3
አዝን ባጋኔ ማቺ ባጋ
1 ማካ፥ ማችታዮ፥ ይ አዝንታይስ አዛዝንቶይታ። የይ ጋርክ ፐታይ ፐታይ ጾስ ቃላ አማኖዝታ ማቅኮካ ፋ ማችታይ ሀና ብኢ ቃላ ኦደካዝን አማኖዳይስ ዳንዳእዛ።
2 አማኖዳይስ ዳንዳእዛይ ያሻትꬃራኔ ይ ጌሽ የሳ ብኢ።
3 ይ፥ ይ ኦማ ዳꬃራኔ ዎርቀ ኣꬆር ዎይ ሎኦ ማኦር ቡቁርንቶር ይ አሲ ቤዞር ማቅፐ።
4 ዝን ይ ዎዝናይ ጋንጨ የዝ የገልሳትꬃይ ጾስ ቲና ይንትስ ጋመ አልኦ ማቂ ꬋቦዋ፥ አሽከኔ ዳጭ ጌዝ አያና ማቆ።
5 ጾሲ እንጎድ ጌዛና አማኔዝ ጌሽ ማችታይ ብኒ ዎደ ፋ አዝንታይስ ሃርንቲ፥ ፋና የይ ጋርክ ኡሳ ሎእꬄዛ።
6 የይ ጋርክ ሳራ አፍራመና፥ «ታ ጎዳዮ» ዬጊ ጼግታር፥ ኤስ ኪትንቴዛ፤ አኮካ ያሽተካር ሎኦ ባዝ ኦꬅኮ ይንትካ እ ናእታ።
7 አዝንታዮ፥ ይ ማችታይ ይንትፕ ዳቡራ መꬎ ማቄዛና ኤሪ፥ ኡንታን ቦንቾይታ፤ ይ ዎሳ ꬉባማይ ጋርክ ጾሲ እንጌዝ ደኦ ኡንቲ ይንታር ዎላ ላትዛ ግሾስ ኡንታን ቦንቾይታ።
ሎኦ ኦሶር መቶ ኤኮ
8 Ꮊንፕ ጉየ፥ ኡቢታይ ፐቲ ቆፋር የዞይታ። Ꮊንክታይ መታይ ይንታን ሄሌዛይ ጋርክ ኡዶይታ፥ እሸትꬅ ሲቆር ዎል ሲቆይታ፤ ማ ፐታይ ፐታይስ ኬህታኔ አሽክታ ማቆይታ።
9 ኢታ ግሾስ ኢታ ዎይ ጫሽ ግሾስ ጫዢ ማህፓተ፤ የያ አሺ፥ ጾሲ ይንትስ አንጆ እንጎዳይስ ይንታን ጼጌዝ ግሾስ አንጆይታ።
10 አብስ ጊኮ፥ ጌሻ ማጻፋይ፥
«ደኦ ዶስዛይኔ ሎኦ ጋላስታ በአዳይስ ኮይዝ ኦና ማቅኮካ ፋ እንጻርሳ ኢታባዝኔ መተርሻ ዎርዶ ኦድንትዛና ካዮ።
11 ኢታ ባዛፕ ሃኮ ሎኦ ባዝ ኦꬆ፤
ሳሮትꬅካ ኮዮኔ ካሎ።
12 ጎዳይ ኣፍታይ ጽልታ ብእዛ፤
ኤ ሀይታይካ ኡባ ዎደ ኡ ዎሳ ስኦዳይስ ዶይንቲ የዛ።
ዝን ጎዳይ ኢታ ባዝ ኦꬅዝታ ፋ ሸነ ኣፈር ብእዛ»
ዬግዛ።
13 ይ ሎኦ ባዝ ኦꬆዳይስ አሞትኮ ይንታን ካዮዳይ ኦኖ?
14 ሀራ አቶዝን፥ ጽሎትꬅ ግሾስ ይ ዋይንትኮ አንጅንቴዝታ። አስስ ያሽቲፓተኔ ህርግፓተ።
15 ክርስቶሳና ይ ዎዝናፕ ቦንቾይታኔ ጎድ ማሆይታ። ይንትስ እንጌዝ ኡፋይሳ ኦይጭዝ ኦስካ ማህꬅ እንጎዳይስ ኡባ ዎደ ጊጊ በቶይታ፥ ዝን የያ ሃዮትꬃራኔ ያሻር ኡዶይታ።
16 ማ ክርስቶሳር ይ የዝ ሎኦ የሳ ኢታ ባዝ ኦꬄዛይ ጋርክ፥ ይንታን ጫዥዛ አሳይኔ ሀዎዝዝታይ ዬላቶዳይ ጋርክ ይ ካሃይ ጌሽ ማቆ።
17 ጾስ ሸነ ማቅኮ ኢታ ባዝ ኦꬂ ዋየ ኤክዛይፕ ሎኦ ባዝ ኦꬂ ዋየ ኤክዛይ ሎኦ።
18 ክርስቶሳ ኑና ጾስኮ ሺሾዳይስ ፋ ኡባስ ጌሽ ማቂ የዛር፥ ናጋራንችታይስ ኡቢታይስ ላማማይስ ፐቲ ቶኬ ናጋራ ግሾስ Ꮊይቄዛ፤ ኤ ፋ አሰትꬃይር Ꮊይቄዛር፥ ዝን አያናር ፓꬅ።
19 ማ የ አያናይር ኤ Ꮊንጊ አች ካራ የዝ ሸምፕታይስ ቃላ ኦዴዛ።
20 ኖሄ ማርካበ ኬጾዳር የ ሸምፕታይ ጾስስ ኪትንታም እጼዛ፥ ዝን ጾስ ኡንታን ዳንዳኤዛ። ሆስፑን አስ ኣዳ ማርካበ ገሊ፥ ፕርዳ ሃꬃፕ አቴዛ።
21 የ ፕርዳ ሃꬃይ Ꮊት ይንታን አሽዛ ጽንቃተ ኣዝሶ ማቄዛ። Ꮊ ጽንቃታይ ጋላ ቅታ ሜጮ ባዝን ሎኦ ካሃር ጾስ ቲና ቃላ ገሎ፥ ክርስቶሳ ደንዶ ባጋር ይንታን አሽዛ።
22 ኤ ሳሎ Ꮊንጊ ጾስ ኡሻቻ በቴዛ፥ ኪታንችታይ፥ ማዉተ አድታኔ ዎልቃምታ ሃርዛ።