43
Aga bulu taga pelama, digibulu bidibo bidigo gedu haluasa po wai
1 God, te bidi dabego nage tudiba muyu,
te augwaligo ena aiyaba elaluainu
homu ebao.
Nago ena tau selama,
tama augwaligo te dwai po wabo togolama,
tama augwaliba eno ebo
wiegi yai kolesaga naga ola mao.
Augwali te tibo po wabo bidi dabe da,
tama augwaligo kolesaga te dolo me isąwai.
Nago ena tau selama,
tama augwali nogode ena ma dobola sali.
2 Magi baso meni, nage naga, nage eno God da.
Ena nageba aselama,
tama te dwai bidi dabede geme duala sali.
Tialima, magi baso nago
ena homu ebo gegeda palubawe?
Magi baso te boi bidi dabego ena aiyaba elaluama,
tama ena haliga sęgę
dwai mu iduaibawe?
3 Nago te naga mu po ola toliyu,
tama nago ula me asiyu,
tama enabolo sunumi ola mobaso da,
teda ena te naga tedali bulu du dolo
te Saionba pelama digi,
tama te nage bidibo lotu be tempelba
paibao.
4 Tama tialima, ena te God, nago alta sai teba paibao.
Magi baso meni, nago ena wiegi yai
haliga iliyu, te pemene ilibo dao.
Nage eno God da, te eno gita selama, te musik weyu,
tama nago nogi ugwaba sabo tęąbi po naga waibao.
5 Magi baso ena haliga sęgę sesemane sogo elalubawe?
Magi baso eno haliga dwai midigi sobawe?
Eno konealubo homu Godiba dąų weyu,
tama te agai ena tau sabo tonalueibao.
Aga te eno God da, tama ena tau sabo dao.
Tama tiyu, eno aga nogi ugwaba ma saibao.