4
1 Te Jesús ni cunuú Espíritu Santo ini yā, te ni quenda ya yūte Jordán cuahān yā. Te ni jinū yā nde nuū ñúhun téhé ní sáha Espíritu Santo.
2 Te ni ine ya yūcuan úū xico quɨvɨ̄, te ni jito ndee jexeén yā, chi cúní jeē sáha ya cuēchi. Te tāca quɨ́vɨ̄ ún tu ní yéji cuɨtɨ yā, te ná ni yāha quɨvɨ̄ ún, te jíí yā sōco.
3 Yūcuán na te ni cahān jexeén un jíín yá:
Núu máá ró cúu Sēhe Yaā Dios, te cahān rō jeē yuū yáha na ndúu staā caji rō, achí.
4 Te ni cahān Jesús jiín:
Tuú chi yósó núū tútu iī: Nasūu máni máá jíín stáā cátecu ñayuu, chi suni jíín táca jnúhun cáhán Yaā Dios, achí yá.
5 Yūcuán na te cuahān jexeén un jíín yá nde xinī ɨɨn yucu súcún, te ɨɨn núnúu‑ni ni steén nuū yā tācá nación nɨɨ́ cáhnu ñayɨ̄vɨ́.
6 Te ni cahān jiín yá:
Nuū maá ró cuāha ri jeē cujéhnu ró núū ndɨvii nación yáha, chi yōhyo luu cáa. Chi máá rí jnɨ́ɨ ndɨhɨ, te cuu cuāha ri nuū ndé ɨɨn cúní rī.
7 Núu súcuan te núu cuɨñɨ yɨ́tɨ́ ró chiñúhún ró ruhū, te cuāha ndɨhɨ ri nuū rō. Achí jexeén.
8 Te ni cahān Jesús jiín:
Satanás, cujiyo quihīn rō, chi yósó núū tútu jeē chiñúhún ñayuu maá Jítoho i Yaā Dios, te nuū maá‑ni ya cuajníñu i. Achí yá.
9 Yūcuán na te cuahān jexeén un jíín yá nde ñuu Jerusalén. Te ni jeni ya xinī torre templo. Te ni cahān jiín yá:
Te núu Sēhe Yaā Dios cúu ró, te sɨ́ngava ró máá ró nde nuū ñúhun, chi jnama ya rohó.
10 Chi yósó núū tútu:
Tejníñu ya ndajéhé yā quijicoo coto róhó.
11 Te cunundee yā rohó jíjnáhan ya,
návāha ma cáchihi ró jéhē rō nuū yuú.
Achí tutu. Achí jexeén.
12 Te ni cahān Jesús:
Tuú chi suni yósó núū tútu jeē ma cóto ndee ñayuu Jitoho i Yaā Dios, núu jnama ya i chí tuú, áchí yá.
13 Te tuá ni níhín jexeén modo coto ndee Jesús quɨvɨ̄ ún, te ni cujiyo cuahān jecu‑ni tiempo.
Jeē ní quejéé Jesús nácani ya jnūhun región Galilea
(Mt. 4.12‑17; Mr. 1.14‑15)
14 Te ni cunuú fuerza Espíritu Santo ini Jesús, te cuanuhun yā Galilea. Te nɨ́ɨ́ región yajni yūcuan ní jitē núu jnūhun ya.
15 Te ni steén yā jnūhun ini tācá vehe iī sinagoga, te ndɨhɨ ñayuu ni cajejnúhún i ya.
Jeē cuánuhun yā ñuu Nazaret
(Mt. 13.53‑58; Mr. 6.1‑6)
16 Te ni najinū yā ñuu Nazaret nuū ní jehnu ya. Te quɨvɨ̄ ndétātú ni quɨ̄vɨ ya ini vehe iī sinagoga, nájnūhun sáha sáha ya. Te ni ndocuɨñɨ̄ yā jeē cahu ya tutu iī.
