10
Danyel Bagu Lipu Tela Mibingia
1 Niani tuwa Sairas wa xaitamoxi mana Pesia, Danyel (yan tela Beltesasa) xap ulega tela. Ulega ba maxuna, saing harua mana haunginga sabanga. Ulega xabianganoa Danyel xap mana axamang tela bila mibingua.
2 Mana bungina baguba, nga Danyel nga siniagu sanga mana Sande tuwa.
3 Ngaxang anginga dauyana te, ngaxang mututungana te, xaung nganung wain te. Ngata guxenga mana toxologudi xaung ramramogua te sanga mana Sande tuwadi ba.
4 Xaidap 24 mana sobak mugamugangama, baing ngali lang sabangga Taigris rubinia.
5 Baing ngabagu lipu tela maxagia, sau imang sigixingang xai sibuna xaung goxi waxu ditongtongia mana gol mana longga Upas wagigia ulenia.
6 Sangganoa bila siang siniana beril, ramramonoa bila bilikbiliga, maxandi bila nagungdi luliandi, rimandi kindi bila bras sigixingang sibuna sina, saing waxungtuanoa bila buranga dibibi.
7 Nga Danyel, nga ganigu ngabagu axa baguli bila mibingua. Lipuadi duwa rangua nga dibagu te, ning maxuwanga buk xapdi saing diluki mala dihisa.
8 Binabu ngawa olang, saing nga ganigu ngabagu axa sabanga baguli bila mibingua. Haringingagu sup manga, ramramogua usa sibuna, saing sanggagudi dimalai sibuna.
9 Baing ngalungu harua, saing bungina ngalungu haruangang saunganoa, ngamakmatia ngakinu matabu, ramramogua wa titia.
10 Hata sibuna li lipu tela rimanoa tuxu nga saing iti nga mesa laing ngali rimagu kigu tuxundi, ne ngaluluyu.
11 Harua nanga ba, “Danyel, Urana atina maung. Umesa ulungu haruangua bagula ngabaxanga naung, namua na soxi nga naung.” Harua bila ba nanga masup, baing ngamesa ne ngaluluyu.
12 Baing harua nanga ba, “Danyel, labu umaxuwau tai, Urana lungu sabungama muga mana xaidap mugamugangama bungina ungguti utuba ba oxop xabianga mana ulega xaung utatuaung Urana ungia maxania. Lungung saing soxi nga ma.
13 Ne yongga Pesia yanama soxauti nga sanga mana xaidap 21. Ning Urana uleginamdi yanamiding tela Maikel ma bu hauli nga, namua na ngagasi rangua yongga Pesia xaitamoxinoa la ba.
14 Ngama ba ngahauliung uxabia axamandi bagula diosk mana bakbagimdi mana xaidap subingandi. Namua na axamana bila mibinga ba mogu xaidapdi dima kimu.”
15 Bungina harua nanga bila ba, ngaturu ngaxugia ramramogua mari titia saing suxungugua mumguti.
16 Hata sibuna li tela bagunganoa bila lipu tela ringring badugudi. Baing ngaxaxa suxungugua saing ngaungguti ba ngaharua. Ngaharua na lipua li maxagia ba, “O lipuxigu sabanga, salaga xap nga namua na ngabagu axamana bila mibingua ba, saing sanggagudi dimalai sibuna.
17 Nga lipuxim oxatama ngaharua ranguaung baru? Haringingagua sup, saing ngamakasa sibuna ba ngayaga.”
18 Tauna ina bagunganoa bila lipu tela ringring nga muli saing haringia nga.
19 Bang harua nanga ba, “Urana atina maung lipu. Labu umaxuwau tai. Gamoma wa mosiu. Uwa haringina xaung uli haringina.”
Bungina harua nanga, ngaxap haringinga saing ngaharua ba, “Lipu sabanga, uharua. namua na uharingia nga.”
20-21 Baing harua ba, “Uxabia namua ngama ranguaung? Ngama bu ngabaxanga naung haruangadi dibungdi mana Xailong Haruanga Maxunama. Ning hatata bing ngagoxoya mala ba ngahaunggana yongga Pesia yanaminoa. Sup, baing bagula yongga Grik yanaminoa sok. Bakbagim yanaminoa Maikel bagula hauli nga, ning tela muli hauli nga te.”