9
Danyel Sabunganoa
1 Niani mugamugangama Serksis garanoa Darias sok xaitamoxi mana Babilon. Lipu Midiam.
2 Niani mugamugangama wa xaitamoxi, baing nga, Danyel, ngatiti Urana Xuana mana haruangua Toxoratamona sina na lipuxing suxunguxunguama Yeremaya, baing ngabagu ngaxabia ba Yerusalem bagula doa matabu niani 70.
3 Binabu ngaxusunga haringina Toxoratamona Urana ba hauliam, ngasabusabu, ngasaha mana angingua, ngasau imang usingangamdi saing ngarung hayatia.
4 Ngasabu na Toxoratamona Urana ngayua, ngatula ba,
“O Toxoratamona, ung Urana yaya sabanggam, am gahixi mana haringingama! Bungingbunginalo usu mana haruangua uhau ba. Bungingbunginalo murum sibuna mana adi muruding sibuna maung xaung disu mana hanaunaungamdi.
5 Am galibu kubolu diandi. Am galibu doa. Am galibu kuboluadi dimaring te, saing dudumam maung. Am gayamu hanaungaungamdi xaung tubatubaingamdi.
6 Am galungu lipuxim oxatamdi te, lipu suxunguxungamdi naga, adi dibaxanga harungama na xaitamoximamdi, yanamimamdi, mugangamamdi xaung lipu ganangamam longgalo.
7 “Toxoratamona, ung gulibu kubolu maringina, ning am ba, memaya kaukauam longgalo—Yudadi, Yerusalemgamdi, maxuna Isrel longgalo, adi duwa haxek xaung adi duwa hasoya, adi duwa mana titiadi uxudi mala manadi ba. Namua na am gayamung. Urana ung sabanga bagula ulibu kubolu maringina.
8 O Toxoratamona, memaya kaukauam gagabu xaitamoximamdi xaung yanamamdi xaung mugangamamdi, namua na am galibu kubolu diana maung.
9 Ning Toxoratamona Urana amia lipu usingam xaung lipua yunga kubolu diandi, heku dudumam mana.
10 Am galungu Toxoratamona Urana amia haruanganoa te, namua na am gasu mana hanaunaungandi sinadi nam mana lipuxing oxatamdi haruangadinga, lipuxing suxunguxunguamdi baing.
11 Am Isrel longgalo am gadali hanaunaungama xaung am gayamung, hauxamam ba am galungu haruangama.
“Binabu hatata guxam diandi xaung suxuyanga haringindi duwa mana Urana lipuxing oxatama Moses hanaunaungandi, axadi ba dimatu ding mari mam, namua na am galibu kubolu diandi.
12 Ubalam gabu yanamamdi haringina ba bagula usina salak sabanga na Yerusalem dali salak longgalo longgadi daxap hawa sabalunia, baing ulibu maringina bila uharua ba.
13 Bila Moses bung hanaunaungania, hanggalangianga longga li daxapkam. Ne hauxamam mana am gayamu kubolumam diandi xaung am gasu mana haruangam maxunama, bu ung Toxoratamona Urana amia usungam xaung uyaha mam.
14 Binabu mana namua am gasu mana haruanganoa te, bing Toxoratamona libu hanggalangiangua xauxau ba xapkam. Namua na Toxoratamona Urana amia libu maringina bungina libu axadi bagudi li.
15 “O Toxoratamona Urana amia, oxop lipuximdi masok sangua Isip xaung rimam haringing sibuna, oxop yaya sabanga bila ba. Ning am galibu kubolu diandi, am galibu doa.
16 Toxoratamona, long sabangga Yerusalem ungia, saing wa mana xaxagama. Adi duwa haxek mam didaudau Yerusalem xaung am lipuximdi namua na am galibu kubolu diandi xaung mugangamamdi dilibu doa. Ning hatata am gaxusungaung ba atim saliandi disup, namua na kubolum longgalo dimaring.
17 “O Toxoratamona Urana amia, ulungu nga lipuxim oxatama sabungagua! Ulungu xusungungagu haringina. Ngabo ba lipudi dahatumia yam sabanga, binabu ulibu xai mana Numama dahanggaliangia ba.
18 O Urana ngayua, uta tangamliana saing ulungu nga. Ubaguti ubagu mauxangamamdi, xaung mauxanganoa xap long sabangga yama wa mana ba. Am gaxusungaung mana namua ung lipu usingangam sibuna, ne mana namua am kubolumam maringindi tegu.
19 O Toxoratamona, ulungu! O Toxoratamona uyunga kubolumam diandi! O Toxoratamona ubaguam saing uhauliam! O Urana ngayua, yama wa mana long sabangga ungia xaung mana lipuximdi, binabu labu uhalisiu tai, bu lipudi daxabia ba yama sabanga!”
70 7
20 Ngaharuauyu ngasabuyu, ngatula kubolugu diandi xaung bakbagigu Isreldi kuboluding diandi, ngaxusuxunga Toxoratamona Urana ngayua ba hamaringia Numanoa xaxagania.
21 Ngasabu mua, baing lipua Gebirel menau ngabagu mana axamana bila mibingua ba, oti ma sap rangua nga bila bungina hananianga bungbunggam.
22 Baxanga nanga ba, “Danyel, hatata ngama bu ngasina hatuminga xaunga xabianga naung.
23 Bungina ungguti usabu, baing hata sibuna li ngaxap ulek tela. Baing hatata ngasok la li bu ngabaxanga ulega ba naung, namua na Urana atina maung. Binabu ulungu xai bu uxabia axamana bila mibingua namuxinoa.
24 “Urana hau hatuminganoa mana bakbagimdi xaung long sabangga inia Yerusalem, ba 70 xipxibua niani 7 sanga mana sahi dududingdi xaung kuboluding diandi, bagula sisia kuboludingdi, bagula xap kubolu maringing bungingbunginaloamdi dima, bagula libu axamandi bila mibingadi lipu suxunguxunguamdi dibagu ba aningoding, xaung bagula mogu Yabang Maringing Sibuna muli.
25 “Ulungu oxop xabiangua to: Bagula 7 xipxibua niani 7 disup kimuya mana ulega tabina ba dahamaringia ditongtongia Yerusalem muli laing xaitamoxi tela Urana mogu bagula sok. Bagula ditongtongia xaung daxangadi xaung milaga wagagia, saing bagula li sanga mana 62 xipxibua niani 7, ne bagula bungina mauxanganama.
26 62 xipxibua niani 7 disup, baing bagula dung lipua Urana mogu saing ina bagula xola. Xaitamoxia ma yu ba, bagula lipuxindi dahanggalangia long sabangga xaung Urana Numanoa. Subingua bagula ma bila silinga sabanga: Haungingua bagula ila ila laing subingua. Bagula axamandi didoa bila Urana tabina.
27 Xaitamoxia ba bagula hau haruanga haringina rangua lipu xumana sanga mana niani 7. Ne liwe mana bungina baguba, bagula bili hananiangadi xaung yahangadi disina na Urana. Baing bagula ta axamang maxuwangam hanggalangiangam etua mana Urana Numang uranganoa, saing bagula wa la ba laing lipu hanggalangiangama xap doa bila Urana tabina ba.