14
Esus tantiaquido utsibo bëdamboen isaid
1 Nuquibëdtan Esus tantiatsëcquidon nuqui nacpadomboen nainquio icsho bëdamboen isnuna. Ambi chiaidquio chuiquin Esus tantiaquidon natetedi Nuquin Papan uesquin chiabi iquec. —Naden nac bëdambo iquec. Naden nac icsambo iquec —quequin uesquin chiabi iquec. Aden Nuquin Papan chiacmaid chiec nuquibëdtan Esus tantiatsëcquido: —Ëmbi natemaid nec —queshobi: —Icsamboen chiec —cainquio icnuna.
2 Esus tantiaquidquio: —Pete abitedi pambidbëdta pesho Nuquin Papan nëishënenquio iquec —quenubien Esus tantiatsëcquid: —Padi. Pambid pesho isun Nuquin Papan nëishënushe. Esus tantiaquidën nitsinaid pequid. Pambid isuidquid —quepec.
3 Pambid pequidobëdtan pambid isuidquidombi Esus tantiasho Nuquin Papan aid daëdi bëdamboen isec. Padnuen pambidbëdta pete utsi abitedi pequidën pambid isuidquid mamënshunac icsambo ictsiash. Adembidi pambid isuidquidën: —Pambid pequid icsambo iquec —cac icsambo ictsiash.
4 ¿Icbonpenquioda: —Yua icsambo iquec —capadic? Icbombien adoquid. Adembidi: —Mibi bëdambo iquec —caquid icbon. Nuquibëdtan Esus tantiaquid Nuquin Icbon yua icsho: —Ëmbi nacpadomboen nainquio yec mibi icsambo iquec —cainquio icnuna. —Nëid icsambo iquec. Nëid bëdambo iquec —quequin Nuquin Icbo Esusën ambentsëqui abi tantiaquido chiendac. Aidën namiacpadomboen abi tantiaquidon bëdamboen naindac.
5 Esus tantiaquido utsi-utsiec: —Aid badiadquidënuidtsëqui Esus tantiec cuëdënac bëdambo ictsiash —quenubien utsibo: —Badiadquidën badiadquidënquiec Nuquin Papa Esusbëdta tantiec cuëdënebi —quecuededpec. Adquid daëd icsho Nuquin Papan nëishënenquio iquec. Esus tantiaquid ambi tantiacpadënquiobi cuëdënac bëdambo ictsiash.
6 Aden Esus tantiaquin nac bëdambo ictsiash. Adembidi Esus tantiaquin: —Mimbi pete uaid bëdambo iqueque. Aid penu, Papa —quequin pambid pequido iquendac. Utsibombic adembidi Nuquin Icbo tantiaquin: —Mimbi pete uaid bëdambo iqueque. Aid penu —queshun utsi pequimbi pambid isuidquid iquendac.
7 ¿Esus tantiaquid ambi naid-uidi naquidta nedic? Padenquio. ¿Ambi tantiacpadën unësquidta nedic? Padenquio.
8 Nuquin Icbo Esusën chiacpadomboen natiadquio yec nuqui tabadec. Ambi tantiacpadën nuqui unësendac. Unësabi yec tabadec Esusën yuambo icboedi unësash adecbidi aton yuambo nuqui iquendac.
9 Adec Nuquin Icbo icnuec abided cuidadec unësash Esus uincuempanëdash. Unësabi yec nuqui tabadnuc Nuquin Icbombo icboedi nuqui unësan adecbidi Nuquin Icbombo iquendac.
10 —Adquid Nuquin Icbo iquec —quesho ¿tantiashunda nuquibëdtan Esus tantiaquid mamënshuntiad? Padenquio. ¿Nuquin Papan chiacmaid chiec: —Ëmbi nacpadomboenuidi nainquio yec icsambo iquec —quequinda chushcatiad? Padenquio. Nuquin Icbo Esusbëdtan Nuquin Papanuidtsëqui matsesën naidtedi chiendac. —Nëid bëdambo iquec. Utsi icsambo iquec —quequin chiendac matses abitedishun tantianubi.
11 Adote chuiquin Nuquin Papan ambi chiaid naden dada uamepampic.
“Tantia. Abimbo caimbique.
Naden matses abitedishun ëbi chiendac.
‘Abitedishun Icbombo mibi nec.
Bëdamboshë icquidquio mibi nec.
