Jopgo Sofargo po wei ponobo po wali
21
(Dąį 21)
Dwai bidi dabe augwali bugagia bidibo po
1 Tama te Jopgo po wei ponoyu, e tama wali.
2 “Eno homugo dagego olo bugagia
eno po waboba munama, odao.
Tama dagego tama tiyu da,
teda dagego eno homu dwagi yai bidimainu ilaibao.
3 Eno po bolo omainu sula tagaliyu bolo yao.
Tama eno po wala silibo si, tama da,
Sofar, nago ena posobo po ma waganio.
4 Tiali goli, odao. Eno bidi dabede po elalubowe?
Mu menio. Eno Godide po elalubo.
Tama tibaso, eno haliga dene mu ebao,
agai eno po wei ponisą ebo pode.
5 Dagego ena bugagia tonaluao.
Tama dage noma selama, hodaluyu yaide,
duga nogo gąųgo halua naibao.
6 Eno te dwai nai dabe enaba pedalaliba homu
ebo sogo da,
ena wi genuai mu elama, noma genuai mu
sabo dao,” wali.
7 “Magi baso Godigo dwai kolesaga ebo bidi dabe
sula tagalama, tama augwali bugagia bidama,
augwali monu dabe ebo da, agawe?
Tama magi baso agai augwali genuai nogi selama,
nai dabe hauwa elalumainu sula tagalaliwe?
8 Te bidi dabe augwa wai puluba dali
wąį wai puluba dali si bidibo.
Tama augwali bidiyu, augwa
te wai puluba genuai ebo subo.
9 Te dwai kolesaga ebo bidigo
we wai dabe bugagia augwa bede bidibo.
Tama magi nai mego augwali wi me ilibe,
tama Godigo augwali dene me ilibe.
10 Augwa bulmakau kibu omaigo so kibu tabi ilama,
tama augwa wai dwagi yai saganama, me isibeo.
11 Te bidi dabe augwaligo wai puluba
hauwa mu bidibo,
augwa sipsip kibu namba tiwai bidibo.
Tama augwa te wai puluba tęąbi subigila
ola bilimainu sula tagalobo.
12 Bidi dabego gita dali, temborin dali,
ona dabe tama eliyu, dwagi yai hwą mu wabo.
Tama te wai dabego dwagi yai homu ebo tęąbi wabo.
13 Tigidali sogo dwai bidi dabe augwali
bugagia bidiyu ebo.
Tama augwali isilama,
isibo bidi dabego buluba painu ebo si da,
augwali gasi elama, dene me eyu ebe,” wali.
14 “Te dwai kolesaga ebo bidi dabe bidibadi,
augwaligo Godibolo e tama wabo dao,
‘Nago da taga palama, naga pao,’ wabo dao.
‘Dago nago po odama, wali pogobeo,’ wabo.
15 Me ma, augwaligo e tama wabo,
‘God te Tigidali Bomo Elalubo, te dewe?’ wabo,
‘dago magi baso agaba lotu po weyu,
aga dologode elaluaibawe?
Tama dago ma agaba gedu haluasa po weyu da,
dago mena dwagi yai nai saibawe?’
Augwaligo te tobage po wabo dao.
16 Te bidi dabe augwali bugagia bidiyu,
nai dabe hauwa mu sabo dao.
Tiali goli, te nai dabe augwa bomogo naga
te nai sabo menio.
Tama tibaso, eno te dwai bidi dabeba olo munama,
augwaligo po wali, me kolesaga wali pogobeo,”
Jopgo te po wali.
17 “Eno suali, Godigo dwai bidi dabe
hauwa sogo isilibo menio.
Tama hauwa sogo God dwai sogo augwaliba munama,
tama augwali dene sabo menio.
Tama Godigo te bage dali sębę ebo sogo da,
te hauwa sogo augwalibolo dene mabo meni.
18 Eno suali, Godigo hauwa sogo augwali
te bomai waligo sasi nosai sela sąbo ąǫ ebo menio.
