13
Jeremaia aga name ugwa selama, te po digi po begelama pusali
1 Genuai Bidigo Jeremaia enabolo te tiwai po pusali, “Nage pelama, te wiegi yai name ugwa me deli abeligi pelama, tama kukulu tiwai gudao. Tama nago te ugwa te ąįba munu me munamo dao,” wali.
2 Tialima, ena pelama, te name ugwa me deli abeligi pali, te Genuai Bidigo wali po gilama, te eno gudali.
3 Tialima, Genuai Bidigo enabolo e tiwai po ma wali,
4 “Nago te abelali name ugwa gudama, te nage hogodama, te bulu Peratba pelama, te ugwa te masigi dedageba geme dualigi pao,” wai dao.
5 Tialima, eno Genuai Bidigo po wali pali, te ena pelama, te bulu Peratba te name ugwa geme dualigi pelama, tama ma aselama, eno bulude bidali.
6 Hauwa sogo bidama, tialima Genuai Bidig o enabolo te tiwai po ma weyu, te po wali, “Nage hogodama, te bulu Peratba ma pelama, te ugwa ma sigi pao, eno nagebolo te po obaso nago dualigi pai dao.”
7 Tialima, ena te Peratba pelama, eno te ugwa dualali pesagede te digawani. Tama eno te ugwa selama suali, te dolai baso, te magi sę me yabo homu me ebeo.
8 Genuai Bidigo enabolo te tiwai po ma wali,
9 “Ena Genuai Bidi, eno te po obao. Te eno Juda dabe me Jerusalemgo hagoma ebo kolesaga aiyaba elalueibao, te augwa genuai nogi dolaibao, te name ugwa dolali tiwai yaibao.
10 Te dwai kolesaga ebo we bidi dabe, augwa olo pania selama, te eno po odobo hagela homu yali. Augwa hagoma eyu, augwa homu kolesaga wali pabo dao. Augwa tibo god wali peyu, te augwaliba lotu wabo dao. Te we bidi dabe dolaibao, te ugwa dolali tiwai elama, te bidi dabego agade magi sę me egobeo.
11 Hasia ena Genuai Bidi, eno te Israel hani me Juda hani enaba bomonama kęą pagasai elalu, te name ugwa bidigo tigide kukulu tiwai dąų olama bealubo tiwai yali. Eno tama tiali, te augwali eno we bidi hani bidiyu, te augwa eno nogi ugwaba siyu, te ena wiegi yai pemene eyu, te enaba genuai nogi momainogo yali. Tiali goli, augwaligo eno po odobo hagela homu yai dao,” wali.
Te Jerusalem dabe te tǫgo nigai sospen sene dolobo tiwai yaibao
12 Genuai Bidigo po ma weyu, te tiwai po wali, “Jeremaia, nago te Genuai Bidi eno po te Jerusalem dabeba pusao. ‘Ena Genuai Bidi, Israel duga God dao, eno te tama po obao. Te bidi dabego te wain tǫgo nigai sospen senede tabiaibao.’ Te Jerusalem dabego te po odama da, teda augwa te tiwai po nageba waibao, ‘Nago homugo dago te sę konebe da homu eyu oba, agawe?’
13 Tialima, nago te po augwaliba pusao, ‘Ena Genuai Bidi, eno te tiwai po walio,’ po wao. ‘Te dage tǫde we bidi tigidaliba wain mu pągąnaibao, te dage gęǫ page dwai mu yaibao. Te Devitgo king hani dabe, me te pris dabe, me profet dabe, me te Jerusalem we bidi tigidali badi, eno waingo pągąbo te tǫgo nigai sospen senede pągąwai tiwai gilama yaibao.
14 Tama te we bidi dabe eno dolama, te bidigo tǫgo nigali sospen sene manama elebaso, te tigidali alua paibao. Te tigidali we bidi dolaibao, te ida aya me, wai puluba dabe me, dolaibao. Eno olo mu tau sabo wiegi yai kolesaga eyu, hobede eyu, augwali gogoliyu, sula tagalama bidimainu me egobeo. Mu menio. Eno te augwali dolaibao.’ Ena Genuai Bidi, eno te po wai dao,” wali.
Godigo te Juda dabeba bomai sę dene ilaibao po wai
15 Dage Juda, Genuai Bidigo po dageba walio,
te dagego agai poba bugagia olo muiąo.
