14
Kantri Judade tulubage meni yai dao
1 Genuai Bidigo te po te Jeremaiabolo tǫde te tulubage meni yani sogo te po mawai dao,
2 “Juda kantri tǫde te genuai sęgę elalu gela udali.
Te aga hanu dabe dwai mu elalubao.
Te aga we bidi dabe tǫ bulu pila munana peyu,
te dwai gela mu udubao.
Tama te Jerusalem dabe umagia gela u waibao.
3 Te genuai bidi dabe augwa sę ebo bidi dabe tagala
palama,
te ąį tugi pao wali.
Augwali te ulu wę dabeba pali, tiali goli ąį me elalubeo.
Tama augwa te sospen sene olo ma sela pai.
Te we bidi dabe augwa homu kone palali dwai mu ebaso,
te augwa hale ebaso, augwa gesabidi halua siyu yai
dao.
4 Te Juda tǫ kantride te tulubage munu me tulisąbadi,
te tǫ gebo pai tǫ pedelali.
Tama te gide nai bulubo hani dabe,
augwa haliga husugu dwai mu eyu,
te augwa gesabidi halua sali.
5 Te uni hasa dabe wai ame nani,
tiali goli, tuabo nosai meni yai.
Tibaso, augwa peyu, te wai dabe olo tede elalubadi
taga pali.
6 Te uni donki dabe te bulu dude dolalu,
te augwa homu hę obaso,
te bomonama mobo ma kekali,
te uni yowi dabego ebo tiwai yai.
Augwa te tuabo nosai meni baso,
te augwali gedu kimi isalio,”
Genuai Bidigo te po wali.
7 Te we bidi dabego gedu haluasa po weyu,
te tiwai wali, “Mu tamao, Genuai Bidi,
dago nage tudiba muyu,
te nago gedude dwai sę hauwa yali.
Tama dena te yali dwai sęgo dena ma po tų ilalio.
Tialima, Genuai Bidi, te naga genuai nogide digi
homu kone palama, te nago da hobede yao.
8 Sesemane sogo da Israelgo nageba konealubo homu
dąų weyu,
te nageba tonalu, te nago da tau somainu yali.
Te sęgę me sabo sogo, nago da ma siyu yai.
Tialima, megi da, magi baso te nago da konesiąbo
homu ebawe?
Magi baso nage te digibulu bidi asai bidi te da dali deli
pilama pabo tiwai yai dawe?
9 Magi baso nage te bidi tiwai, nage te homu umuna
sai bidi tiwai ebawe?
Magi baso nage te ami bidi te aga boi bidi aiyaba
elaluabo bomo meni yai tiwai elalubawe?
Tialima, menio. Genuai Bidi, nage da tomode bidibao.
Tama nago te da naga we bidi mu da olama,
dąį iliyu, sa muai.
Tama tialima, nago da me tagaligio,” wali.
10 Tialima, Genuai Bidigo te tiwai po wali,
“Te we bidi hani, augwa te wau bilabo homu godolo
ebao.
Te augwa bilibo bugagia me tonalubeo.
Tama tibaso, ena, Genuai Bidi, eno wiegi yai homu
pemene augwaliba me ebeo.
Megi da, eno augwa ebo dwai kolesagaba kone palama,
te eno augwaliba te tigi dene mabo sę yaibao,” wali.
11 Genuai Bidigo enabolo te tama po wali, “Jeremaia, nago te we bidi dabe bugagia bidimainu tau sao po me hanalugio,” po wali.
12 “Te augwaligo nai habu selama, enaba gedu haluasa po obadi goli, te tagalao, eno augwaligo i wabo munu me odogobeo. Te augwaligo sia ulama, tigidali dela pabo ofa ebadi goli, te tagalao, te wit ulubo ofa ebo me, eno te we bidi augwaliba wiegi yai pemene me egobeo. Menio. Te eno boi bidi dabe tagala palama, augwali elagasomainu yaibao. Te eno augwali nai menia somainu ilama, te augwali isaibao. Tama genuai gasi augwaliba pedalumainu elama, te augwali isila paibao. Tama tebo kolesagade te eno augwali silimainu yaibao,” wali.