Abitedishun naid tantiaquid icquin mimbiuidtsëqui: Nëid icsambo iquec. Nëidien bëdambo iquec, quequin abimbo chiendac,’ quequin matses abitedishun ëbi chiendac,”
quequin Nuquin Papan dada uamepampic.
12 Aden ambi cuidte ushën Nuquin Papan: —¿Enda? ¿Mitsipadec tabado? —cabanac nuquitedishun nuqui naidtedi chuibanendac.
Utsibo icsamenquio icnuna, quiaid
13 Ëbi adsho tantiashun Nuquin Papan: —Adoenda —quequin chiacmaid nuqui tantiaid chienquio icnuna. —Ëmbimbo natemaid naic aido icsambo iquec —nuquibëdtan Esus tantiaquido cainquio icnuna. Adenquio icquin nadonona. —Ëmbi ambi natemaid nasho isash chieshtoshon Esus tantienquio yanushe. Ambi natemaid naquin ismenquio iquembi —queshun Esus tantiaquidtedi bëdamboen isnuna.
14 Nuquin Icbo Esuquidistu tantiaquidquio icquin ëmbien naden tantiec. —Nëbi Nuquin Papan: “Petemaid nec,” caid nibëdec —quequin tantiembi. Ëbi adnubi utsibo: —Petemaidquio nec. Aid pec icsamane. Aid petiapimbo iquebi —queshumbi adquid pec: —Icsachitobi —quetsiash.
15 Adsho tantiashun aido bëdamboen tantiaquin ambi petemaid nuqui pemenquio ictsiac. Ambi petemaid pemequin mimbi aido tantienquio iquec. —Ëmbi petemaid piash icsachitobi —quequin Esus tantienquio yanushe. Ambi petemaid pemenda. —Nëid petemaid nec —quequido aidotsen tantiaquin cuidmenquio icnuec abided cuidadec Esus unësaque. Aido tantiata.
16 —Nuquin Papan chiaid niaquenquio icquin Esus tantiaquido utsibon: “Aden naic icsatsiash,” caid naimbi. Ëmbi tantiacpadomboen naimbi —queshun mimbi tantiacpadomboen naquin utsibo icsamboen chuimenda. —Is. Esus tantiaquid icsambo iqueque. Ëmbi natemaid naique —camenda.
17 ¿—Nadquid petemaid nec. Nadquid actemaid nec —quequin petebëdta acteuidi tantiecta Nuquin Papan chiacpadec Esus tantiaquido bëdamboec tabadpatsiash? Padenquio. Aton Mayan nuquibëdi tabadmiac chieshëmënenquio yec cuishonquec Esus tantiaquido bëdamboec tabadendac.
18 Adec Esuquidistun chiacpadec tabadsho isun Nuquin Papan: —Bëdambo iquec —caindac. Matsesëntsen: —Aido bëdambo iquec —caindac.
19 Ëmbi chiacpadec chieshëmënenquio yec bëdamboec isnanuna. —Esus tantiec chieshtoenquio yec bëdamboec tabadnuna —quec chuinanuna.
20 —Nuquin Papan bëdamboen isaidon Nuquin Papa Esusbëdta tantienquio yanushe —queshun utsibon petemaid pequin aido chieshtomenda. Nuquin Papan: —Matsesën petemaid nec —caid nëbi nibëdnubi Esus tantiatsëcquidën petemaid pequin aid chieshtomec mibi icsatsiac.
21 —Ëbëdtan Esus tantiaquido icsamemane —queshun ambi petemaid pambid penquio icquinc ambi actemaid acte paëmbo icquid aquenquio icquinc ambi natemaid utsi nainquio icquinc cac bëdambo ictsiash.
22 Nuquin Papan: —Matsesën natemaid nec —cacmaid tantiaquin: —Ëmbimbo petequid nec. Ëmbimbo actequid nec. Ëmbimbo natequid nec. Aden nasho Nuquin Papan ëbi cuidenquio iquec —quequin mimbi tantiaid caic: —Natemaid nec —quequido naden chienda. —Ëmbi nacpadomboen nainquio yec mibi icsambo iquec —cainda. Adembidi aidon: —Ëmbi natemaid nec —caboed naquin ismenda. Chieshtonoshe.
23 Adquid ambi: —Aid pesho Nuquin Papan nëishënchitembini ictsiash —caboed piash —Icsachitobi —quetsiash. Adsho Nuquin Papantsen: —Ai, adec icsaic —catsiash. —Aden naic icsachitequini ictsiac —nuqui caidtedi naic nuqui icsatsiac.