13
Chuiquid dapan chiacpadomboen Esus tantiaquidën naquid
1 Aton matses chuiquid dapan chiacpadomboen Esus tantiaquidën naquid. Adembidi aton nidaid pais caidën tabadquidotedi chuiquid dapabon chiacpadomboen naquid. —Nuquin Papan adquid chuiquid dapa icmiabi yac nibëdtsiash. Nuquin Papan chuiquid dapa icmiaidien aido nec —queshun aidon chiacpadomboen naquid Esus tantiaquidën.
2 Nuquin Papan chuiquid dapa icmiaidën chiaid niacquid Nuquin Papan chiaidbidi niacquid nec. Aden ambi chiaid niacacsho chuiquidon cuidquid.
3 Bëdamboec tabadquidon chuiquid dapan cuidte dacuëdëntiapimbo iquec. Adquido cuidenquio icquin ambi chiaid niacquid chuiquid dapan cuidquid. Chuiquid dapa cuidmetiapimbo yec bëdamboec tabadta. Adsho isun: —Mibi bëdamboec tabadec —catsiash chuiquid dapabon.
4 —Ma matses bëdamboec tabadnu —quequin Nuquin Papan chuiquid dapa icmiaidën mibi bëdamboen tabadmetiadquio iquec. Nuquin Papan icmiac icsambo icquido cuidquid nec. Adquid icnuc: —Icsasho chuiquid dapan ëbi cuidpanundac —quiash icsaquid dacuëdendac.
5 Ëbi adsho tantiashun chuiquid dapabon chiacpadomboen nanuna. —Cuidnushe —queshun adonona. —Pabiate cuembo icquin Nuquin Papan chiacpadomboen natiadquio iquebi —queshun adonona.
6 Bëdamboen tabadmenuen Nuquin Papan chuiquid dapa icmiaidon: —Ëmbi chiacpadomboen nata —cac naquid Esus tantiaquidën.
7 Aden chuiquid dapan chiacpadomboen nanuna. Aid bëdamboen isnuna. Aidën: —Nata —cac nanuna chieshenquio icquin.
Utsibo tantiaquionona, quiaid
8 —Ëmbi nashumbocpadomboen ëbi cuidquin nashunenquio iquec —camenda. Abi nashunquidobëd cuidnanquid Esus tantiaquid. Esus tantiaquidbidi bëdamboec tantiananquid. Adec bëdamboec tantiananquin Nuquin Papan Moises chiampicpadomboen nuqui bëdamboen natsiac.
9 “Ambi naiduidtsëqui nainquio yec abibi datantiadacbimboec ma matses bëdamboec isnanu,” quequin Nuquin Papan Moises naden dada uamepampic. “Min chidopenquio chudenda. Adembidi min bënëpenquio chudmenda chidon. Cuesunenda. Ampenda. Utsin na isash: ‘Adquid con na nibëdosh,’ quec chieshëmënec tabadenda,” quequin Nuquin Papan con tsusedpa Moises dada uamepampic. Aidën chiacpadomboen natiadquio icquin nuquibi datantiadacbimboen utsibotsen tantiaquionona.
10 Utsibo bëdamboen isquin aido icsa uatiapimbo nuqui ictsiac. Aden utsibo bëdamboen tantiasho Nuquin Papan: —Aden naic ëmbi Moises chiacpadec bëdamboec tabadec —caindac.
11 —Nëbien abi tantiaquido abi yacno buanuec Esus chochitec —quequin Nuquin Papan chiacpadomboen nanuna. Ushacbimboen nainquio icboedi nëbi ushash isucunacbimboec dayacquio yec chieshtoenquio icquin Nuquin Papan chiacpadomboen nanuna. Esus tantiabenash: —Yuecashien Esus choec —quiondaidi:
12 —Nëbien Esus chochitec —quedonetsëcquiec bëdamboec tabadnuna. —Satanasën yuanushe —queshun Esus tantiaquin nuqui icsaid ënshun bëdamboen nanuna.
13 Icsainquio yec: —Bëdambo iquebique. Ma isnu —quiash bëdamboec tabadnuna. Tantiadenuen actequid paëmbo icquid aquenquio icquinc utsin chido chudenquio icquinc utsin bënë chudmenquio icquinc chido utsi mëismenquio icquinc canuna. Adecbidi utsin na isash: —Con na adquid nibëdec —quiash chieshëmënec tabadenquio icnuna. Adembidi utsin mibi bunaid nasho isash: —Aden ëbi namenquio icpec —quec chieshëmënenquio icnuna. Icsainquio yec bëdamboec tabadnuna.
14 —Icsate bunchitebi. ¿Mitsipaden naiquini icsape? —quenquio yec Esus tantiaquiec abi tabadacpadquiec bëdamboec tabadnuna. Nuqui icsate bunaid ënquionona.