17 Te ni cajēhe de tutu ni tee Isaías, tēe ni nacani jnūhun Yaā Dios nde jenahán. Te ni nune ya tutu ún, te ni nanihīn yā nuū yosó jnúhun ni cahu ya:
18 Espíritu maá Jítoho yō Yaā Dios iyó yá jiín rí,
chi ni tejníñu ya ruhū jeē nácani ri jnūhun vāha nuū ñáyuu ndahú.
Te ni tají yá ruhū vēji ri jiín jnúhun jeē ndúvāha ni ñayuu cácucuíhyá ni.
Te castūhun rí nuū ñáyuu cáyɨhɨ ndaha jexeén jeē coo libre i.
Te sáha ri jeē ndúndijin ini anuá ñayuu tu cájecūhun ni,
te jnama ri ñayuu jeē cándoho i sáha jnáhan i.
19 Te nacani ri jnūhun jeē ní quee tiempo jeē sáha Jitoho yō Yaā Dios jeē váha ñayuu.
Achí tutu ni cahu ya.
20 Te ni nacasɨ yā tutu ún, te ni nacuāha ya nuū tée jéjníñu ini sinagoga, te ni nucōo ya jeē steén yā jnūhun nuū ñáyuu cáhīin ini sinagoga. Te tācá i cájito vāha i nuū yā.
21 Te ni quejéé yá cahán yā jiín i:
Vijna te ni squícu jnūhun cáhán tutu iī yāha ní cajini sōho ró, áchí yá.
22 Te ndɨvii i ni cacahān jeē váha tēe cúu ya, te cánaa ni i jeē ní cajini i tāca jnúhun luu ni cahān yā. Te ni cacajnūhun jnáhan i:
¿A násūu séhe José cúu tēe yáha?
23 Te ni cahān yā jiín i:
Jíní vāha ri jeē cájeni ni rō cahān rō jnūhun yátá yáha jíín rí: Tēe tájná, sátájná ró maá ró núu súcuan. Te jnūhun yáha cúní cahān jeē nájnūhun ni nasávāha ri cuehē ñayuu cácuhū ini ñuu Capernaum ni canihīn rō jnūhun, suni súcuan na sáha ri ñuu yō yāhá návāha candíje ró cájeni ni rō. Achí yá jiín i.
24 Te ni cahān gā yā:
Jendaá cahán rī jiín ró, ni ɨɨn tēe nácani jnūhun Yaā Dios, tu cájetáhú ñayuu ñuu maá de nuū de.
25 Te suni jendaá cahán rī jiín ró jeē ni íyo cuehē ñahan ní ndóo ndáhú ini nación yō Israel, tiempo ni cotecu Elías, tēe ni nacani jnūhun Yaā Dios. Te tiempo un tu ní cúun cuɨtɨ saū unī cuiyā yosáva, te ni īyo ɨɨn jnamā xeēn nɨɨ́ cáhnu nación.
26 Te tu ní tájí Yaā Dios Elías quihīn de nuū ni ɨɨn ñahan viuda nación yō Israel, chi nuū máá ɨɨn‑ni ñahan viuda jeē ndeé ñuu Sarepta ndañúū Sidón, ni jehēn de ni jito de jeē ní yeji ña.
27 Te ini nación yō Israel suni ni īyo cuehē tēe ni candoho cuehyɨ̄ stehyú, tiempo jeē ní cotecu Eliseo, tēe ni nacani jnūhun Yaā Dios. Te ni ɨɨn de tu ní cándíje jeē ndúvāha de sáha Eliseo, chi sa suhva máñúhún‑ni Naamán, tēe nación Siria ni nduvāha. Achí yá.
28 Yūcuán na te tāca ñáyuu cáhīin ini sinagoga, yōhyo ni caquɨtɨ̄ ni i jnūhun ní cahān yā.
29 Te ni candocuɨñɨ̄ i, te ni caquenehen i ya yatā ñúū ún, cuahān i jíín yá xinī yúcu íne ñuu ún, chi cácuni i chundahá i ya nɨnga ya cava ún.