Dagego hagoma munu me elamu dao wali.
16 Dagego Godiba genuai nogi mao,
duga Genuai Bidi dao.
Tiyu, agai dagego bulu be huli elama,
te duga bulu duba bilibo sogo,
te dage tula muna muna paibao.
Te giliga dageba nanomainao homu godolo ebadi,
tialima, Genuai Bidigo te be posali ula hasegelama,
te dwai be hulia sai pedelaibao.
17 Tialima, te dagego po odisąma,
te dagego hagoma idubaso da,
teda te boi bidi dabego dage Genuai Bidigo we bidi
sagaselama,
te gasa tǫ kantriba kalabus mugi paibao.
Tama tibaso, ena Jeremaia, te enaduba bididu,
te dagede gela wedu gedubadi,
te eno gedude gela guai gealuama,
te eno gesabidiba dualibao wali.
18 Genuai Bidigo enabolo te tiwai po wali,
“Nage pelama, te king dali, aga idaba me, waligi pao,
‘Dage sigo te duga si dugulalubo sia king tagalao,
magi baso meni, te dage sigo kingo gudali madi
te olo nai tiwai pedelali,
te dage sigo tonalubo tǫ kantri dabe me tonalugio,’
wali.
19 ‘Augwaligo te taun dabe obo sunumi paliaibao,
te tǫ distrik Negev te Juda pedai te saut badu elaluai,
te augwali sunumi dayabo bidi meni yaibao.
Magi baso meni, te boi bidi dabego te tigidali Juda
selama,
te gasa tǫ kantriba kalabus sę igi paibao.’ ”
20 “Taun Jerusalem, nago gedu pedama,
tama te not badu pedai tagalama,
te nageba asobo bidi hani te nago tonao.
Te nago augwaliba wiegi yai pemene eyu,
te tonalubo we bidi augwali mena bidibawe?
21 Nago te naga abagi meba pedalumainu ebo sę dene
yali.
Tiali goli, nosali augwaligo nage aiyaba elaluama,
te nage tonalubaso, tama te sogo nago magi po
waibawe?
Te nage dene genuai saiba homu yaibao,
te wego wai ame nainu dene sabo tiwai yaibao.
22 Te nago te magi baso te dwai sę nageba pedalubo
te nago koneainogo homu ebaso da,
teda nago koneao,
te pedalubo te nago dwai sę yali wei ponoyu tebao.
Te naga yali dwai sęde naga nago ugwa
augwaligo peda sąnama,
te augwaligo nageba dwai sę yali.
23 Te husugu bidi augwa tigiwali hasegelama,
te mamamonu tigiwali hasegelaiba, agawe?
Ma, te uni husugu yai pusi te augwa tigi
dodobolo pali sela sąwaiba, agawe? Mu menio.
Te tiwai tama, te nago naga dwai kolesaga me
hasegelama,
te wiegi yai kolesaga wali painogo ebaso,
usu me egobeo.
24 Jerusalem, te eno nago we bidi dabe sela sąwaibao,
te waligo te wa pai pesage taga soyu, te witgo
hogomu sela sąyagasobo tiwai yaibao.
25 Ena Genuai Bidi, eno te sę dabe nageba
pedalumainogo dąį ilali, magi baso meni,
nago enaba konealubo homu tagalama,
te nago konealubo homu te tibo god dabeba
mubo dao.
26 Tialima, te ena digi nago gudalubo name ugwa
ugwaba dagala palama,
te naga gesabidi dualaibao.
Tama te bidi dabego nago ugwa olo elalu,
hale ebo sę sueibao.
27 Eno nago ebo kugumini yai kolesaga sualio.
Nago te tibo god dabe wali pabo sę bomonama eyu,
te augwaliba te bulu du dabeba lotu weyu,
me te kala pesage dabede lotu weyu ebao.
Nage te we me deli tiwai aga sali bidi mu tagalama,
te gasa bidi dabe dali pigi pelama,
te penani sę umabo mu yali.
Tama nage te so hosgo te omai hos dabeba bomonama
i wabo tiwai ebao.
Hobede muo, Jerusalem, nage te meda yai mu bididu,
te nage wiegi yai meda meni yai pedelabo homu
ebeo.
Nage te tiwai tama bidada pidubadi,
te mena sogoba usu naibawe?” te po wai dao.