12
Elelle gwanni gwuyang ndi Yicu
1 Yäy gu no, nggwa je päcälü lani ngwänggärï gwani ïnä gwudi Ngwaalu ndi ari gätïjär Ngwaalinga ngwanginalu ngwalu aar ru mïꞌrïnï nono gwanni gwumidu gwujuꞌru gwüjädï Ngwaalinganu nunnu ngwuru gwani äpïjï Ngwaalinga yobo yidi lïgïꞌrïm.
2 Aaꞌti ba be ngaa lelelle nono ngwüjü ngwudi dïdlä ndee ngaa be gwalli yigoꞌro yalu ndi gwürlï yaꞌranya yalu. Ngaa burni ndi lenge buping gwudi Ngwaalu nggwo ne gwanni gwujaw, gwüjädänü ngwumbuti.
3 Yïmïꞌrü ye yanni yätädäär nje nyi ru dooꞌra dükäjäär, nggwa ondaci dïjü deꞌte deꞌte ndi ari aaꞌti nga gwa piyi ligoꞌro lunga ndi ari nga olanala, nga be ïrïyï ngwäyälü giligoꞌro lunga gwanni gwïndï kayalu guꞌru ge gidi ämnï Ngwaalu ganni gätädärängä Ngwaalu.
4 Anaku dïjï deꞌte deꞌte dätï ngwangina ngweꞌte pu aar be onyadi yerelanu, na yerel giyee ku yati ꞌti apu yiiru yeꞌte yeꞌte,
5 yiru gu ꞌto ndi Kirictu ndi ari a lonyadu ngwanginu ngweꞌte pu, alanga ku liru yerel yacidu gwüpäng.
6 Langidaci nje rung rung yïmïꞌrü ye yätädäär nje. Manari dïjï dangidacaar ndi alliji yïjïrä ngwuje ape anaku ätïng gu ämnïng Ngwaalu gwüngün.
7 Ma dïjï ru dati äpïjï ngwüjü yiiru, ngwuje ape, ma doorta ru, ngwape yorta yüngün.
8 Mung ru gwanni gwati orꞌtemaji ngwüjü ngwuje orꞌtemaji. Mung ru gwanni gwati gendaji guy gwani liꞌter, ngwugendaji ligor le. Mung ru gwanni gwuru giꞌra ndi okta ngwüjü, ngwuje okta gwundu ngwäy. Mung ru gwanni gwati ngwüjï ïnä, aar ïnä ligor le lijayanu.
Ämnï
9 Ma ämnï ji, ngwube ru ꞌdidanu. Ara je yiꞌral ke ngwäy yanni yiki ngaa mätïnälü giyiꞌral yanni yijaw.
10 Arnganajidar ndi ämnäjïdï yengga. Ngaa ätäjïdï denyajiding gwupana giyigoꞌro yalu.
11 Aaꞌti ngaa la ayi nono nga be ꞌri gïlïgïꞌrïm, ngaa äpïjï Delenya yiiru.
12 Ngaa jayanu ligeꞌtaja Ngwaalu, ngaa määtä yiguri gïdïrbänü, ngaa mätïnälü ndi otaci Ngwaalingalu.
13 Ngaa emadi ngwüjïngä le ngwudi Ngwaalu ngwanni ngwuru ngwuwayi. Jädär ndi äpïjï ngwüjü yïrnü.
14 Onjacar je lanni lati a je übïnälü. Onjacar je aaꞌti la je gu ꞌtäjï ngwünyü.
15 Jayaranu ngindenga le lanni lijayanu, ngaa le runi lanni lirunu.
16 Jaralu lamatanu. Aaꞌti ngaa la piyi yigoꞌro yalu ngaa be okeye yigoꞌro yalu ngaa le ubidanu lanni lijalu gïdïyängälü. Aaꞌti ngaa le engga yigoꞌro yalu libebera.
17 Ma aar je yiꞌral mbuji yanni yiki, aaꞌti ngaa la gwalli dämjä ngaa be undi ngwäy ndi a je ärrï yanni yijaw ngwäyänü ngwüjï ꞌdar.
18 Ma gay ji ma aang burni kuy galu, adataralu ngwüjï ngwe ꞌdar.
19 Lani ngwumaad, aaꞌti ngaa la gwalli yiꞌra ngaa be gäbïcïjï Ngwaalinga gündä ndi ari yüllïnä ndi ari Deleny daru nu, “Yüny ru ndi gwalli yiꞌra, äny gwuru gwadi gwalli dämjä.”
20 Aar be ru manni ndi ari,
“Manari güwän gunga gïtï ngwamanu, ätädï ngweny,
ma ngwäädä eny, ätädï ngwïyï.
Manari yima je ärrï giyee, yani ndi ari gwumacanga lïgä liru yirang kiꞌrala güngün.”
21 Aaꞌti ngaa la gäbïcï yiꞌral yanni yiki ndi aar je dami, ngaa je be dami yiꞌral ye yanni yijaw.