9
Ũndũwã kí ãnị́ ãkõ be
1 Ũndũwã sị ĩꞌdi ꞌbã jó ꞌbo,
usú jó ꞌbã ị́dị́ŋá kí ázị̂rị̃.
2 Lị ĩzá ãzíla usa ĩꞌdi ꞌbã wáyĩnĩ rá;
idé ãkónã ụ̃mụ̃ drị̂ kí méjã drị̃ gá ꞌbo.
3 Pẽ izonzi ĩꞌdidrị́ ãzị́ gá rĩ kí tị, ãzíla umve ꞌbá kí
angájó ãngũ ụrụgá ãndânĩ táwụ̃nị̃ drị̂ kí agá.
4 “ꞌBá pírí ị́jọ́ nị̃lépi uya sĩ ku rĩ ꞌbã amụ́ kí ꞌdộ!”
Ĩꞌdi jọ la ꞌbá nị̃lépi ị́jọ́ uya sĩ ku rĩ ꞌbaní,
5 “Ĩmi amụ́ ãkónã mádrị̂ nalé,
ãzíla ĩmvụ wáyĩnĩ mání usalé ꞌbo ꞌdĩ ꞌi.
6 Ĩmi aꞌbe gẹ̃rị̃ ĩmi ãni ãnị́ ãkõ drị́ ꞌdĩ kí ãzíla ĩmi dó sĩ adru ídri;
ĩmi acị́ gẹ̃rị̃ ị́jọ́ vãŋá drị̂ ꞌa gâ sĩ.”
7 ꞌBá ꞌbá idemará ru rĩ itúlépi rĩ la úꞌdáŋá umve ĩꞌdi ụrụꞌbá gá,
ꞌBá uzálépi ꞌbá ũnzí rĩ drị̃ gá rĩ la adráŋá ndrụ̃.
8 Mí uzá ꞌbá idemará ru rĩ drị̃ gá ku, jõ íni ku ĩꞌdi ími ngụ̃ ũnzí;
mí uzá ꞌbá ũndũwã rú rĩ drị̃ gá ãzíla ĩꞌdi ími lẽ rá.
9 Mí imbá ꞌbá ũndũwã rú rĩ ãzíla ũndũwã ĩꞌdidrị̂ la zo drị̃ gá,
mí imbá ꞌbá ãlá rĩ, ĩꞌdi ị́jọ́ nị̃ rá ãzíla ĩꞌdi trũ mụ drị̃ gá.
10 Úpí ụ̃rị̃jó rĩ ĩꞌdi ũndũwã ꞌbã iꞌdóŋá;
ãzíla nị̃táŋá Ãdróŋá Ãlá rĩ nị̃jó rĩ ĩꞌdi ị́jọ́ vãŋá.
11 Má rụ̂ sĩ ụ́ꞌdụ́ mídrị̂ kí adru ũꞌbí ru,
ãzíla ílí mídrị́ míní adrujó ídri rĩ kí ru ị̃drị̃ drị̃ gá.
12 Ídrĩ adru ũndũwã rú ũndũwã mídrị̂ la ími ũfẽ rá;
ídrĩ adru idemará ru ími vúŋá la drị̃ cị nĩ.
13 Ũkú ũndũwã kóru rĩ la uzá rere;
ĩꞌdi ị̃nzị̃táŋá kóru ãzíla nị̃ ị́jọ́ ku.
14 Ĩꞌdi ri jó ĩꞌdidrị̂ ꞌbã kẹ̃jị́tị gá,
jõku ĩꞌdi ri úmvúke ãngũ ụrụgá ãndânĩ táwụ̃nị̃ drị̂ gá,
15 ꞌbá alịlépi gẹ̃rị̃ gâ sĩ rĩ kí umve jó,
ꞌbá mụlépi ãzị́ ĩꞌbadrị̂ kí ngaŋá gá rĩ kî trũ.
16 “ꞌBá pírí ị́jọ́ nị̃lépi ku rĩ ꞌbã amụ́ kí ꞌdộ!”
Ĩꞌdi jọ la ꞌbá nị̃lépi ị́jọ́ uya sĩ ku rĩ ꞌbaní,
17 “Ị̃yị́ ụ̃gụ̃lé ụ̃gụ̃ rĩ ị̃lị́kị̃lị́ ru,
ãzíla íná nalé ũní-ũní ru rĩ ĩꞌdi ãjị́-ambamba rú!”
18 Wó nị̃ kí ị́jọ́ ãzí ꞌbá drãlépi rá rĩ kí ꞌdã gá ꞌdãá cí rĩ gá ku,
ꞌbá ĩꞌdi ꞌbã umveŋá ãꞌị̃lépi rá rĩ fi kí mgbi ĩnádrị̃ agá ꞌbo.