88
Ampù te Ed-antus
1 Nengazen, iyan ka Megbevayà he menluluwas ku.
Ed-umawen ku sikew te maandew wey mezukilem.
2 Pemineǥa nu is ampù ku;
tevaka nu is kebuyù ku te tavang.
3 Su mahabet he menge kelised is nengeseǥazan ku,
ne henduen be te ebpatey ad.
4 Sevaha a zuen te menge etew he edserupatey en.
Neiring a te etew he kenè en egketavang.
5 Mibey-anan ad iring duen te nemematey en.
Neiring a zuen te nemematey en he nemeketayhad diyà te leveng;
neiring a zuen te mibpenlipatan nu en he kenè nu en egketevangan.
6 Henduen be te intimbag a kenikew ziyà te vudsi he utew mezalem wey utew merusirem.
7 Utew a kenikew nepeuki.
Is pauk nu iring te menge vaǥel he neketaplì kayi te kediey.
8 Impekeziyù nu kayi te kediey is menge emiǥu ku.
Midhimu nu he utew mezaat is ked-ahaa zan kedì.
Nezureng a ne kenà ad ebpekepelaǥuy.
9 Tenged te menge elentusen ku, ne kenà ad utew ebpekaahà.
Nengazen, andew-andew is kebpengumew-umew ku kenikew duma is kebeyawa ku te menge velad ku.
10 Wazè ka mebaal te menge egkein-inuwan para te menge nemematey en,
ne wazà sikandan med-enew is edalig kenikew.
11 Is gaǥew nu wey kebmetinumanen nu ne kenà egketudtul te nemematey en.
12 Kenà egkaahà is egkengein-inuwan he menge vaal nu wey is ketazeng nu ziyà te merusirem he lugar te nemematey en,
su zutun he lugar kenè en egketenuzan is langun.
13 Piru siak mulà, Nengazen, ne ebuyù a te tavang diyà te kenikew.
Kada meselem ed-ampù a ziyà te kenikew.
14 Piru maan is ed-engkezan a kenikew, Nengazen?
Maan is mid-elesan a kenikew?
15 Puun te vatè e pa, ne nekaantus ad ne hapit ad ebpatey.
Naantus ku is menge mekahandekhandek he mibeelan nu kayi te kediey.
16 Is pauk nu iring te mevendes he keramag he nekeigù kayi te kediey.
Edezeetan a kenikew pinaaǥi te mekahandekhandek he menge vaal nu,
17 he iring te zalem he layun ebpekeliǥuy kayi te kediey;
ne wazè ku en edlewangan.
18 Impekeziyù nu kayi te kediey is menge minahal ku wey is menge emiǥu ku;
ne kerusireman dà is nesamà he zuma ku.