2
ደኦ ሹችኔ ዶርንቴዝ ዎያ
1 ይኬ ኢታትꬅ ኡባ፥ ዶሻ ኡባ፥ ጩቦትꬅ ቅናተኔ ዝግርስ ኡባ ይንትፕ ሃሶይታ።
2-3 ጎዳይ ኬሃ ማቄዛና ይ ኤሬዛይ ጋርክ Ꮊት የልንቴዝ ጽቃ ናእታይ ጋርክ ይ አቶትꬃር ድጮዳይስ ገነ ባ ቃላ ማስ ኡባ ዎደ አሞቶይታ።
4 አሳር ቦርንቲ ጾሳር ዶርንቴዝ ቦንቾ ማቄዝ ሹች፥ ጎዳ የሱሳኮ ሺቆይታ።
5 ይ ደኦ ሹችታ ማቂ፥ የሱስ ክርስቶሳ ባጋር ጾስ ኡፋይስዛ አያና ያርሾ ያርሽዛ ጌሽ ቄስታ ማቆዳይ ጋርክ አያና ኬꬅ ማቂ ኬጽንቶይታ።
6 ጌሻ ማጻፋይድ፥
«ዬዛኮ፥ ታኒ ጽዮነ ካታማ ኬꬃ ሙመር ቶኪ አይክዝ ክርክሮ ጋርክ፥
ዶርንቴዝ፥ ቦንቾ ሹች ጋዶዳ፤
ኤዛ አማንዛ ኦንካ የሻ ዬላታሚ»
ዬግዛ።
7 Ꮊ ሹቻይ ይንትስ አማንዝታይስ ቦንቾ፥ ዝን አማኖዋዝታይስ፥
«ግምቢዝታይ ለቂ እጼዝ ሹቻይ
ኬꬃ ሙመር ቶኪ አይክዝ ክርክሮ ጋርክ፥
ኡባይፕ ኣꬊዝ ሹች ማቄዛ።»
8 ማካ፥
«Ꮊ ሹቻይ አስ ꬉቢዛ ሹችኔ አስ ፖክስዝ ዛላ»
ዬግዛ። ኡንቲ የይስ ቃድንቴዝ ግሾስ ጾስ ቃላ ኪትንታም እጺ ꬉብንቴዛ።
9 ዝን ጾሲ ꬉማፕ ማላልስዛ ፋ ፖአይኮ ይንታን ጼጌዛይ፥ ይ ኤ ሎኦትꬃ ሀርታይስ ኦዶዳይስ ዶርንቴዝ ኮች፥ ካት ቄሰ፥ ጌሻ የለትꬅኔ ጾስ ዱማ ዎያ።
10 ይ ቲና ጾስ ዎያ ባያ፥ ዝን Ꮊት ይ ኤ ዎያ። ይ ቲና ማሮትꬅ ደንገካዝታ፥ ዝን Ꮊት ማሮትꬅ ደንጌዛ።
ጾስ አይለ ጋርክ የስ
11 ታ እሹንꬆ፥ ይ Ꮊ ሳአ እማꬅኔ በተ አስ ማቄዛይ ጋርክ ይ ሸምፖ ኦልዛ አሾ አሞፕ ሃኮድ ጋርክ ታኒ ይንታን ዎስዛ።
12 አማኖዋ አሳይ ይንታን ኢታ ኦꬅዝ አስ ጋርክ ዝግርኮ ጾሲ ኑና በአዳይስ ይእዛ ጋላስ፥ ኡንቲ ይ ሎኦ ኦሳ ብኢ ጾስ ጋላቶዳይ ጋርክ ይንትስ ሎኦ ደኦ የዞ።
13 ጎዳይ ግሾስ ግ ማዉተር የዝ አሳይስ ሃርንቶይታ፤ ኡባይፕ አፋ ማቄዝ ግሾስ ካታይስካ ሞድንቶይታ።
14 ኡንቲ ኢታ ኦꬅዝታ ሴሮዳይስኔ ሎኦ ኦꬅዝታ ሳቦዳይስ ካታይፕ ኪትንቴዝ ግሾስ ጋደ አቅዝታይስ ሃርንቶይታ።
15 ይ፥ ይ ሎኦ ኦሶር ኤሮዋ ቦዞ አሳይ ናሻ ዶና አይꬆዳይ ጾስ ሸነ።
16 ጾስ አይለ ማቂ ዋሎ የዞይታፕ አትን ይ ዋሎትꬃ ኢታ ኦሶስ ካመ ኡድፓተ።
17 አስ ኡባ ቦንቾይታ፤ አማንዛ አሳ ሲቆይታ፤ ጾስስ ያሽቶይታ፤ ካት ቦንቾይታ።
ክርስቶሳ ዋያይስ ኣዝሶ
18 አይሉንꬆ፥ ሎኦ ጎድታይስኔ ኬሃ ጎድታይስ ኣዳ ባዝን ኢትታይስካ ቦንቾር ሃርንቶይታ።
19 አሲ ጾስ ግሾስ ግ ቤዞዋ ዋየ ኤክኮ ጾሲ ኤዛ አንጆዳ።
20 ዝን ይ ናጋራ ኦꬅን ይንታን Ꮊꬍን ይ ዳንዳእኮ ይንትስ አባ ጋላታ የኔ? ዝን ሎኦ ባዝ ኡዲ ዋየ ዳንዳእኮ ጾሲ ይንታን የይስ አንጆዳ።
21 ጾሲ ይንታን ጼጌዛይ የይ ግሾስ፤ ክርስቶሳ ይንትስ ዋይንቴዛ፤ ይ ኤዛ ካሎዳይ ጋርክ፥ ይንትስ ኣዝሶ ማቄዛ።
22 ኤ ናጋራ ኦꬄካያ፤ ኤ ዶናይዳካ ጩቦትꬅ በንተካያ።
23 ኡንቲ ኤዛ ጫዥዝን ኤ ማሂ ጫዠካያ። ዝን ዋየ ኤክታር ጽሎ ፕርድዛ ጾሳይስ ፋ ፕርዳ አሺ አሸነፕ አትን ማንደካያ።
24 ኑኒ ናጋራስ Ꮊይቂ ጽሎትꬅስ የዞዳይ ጋርክ ክርስቶሳ ፋ አሻይድ ኑ ናጋራ ማዝቃለል አፋ ቶኬዛ፤ ይ ኤ ማዶꬃይር ፓጼዛ።
25 ብኒ ይ ኦገ ባሊ ላልንቲ ꬋቤዝ ዱር ጋርከ፥ ዝን Ꮊት ይ ሸምፖ ሄንግዛይኮኔ ናግዛይኮ ማቄዛ።