Waraga na Paulo öcöö both
Jö Pilipi
Köp na tye ï waraga ka Paulo both jö Pilipi
Waraga ka Paulo both jö Pilipi onwongo ëcöö both jö n'oye Kiricito më acël na Paulo öcakö ï lobo më Roma na tye ï Macedonia. Ëcöö ï karë n'akwëna Paulo onwongo tye ï buc ëka ï karë na ën onwongo ayela kï both etic k'Ekiricito nökënë ëka cwinye onwongo ba yom ï kom pwony na ba tye atïr kï both jö n'oye Kiricito na tye ï Pilipi. Ëntö waraga ni onwongo tye më mïö yom cwiny ëka tëk cwiny n'ëtwërö tïtö kï yee ka Paulo na thuth ï Yecu Kiricito.
Tyën köp na pïrë tëk n'ömïö ëcöö waraga onwongo obedo më pwöyö Ekiricito më Pilipi pï mïc na gïn ooro më könyö Paulo ï karë na ën onwongo mïtö köny. Ën otio kï karë ni më nïangögï, ëk obed gïnï kï tëk cwiny kür öpar gïnï pëkö mërë ëka pëkögï thon. Ën odwekogï më bedo kï mwolo ka Yecu, na path kï bedo kï cwiny më nyeko ëka awaka. Ën opo wigï nï kwögï më rïbërë kanya acël kï Kiricito obedo mïc më kïca k'Obanga na gïn onwongo pï yee, pathï pï bedo kï winy ï kom yüb më Cïk k'Eyuda. Ën öcöö pï yom cwiny ëka kuc n'Obanga mïö both jö n'örïbërë kanya acël më kwö kï Kiricito.
Waraga ni ënënö kï köp mërë ï kom yom cwiny, tëk cwiny, nöthërë ëka dïö cwiny ï yee k'Ekiricito ëka kwö, nyutho thon mar na thuth na Paulo onwongo tye ködë ï kom jö n'oye Kiricito na tye ï Pilipi.
1
1 Waraga ni öya kï both Paulo gïn kï Timoteo, n'obedo gïnï etic ka Kiricito Yecu.
Both jö k'Obanga na leng kïbëc na tye ï Kiricito Yecu na bedo gïnï ï Pilipi, kanya acël k'ëtëla ëka ëköny tic ka jö n'oye Kiricito:
2 Obanga Apap onu ëka Rwoth Yecu Kiricito ömïïwu gum ëka kuc.
Lëga ka Paulo pï jö n'oye Kiricito
3 An apwöyö Obangana ï karë kïbëc na an apo pïrwu.
4 Ï lëgana kïbëc, an alëgö pïrwu kïbëc kï yom cwiny
5 pïën cakërë ï nïnö më acël më thuno ködë naka tin, un ïrïbërë köda ï tic më tïtö köp më Emuth na Bër.
6 An angeo na bër nï Obanga n'öcakö tic ni ï kinwu bino mëdërë kï tic mërë naka ka othum ï nïnö na Kiricito Yecu bino dwogo.
7 Opore nïna më parö pïrwu kïbëc kömanön, pïën pïrwu tëk rwök botha; pïën un kïbëc ïrïbërë unu köda kanya acël më nywakö kïca n'Obanga ömïa ï buc kany, ëka dökï ï karë na an atwakö köp na bër më moko köp më Emuth na Bër më cung na tëk.
8 Obanga ënë obedo caden-na na ngeo nï par na thuth na an abedo ködë pïrwu yaa kï mar ka Kiricito Yecu kikome.
9 An alëgö nï marwu myero ömëdërë amëda na thwönë ï ngec ëka kï nïang na thuth,
10 ëk ömïï ïyër unu gin na bër. Cë un ibino bedo na cwinywu leng abonge bal mörö naka ï nïnö na Kiricito bino dwogo,
11 ëka thon bino mïö ticwu kïbëc na bëcö më kite n'atïr nya ï komwu pï Yecu Kiricito—nakun mïö dheo kï pak both Obanga.
