87
Kedeliǥa te Jerusalem
1-2 Midtukud te Megbevayà is inged he Zion;
diyè din benguna te segradu he menge vuvungan.
Lavew is kebmahala zin kayi he inged te kebmahala zin te langun he zuma he menge lugar ziyà te Israel.
3 Meupiya is menge lalag din mehitenged kayi he inged.
4 Ke sikandin te, “Emun idlista ku is menge nasyun he migkilala kedì,
idragkes ku is Ehipto wey is Babilonia,
idragkes ku zaan is Filistia, Tyre, wey Etiopia.
Is menge etew he ebpemuun kayi he menge nasyun ed-isipen ku he hustu en he tig-Zion.”
5 Tutuu he egkekaǥi heini mehitenged te Zion, he mahabet he menge etew is kenà tig-Zion he ed-isipen he hustu en he tig-Zion.
Ne iyan edlig-en kayi he inged is Utew Lavew he Megbevayà.
6 Idlista te Nengazen is menge etew zin,
ne idragkes din is menge etew he ziyà ebpemuun te zuma he menge nasyun he mid-isip din he hustu en he tig-Zion.
7 Edsayew wey egkanta sikandan is langun, ke sikandan te,
“Ebpuun te Zion is langun he menge tuvad kenitew!”