30 Te tu ní cúu sáha i, chi ni yāha‑ni ya mēhñú i cuahān yā.
Jeē ní quenehen ya tachī ini ɨɨn tēe
(Mr. 1.21‑28)
31 Yūcuán na te cuahān Jesús ñuu Capernaum región Galilea. Te quɨvɨ̄ ndétātu ní steén yā jnūhun nuū ñáyuu.
32 Te ni canaa ni i cájini i jnūhun stéén yā. Chi ni steén vāha ya nuū i, chi jíní vāha máá yá.
33 Te ini vehe sinagoga un íne ɨɨn tēe jeē ñúhun tachī xeén ini de. Te tēe un ní cana cóhó de:
34 Cujiyo ní. ¿Naun vēji ní núū na jíjnáhan ná, Jesús ñuu Nazaret? ¿A véji ní jéē snáā ni sáña, chí naún? Je jíní na ndé ɨɨn cúu ní, chi Sēhe iī Yaā Dios cúu ní. Achí de.
35 Te Jesús ni cahān xeēn yā nuū tachī ún:
Casɨ yuhu ró te quenda ró ini tēe yáha, áchí yá.
Te ni cotúú‑ni tēe un núū tāca ñáyuu, ni sáha tachī ún. Te ni quenda ini de cuahān, te tú na vé ni sáha ga jiín de.
36 Te ndɨhɨ ñayuu un ní cayūhú i, te ni cacahān i jíín jnáhan i:
¿Na jnūhun cúu yāha jéē ní cuu súcuan? Chi cújéhnu tēe yáha jéē ndácu nīhin de jniñu nuū tachí, te quéndacoo‑ni, áchí i.
37 Te jnūhun ya ni jitē núu cuahān nɨɨ́ cáhnu región yūcuán.
Jeē ní nasávāha ya naná chīsó Simón Pedro
(Mt. 8.14‑15; Mr. 1.29‑31)
38 Yūcuán na te ni quenda Jesús ini vehe iī sinagoga, te cuahān yā te ni jinū yā vehe Simón. Te náná chīsó Simón, yɨ́hɨ xeēn quīji ña, te ni cacahān ndahú de jíín yá jehē ña.
39 Te ni jīta ndeyɨ ya nuū ña, te ni cahān yā jeē na ndíco quīji ún. Te ni nduvāha‑ni ña. Te ni ndocuɨñɨ̄‑ni ña, te ni sáha ña jeē ní yeji yā jiín de.
Jeē ní nasávāha ya cuehē ñayuu
(Mt. 8.16‑17; Mr. 1.32‑34)
40 Te jeē ni quée niāndii, te tāca ñáyuu jeē iyó jnáhan i cácuhū ndɨnuū cuehyɨ̄, ni caquindeca i jnáhan i un núū yā. Te ni soó yá ndaha ya sɨquɨ̄ ɨɨn ɨɨn i, te súcuan ni nasávāha ya i.
41 Te suni cuehē ñayuu ni quendacoo tachī ini i, te cácana cóhó táchī ún:
Máá ní cúu Sēhe Yaā Dios, achí.
Te ni cahān xeēn yā nuū, te tu ní jéhe ya jnūhun jeē cahán gā súcuan, chi cájini jeē maá yá cúu Cristo, Yaā ní tají Yaā Dios.
Jeē ní nacani ya jnūhun región Galilea
(Mr. 1.35‑39)
42 Te nuū ní cundijin, te ni quenda ya cuahān sɨ́ɨn ya yatā ñúū nuū tú ñayuu. Te tāca ñáyuu cánanducú i ya, te ni jinūcoo i nuū íne ya. Te cástétu i ya jeē tú cujiyo ya nuū i.
43 Te ni cahān yā jiín i:
Suni cánuú jéē nacani ri jnūhun vāha nuū tāca gá ñuu sɨquɨ̄ ndese ndácu Yaā Dios jniñu, chi jeē yúcuan ní tají yá ruhū vēji ri. Achí yá.
44 Te ni jica cuu ya nɨɨ́ región Galilea, nácani ya jnūhun ini tācá vehe iī sinagoga.
Jeē ní canihīn de cuehē chācá ni sáha ya
(Mt. 4.18‑22; Mr. 1.16‑20)