Elifasgo sela wabo po pusali
22
(Dąį 22)
Ma, Jopgo homu begeligi sogo da, teda Godigo agade dwagi yai sę mu igi dao
1 Jopgo po ola silibo si, te Elifas hanu Teman bidigo po wei ponoyu, e tama wali,
2 “Da olo bidi dabego God tau sabo sę dabe ebo
usugowe?
Mu meni. Te koneai bidi dabe me usu egobeo.
3 Nago homugo nago doloba pai kolesagago
God Tigidali Bomo Elalubo Bidi agai yabo sę
tau saibawe?
Ma, nago dwagi yai kolesaga naga
eyu da, nago homugo tego Godibolo
dwagi yai ilaibawe? Mu meni.
4 Ma, nago homu nago Godiba lotu po weyu,
tama aga dologode bidibaso, agai nage sesanama,
nage po tų ela mani, nago te homu ebawe?
Te mu meni.
5 Jop, nago haniani dwai kolesaga mu yai dao,
tama silibeo.
Tama te po pagede naga God nage po tų te ela mobao,”
wali.
6 “Nago e tama kolesaga yai dao.
Nago naga abagi dabe negeli mani, tama augwaligo
nagebolo augwa doado bage meba osogo menama,
tonalumainu yali.
Ma, augwaligo te negeli sali dolo wei ponesiąbaso da,
teda nago te sali nai mu sobaso, usu yaibao.
Mebago nagebolo augwaligo ugwa nagebolo
te tiwai osogo mani.
Tiali goli, augwaligo te negeli wei ponai goli,
nago augwalibolo te ugwa wei ma masiąbaso da,
augwa tigi haluabo ugwa meni.
7 Bidi dabe augwaligo dogoni aloa sali,
tiali goli nago augwalibolo wę mawai menio.
Tama me nago augwali nasi ebadi,
nago augwali nai mabeo.
8 Nage genuai bidi, tama nage genuai nogi yali.
Nago tama tiyu yai nago homugo tigidali
sę nagaduba homugo yaibao wali.
Tama nago gasa bidi dabego tǫ dage dali sai dao.
9 Me te we sibi augwa bidi isai baso, augwali aselama,
nagebolo augwali tau sao obadi,
nago augwali tau sabeo. Menio.
Nago augwali sela sąbaso, augwali pai dao.
Tama tiyu yaide,
augwaligo wai puluba dabe me
dwagi yai tau me siyu, tama bugagia bidibeo.
10 Nago te kolesaga dabe yai dao.
Tama tiyu, megi da, nage tola selama,
nage dolabo nai dabego nage bobegela selama,
dolabo nai polo aselama, tama nage wi ilibao.
11 Te hulia sai tiwaigo nage mesegelama,
tama nago nai dabe me sugobeo.
Me te dene mabo sę hauwa nageba pedelai dao,
te wę genuaigo nage te mesega sali tiwai dao,” wali.
12 “Jop, suao, te hǫ dabe tigidali ugwanu mu elalubao.
Tiali goli, God te dagalude bidiyu,
aga te hǫ dabe edelama, ugwadu mu bidibao.
13-14 Eno homugo tego nago homu kolesaga
hodaluama, nago e tama po wabo dao,
‘Godigo mena nai dabe koneaniwe?
Aga dagalude ugwadu mu bilibo dao,
tama moni pǫgo aga mesega sali,
tama moni hulia saligo aga mesega sali.
Tama agai da subeo.
Agai dago kolesaga mena tama dagalogowe?’
nago te po wabo dao,”
Elifasgo te po wai.
15 “Tiali goli, Jop, nago mena tama tialiwe?
Nago tigidali dwai sunumidu painu bomo genuai ebawe?
Te da, te dwai kolesaga ebo bidi dabego
wali pabo tų dao.
16 Augwali monu dabe isąbo sogo,
deli sogo tama Godigo augwali silali dao.
Augwali te be me te genuai wę sesegede elaluai,
te wę asiyu, te be dolama, masigi dali,
ni nami dali si, te węgo tolasa pabo tiwai yali.
17 Te bidi dabe augwaligo Godibolo e tama wali,
‘Nago da tagalama, naga pa,’ me ma augwaligo
e tama wali,
‘God Tigidali Bomo Elalubo Bidigo dade
magi sę mu ebo usugowe?’
18 Tiali goli, augwaligo konebe,
Godigo digi augwalibolo
te dwagi yai nai mawai da homu ebe.
Tama tibaso, eno olo te dwai bidi dabego poba
olo munama,
augwaligo homu kolesaga wali me pogobeo.
19 Te doloba pai bidi dabego Godigo
dwai bidi dabe tigide dene ilibo suali,
tama augwali tede
dwagi yai homu pemene ebo dao.
Tama dwai kolesaga magi naide
meni yai bidi dabe da, augwaligo
te dwai bidi dabe kęnę po wabo dao.
20 Augwaligo e tama wabo dao, ‘Dwagi yai mu da,
te dago boi bidi dabe polo dolai yabo.
Tama isigo augwaligo dwagi dwagi yai nai
dela pela silalio,’ te po wabo.”
Elifasgo te po wali.
21 “Megi da, Jop, odao.
Megi nago God dali po dodolama,
tama dedeli homu yao.
Ma, naga tama tiyu da, teda agai nage usu ma ilama,
tama nage bugagia ma bidaibao.
22 Nago agai nage mawainu ebo
kolesaga po nago tigidali sao.
Tama agai po nago homude bugagia mu muao.
23 Nage God Tigidali Bomo Elalubo Bidiba
ma asiyu da, teda agai nago sęgę sela sąna silama,
tama nage bugagia ma bidaibao.
Tama nago te dwai kolesaga tudi ola menama,
tama nage te tobage kolesagade digibulu bidao.
24 Te nago dwagi yai gol masigi tigidali
te dwai madi sąna silao, tama tiyu da, usu yaibao.
25 Tama nago God agai nago homude
te dwagi yai gol dali,
silva dali si hasegelainu yao.
26 Nago tama tiyu da, teda nago dwagi yai homu
genuai mu te God Tigidali Bomo Elalubo Bidigo
nage bugagia te sę yali pode yaibao.
Tama nage aga dali haliga tegaluama, dua bidaibao.
27 Tama nago agaba gedu haluasa po olama,
tama agai nago gedu haluasa po wabo odama,
tama nago hanalubo nai dabe nage mawaibao.
Tama naga Godide dąų wali po
wali peyu, dwagi yai homu elama,
te dąų walali po usu naibao.
28 Tama nago sę me yainu homu dąų wali sę dabe da,
te da Godigo nago te sę emainu sula tagalama,
dwagi yai pedalomainu sula tagalaibao.
Tama Godigo nage bidibo page bugagia mu ilaibao.
29 Nago koneani.
Godigo augwa nogi ugwaba sabo bidi aiyaba
elalubo dao.
Me ma, agai te augwa digi aiyaba
elalubo we bidi ugwaba sabo dao,
tama augwali bugagia bidibo dao.
30 Tama Godigo gedude nage doloba pai bidi bidibaso,
agai dwai sę ebo we bidi me
hobede eyu, tama augwali ma saibao.
Augwali hagagobeo.”
Elifasgo te po wali.