Tweo Paulo ömïö köp më Emuth na Bër önya
12 Utmegona, an amïtö inge unu nï gin n'ötïmërë ï koma ökönyö rwök më mïö köp më Emuth na Bër nya.
13 Acikari gïnï më pacö k'adit ëka jö kïbëc na tye kany, ngeo gïnï nï an etwea pïën an abedo alübkör Kiricito.
14 Bedona ï buc öcükö cwiny utmego na pol na tye ï Rwoth më tïtö köp k'Obanga kï tëk cwiny abonge lworo.
15 Adyer jö mökö tïtö köp ï kom Kiricito kï cwiny më nyeko ëka dhaa, ëntö jö nökënë tïtö gïnï kï cwiny na bër.
16 Jö na tïtö kï cwiny na bër tïtö gïnï pï mar, nakun ngeo gïnï nï Obanga oketha kany më cung na tëk pï köp më Emuth na Bër.
17 Jö nökënë ca tïtö gïnï nyïng Kiricito pï larö dito nakun cwinygï nwongo ba bër, thamagï tye më mëdö can nïna ï buc kany.
18 Köp mörö ope, pïën ï yodhi kïbëc, kadï ï köp më twodo onyo ï köp adyer, gïn tye ka tïtö pï Kiricito ëka an abino mëdara më bedo kï yom cwiny.
Eyo, an abino mëdara më bedo kï yom cwiny,
19 pïën an angeo nï pï lëgawu ëka kï köny n'öya kï both Tipo ka Yecu Kiricito, bino mïöna donyo yökö kï ï can.
20 Mitina ëka gen-na rwök tye nï an lewic ba bino maköna ï gin mörö, ëntö an athamö më mïö dheo both Kiricito ï koma kï tëk cwiny na thwönë rwök, ï karë ni na calö karë kïbëc, kadï akwö onyo athöö ökö.
21 Pïën kï kubotha, kwö ënë bedo na kwö pï Kiricito, ëka ka athöö, abino nwongo magoba rwök.
22 Ka an myero akwö ï kom, manön bino mïö an atio tic mökö na könyö ëntö an ba angeo gin na myero ayër.
23 Yërö acël kï kom jami arïö ni ocungo wia ökö: Mitina tye nï kono athöö ökö ëk abed kanya acël kï Kiricito, pïën manön ënë bër na löö kïbëc,
24 ëntö pïrë tëk rwök pïrwu nï abed na kwö.
25 An dong ayee ï köp ni, an angeo nï pod abino bedo ëka an abino mëdara më bedo kodwu pï döngö ëka ibed unu kï yom cwiny ï yeewu.
26 Manön bino mïö wakërëwu pïra ï Kiricito Yecu bedo na thwönë rwök, ka an dökï adwogo bothwu.
27 Gin na pïrë tëk rwök ënë nï kite më kwöwu myero örwatërë kï gin na köp më Emuth na Bër ï kom Kiricito mïtö, ëk kadï an abino më nënöwu, onyo kadï an atye na bor kodwu, ka an awinyo köp ï komwu, myero an ange nï icung unu na tëk ï cwiny acël kï thama acël nakun ïlwënyö unu kanya acël pï yee n'obino pï köp më Emuth na Bër.
28 Kür ïmïï jö na pyem kodwu ömïïwu lworo ï kom gin mörö. Man ënë anyuth na cïmö bothgï nï gïn bino rwenyo ökö na twal, ëntö anyuth ni nyutho bothwu nï ebino laröwu—ëka manön obedo gin na yaa kï both Obanga.
29 Pïën ën ömïöwu gum më tic pï Kiricito, pathï gum më yee ï kome këkën, ëntö më lïmö can pïrë thon.
30 Onu etye ka lïmö can kanya acël. Un ïnënö lïmö can-na ï karë n'opoth ëka un ingeo nï an pod atye ka lïmö can.