13 Tialima, eno po wei ponoyu, te tiwai po wali, “Nago po te dolo obao. Tialima, God, Genuai Bidio, te profet dabego gasagi yai po te we bidi dabeba pusudu gebao. Augwaligo nago po e tiwai pusali, ‘Te boi bidi dabego dage me ela mugobeo. Te dage nai me menia sogobeo. Menio. Mu tama, ena Genuai Bidi, eno dage te tǫde sesemane sogo bugagia bidimainogo ebo dao,’ te profet dabego te po pusali,” eno te po wai.
14 Tama Genuai Bidigo enabolo te tiwai po wai, “Te profet bidi dabego eno nogide tibo po pusubao. Eno augwali me tagala palobeo, tama eno po augwaliba me mabeo. Te po profet dabego dageba pusali po, te tibo po augwa homude digi pusali. Augwa te po wali, augwa te nade subo tiwai yali po wali, tiali goli, augwa tibo po wai. Tama augwa te nai dabe pedelaibao po wali, tiali goli, augwa te tibo po pusubao homu yai dao.
15 Tama tialima, ena, Genuai Bidi, eno po dolo tama obao. Te profet dabego po eno nogide pusali goli, tialima eno augwali me tagala palobeo. Augwa te tama po wali, ‘Hwįbo me nasi ebo te tǫ kantriba me pedalugobeo,’ wai. Tialima, hwįbo me, nasi ebo me, te profet dabe augwaba digi pedelama, te augwa mu silaibao.
16 Tama te profet dabego po odali we bidi dabe, augwali me te hwįbogo me nasigo dolaibao. Tama boi bidi dabego te we bidi me wai puluba selama, te Jerusalem sunumiba sąsą paibao. Tama augwali tigi pubulabo bidi meni yaibao. Te Jerusalem dwai sę mu ebo we bidi dabe, tiyu te eno augwali mu dolaibao,” wai dao.
17 “Tama Jeremaia, eno homugo te nago naga po digi te we bidi dabeba pusao. Nago te tama po wao,
‘Ena Jeremaia, te ena gela umabo mu udubadi gęyu, te eno gedudu gela guwa gealudaibao. Eno te tebo kolesaga te ulade me, hulide me, tagalogobeo, magi baso meni, te boi bidi dabego eno we bidi dabe dwagilama mu eliyu, te we bidi hobedagia mu dolali.
18 Te ena hanu bulu badu bilibadi, eno te hwįnama elali bidi tigi dabe suali. Tama ena te hanu sunumi dabedu pobadi, eno te nai mu meni yai we bidi te augwa tigi dolali elalubo suali. Te pris me profet dabe olo bilibao, te augwa mena sę ebowe, te augwa me konesiąwai dao,’ nago te po pusao,” wali.
Jeremaiago Genuai Bidiba tulubage tagala palomainu hanalu wali
19 Genuai Bidi, nago te tǫ kantri Juda tudiba mu
muani da, agawe?
Te nago Saion hanu godolo homu mu meni ebawe?
Magi baso nago da dwagila mu elama,
te da usu ma yabo ąǫ isąbawe?
Dago homu te da bugagia bidaiba homu yali.
Tiali goli, te da bugagia me dugulalubeo.
Te dago homugo te da usu ma yabo sogo pedelaiba
homu yali,
tiali goli, te boi bidi dabe aselama,
te wi dwai mu ilibo sę ebo dao.
20 Genuai Bidio, mu tamao, dago dali,
te dena wąį nǫų dabego me, te nago
gedude dwai sę hauwa yali dao.
21 Tialima, nago te naga genuai nogide homu kone
palama,
te nago naga be homu koneao,
te naga wiegi yai king duabo sia sai tiwai elalubao,
tama te boi bidi dabego te be dolomainogo sula
tagaligio.
Tama nago te bomo yai po da dali dąų wali homu kone
palama,
tama naga te dąų wali bomo yai po boligio.
22 Te Godigo po odisąbo bidi dabego te dwai tibo
godigo te tulubage tulao obaso, usu yaiba, agawe?
Ma, te dagalu aga digi te tulubage da mobaso usu yaiba,
agawe? Mu menio.
Genuai Bidi, dena God, nagaduba deli te usu mu ebo
dao.
Tama tibaso, nago te tobage sę dabe yaibao,
tama tiyu, dago nage tonalu,
te nago da tau somainu ebo dao.