19 Bidi dabego te po wabo dao,
‘Godigo dwai sę ebo bidigo wai dabe dolobo dao,’
wali,
‘augwa ayago dwai sęgę wei ponoyu.’
Tiali goli, eno homugo te kolesaga dolo meni.
Teda Godigo te dwai bidi dabe augwa tigide digi
te dene maiabo goli da, teda augwaligo koneaibao,
Godigo augwa dwai sę dolo ponobo dao.
20 Awe, augwa digi sulama, dene
konemainu te Godigo sębę,
te God Tigidali Bomo Page Bidi.
21 Tama augwali te isibo bidi dabego
buluba bidigi pabo si da,
augwaligo augwa we wai puluba
mena tama bidibo olama, kone me egobeo,”
Jopgo te po wali.
22 “Te ensel sibigo da edelalio.
Tiali goli, Godigo augwaligo kolesaga osola subo dao.
Tama tibaso, dego God ola mabo usu yaiba,
te mena kolesaga dwagi yai dabe emainu. Bidi meni.
23-24 Eno sulama, we bidi me badu
augwa bidibode dwagi yai bugagia bidibo suali,
te dǫgai hauwa yai hasa tiwai dao.
Augwali gasi me isąma, sęgę me isąma, tama bidama,
augwa isibo bodoluba sabalobo si tama isiyu ebo.
25 Tama me badu we bidi bugagia bidibo meni.
Te we bidi dabe augwa
bidibo ula hagede kone palama, ha ebo dao.
Augwali dwagi yai homu godolo isiąbadi,
tama augwali isiboba usu nagasobo dao.
26 Tiali goli, tigidali we bidi isiyu naga ebo dao.
Tama augwali tigidali gų pagede deli madi kigilama,
pila muyu, da tiwai si naga ebo dao.
Tama te osogane dabe augwali tigide pągąbo dao,” wali.
27 “Eno polo koneani, dagego homu dabe.
Dagego ena aiyaba elaluabo homu naga te ebao.
28 Dagego te po wali,
‘Te dwai dwai sę dabe te genuai bidi dabe
te dwai kolesaga ebo bidi tigide pedalobo dao,’
po wali.
‘Tama augwaligo be dabe sese dolobo dao.
Tama bidi dabego augwali ma subo menio.’
Dagego te po wali.
29 Tiali goli, eno homugo dagego iba peyu,
eda soayu ebo bidi dabebolo
po hanalube yali pogo te gasa bulu taga solama,
pabo bidi dabebolote dwai sę ebo bidi dabede mena
tama tibo dawe po hanalubeo.
30 Mu tama. Augwaligo dagebolo e tama waibao.
Te God sębę elama, tama dwai sę pedalumainogo elama,
tama we bidi hani deli pesage badu dolainu da,
teda agai te dwai kolesaga ebo we bidi
dolobo menio.
Menio. Augwali bugagia bidimainu sula tagalobo dao.
31 Tama tibaso, dego dwai kolesaga ebo
bidi dabe po tų ela mawaibawe?
Bidi mego augwali po tų ela maiabo menio.
Tama augwaligo dwai kolesaga wei ponainogo
augwali tigide dene ilabo bidi menio.
32-33 Tama te dwai bidi dabe
isibo sogo da, we bidi hauwa mu sisinagasobo dao,
bidigo augwali nedebo usugobeo
Tama augwaligo agai tigi sela pelama,
gų pageba pubaligi pabo dao.
Tama bidi me badugo augwaligo gų page
bugagia tonalubo dao.
Tama dwai bidi dabe gų pagede bugagia pila mubo dao.
34 Eno te tobage kolesaga
te dwai sę yali bidi dabede pedalobo subaso,
eno te homu ebao, dage ili po olama,
gani bole ebo bidi dabe dao.
Dagego homugo te dagego enabolo pogo
eno haliga dili ilimainu ebawe? Te bage?
Hobede ebo.
Te po dabego ena deli me tau sabeo,”
Jopgo te aga abagi selabolo te po wai.