama me sabeo.
Te augwa digi augwa bomogo te hwįbo tau selama,
te boi bidi aiyaba me elalubeo.
Menio. Nago augwali wei mu yali,
tama tiyu, nage augwali dali bidiyu,
tama augwaliba ula mani.
Tama nago bomogo digi te boi bidi
aiyaba elaluai dao.
4 Nage eno king me eno God dao.
Nago po obaso, tama te Jekopgo hanigo
te boi hwįbode
te boi bidi dabe aiyaba elalubo dao.
5 Te nago bomogo naga dago
te boi bidi dabe sela sąyu ebo dao.
Mu tama, nage da dali bidiyu,
tama dago te da dali hwįbo bidi dabe
aiyaba elaluyu, sągągo agabo dao.
6 Eno enesigi me ene elalubao,
tiali goli eno homugo eno te hwįbode
te nai dabego ena tau sabo homu me ebeo.
Eno te bobobage bainat hwą elalubao,
tiali goli tego me ena te hwįbode tau me sogobeo.
7 Menio. Nago naga da tau sobaso,
tama te boi bidi dabego da aiyaba me elalubeo.
Te bidi dabego da wei me isąbadi,
tiali goli nago augwali dali hwįnama,
tama nago augwali aiyaba elaluai dao.
8 God, sesemane sogo dago nago nogi ugwaba sobao.
Tama dago nageba usu da weyu,
geda haluasa po sesemane sesemane sogo wabo da.
9 Tiali goli, megi da, magi yaliwe?
Nago da tudiba munama,
tama nago dago nogi aiyaba muani.
Tama nage te dago ami bidi dabe dali
te hwįboba me pabeo.
10 Nago tama tibaso,
tama da te boi bidi dabede wi sobadi,
tama augwaligo te dago doado bage salio.
11 Nago da te augwaligo ela muabo
kibu sipsip tiwai pedalumainu ilali.
Tama nago da te dena tǫde bidali sela sąbaso,
tama da tedela pelama, te gasa hani bage tomoba
bidigi pai dao.
12 Nago te naga we bidi te gasa haniba tagala palama,
tama nago augwalide dwasianu mone mu sai.
Nago te augwalide gasa ugwadu
daganobo profit mone me sabeo.
13 Nago dade te tiwai yali,
tama te da pąde bidali hanigo
te posobo po daba wali.
Te we bidi dabego dwai gisugu mayu,
tama dabolo hale ebo po wali.
14 Nago te hani bage dabe homu hodolubaso,
tama augwaligo dago nogide hale yabo po wabo dao.
Te daba pedalubo sęde augwaligo
dwai gisugu mabo sę ebao.
15-16 Te bidi dabego posobo po,
me dwai po enaba wali,
tama te boi bidigo me te bidi dabego
te dwai sę enaba wei ponobo eno suali.
Tama ena sesemane sogo homu sęgę
elalu, tama ena hale mu yai dao.
17 God, dago nage homu kone palubo
me gegeda palisiąyu,
tama dago nago dąų walali bomai po
te me sela sąyu ebeo.
Tiali goli, te sę dabe daba pedalubao.
18 Dago nage tudiba me musiąyu,
tama dago nago sunumi wali asobo me tagalubeo.
19 Tiali goli, nago da te uni hasa dabego
pesagede dolomainu ebao.
Tama nago da te be hulia sai dwai
madi mu te mesegelibo tiwai ebao.
20 Dago God, te dago nageba homu kone me isiąyu,
tama dago te tibo godiba
gedu haluasa po obaso da, teda nago koneaibao.
21 Nago te bidi dago haligade geme elalubo homu
te tigidali konea pai elalubo dao.
22 Dago te nage naga wali pobaso,
tama te tigidali sogo augwaligo da ela mubo dao.
Augwaligo homugo te da
ela muabo sipsip tiwai homu naga ebo dao.
23 Genuai Bidio, nage hodaluao.
Magi baso nage pila mubawe? Nage hodaluao.
Nago te sesemane sogo da tudiba mudamuo.
24 Magi baso nage dade geme duala sobawe?
Te bidi dabego da dwai mu ilama,
tama da te genuai sęgę mu tolobao.
Nago dago te sęgęde homu kone me gegeda paligio.
25 Da te tǫba tula munama,
tama dago tigi te isai bidigo tigi
pila mubo tiwai elalubao.
26 God, nage hogodama, te da tau sagasao.
Te nago da godolo ebo kolesaga te me elalua paibao.
Tama nago tede homu koneama, tama da ma sobaso da,
teda da me isigobeo.