11
Ngwüjï ngwudi Yïjïräyïl ngwïnädï Ngwaalinga
1 Nyi be utalu ndi ari, Ngwaalu ngwuꞌdonya ngwüjü ngwüngün ngwuru Yïjïräyïle? Bärï yaꞌti gu rüdï aꞌtur! Äny nggwee gwuru Dïjïräyïl ꞌto gwuru gilinge gidi Äbräyïm gïïlü gidi Bïnïyämïn.
2 Nggwadi ari Ngwaalu ngwaꞌti ꞌdonya ngwüjü ngwüngün ngwanni ngwülïngïdïng je ngwuje äbrï gwerre. Ngaa laꞌti lïngïdï ngwujaꞌri ngwanni ngwaru ngwe gitab gïdïjïr dani Ïlïyä anni mung päcï Ngwaalingalu yiꞌral ye yiki yanni yärrär je ngwüjï ngwüngün ngwudi Yïjïräyïl ngwari,
3 “Gwani Deleny, lima ꞌrinye ngwïjïrä ngwunga a lima pä dagadalu mbüny dunga, äny nggwo be gwudayinalu gweꞌte pu ꞌdogo gilo be lari liny ꞌrinye!”
4 A be yiru ange yanni yima ye Ngwaalu ci? Gwuming ci, “Gilo lïgïꞌtïnïnjälü liru ngwüüꞌrï kwoꞌra täꞌrïl (7000) laꞌti kwucu ngwaalingalu ngwuru ꞌtur ngwani Baal yirku ye aꞌtur.”
5 Yiru gu ꞌto no gwenene kaji nggee, gilo lanni lïꞌdü guuwalu läbrä je Ngwaalu yïmïꞌrü ye.
6 A be manari yiꞌral giyee yäpïnä yïmïꞌrü ye no, yaꞌti ba be ani ndi ari yäpïnä apepe gwe. Adinari aar ru apepe gwe, yaꞌti a be yaadi ani yïmïꞌrü.
7 Yiru be ange? Ndi ari yanni yilinya je ngwüjï ngwudi Yïjïräyïl gwulleny yaꞌti aar gu olatu, a be lanni läbrä je Ngwaalu yima aar gu olati. A be loko a je Ngwaalu undiyi giyiꞌra,
8 anaku üllïnäär gu ndi ari,
“Lätädï je Ngwaalu ligor liru gidingol,
na ngwäy ngwati ꞌti ombajidalu
na ngwänï ngwati ꞌti ꞌdingina,
ꞌdi gomon gidi gweneng.”
9 A Däwüd gwullu ngwari,
“A ngwümbür ngwegen ngwudi eny ru ngwüꞌrïmün aar je acaji aar ru ngwüꞌdïbä aar gu ïꞌdätï,
aar ru gimle gidi obalu aar gu obalu aar gu rerani
10 a ngwäy ngwegen rïmï nunnu aaꞌti lombajidalu,
a aar ape ngwuuꞌranu ngwegen gwani dïrbä giyomon ꞌdar.”
11 Äny gwoꞌre gwutalu ndi ari, ngindenga lima obalu lima ïꞌdädä gweere? Bärï aꞌtur! Aar be manni ru ndi ari, nyurtanu gwegen gwuma äpïjä ngwüjü ngwuru Garany gilanging nggwee gwiya ngwüjü ngwudi Yïjïräyïl yigoranu aar gïlängïdïnï ꞌto.
12 Ma be ari nyurtanu gwegen gwuma ru bile gwupa gwudi dïdlä na ïꞌdï gwegen gwuma ru bile gwupa gwudi Garany, ya be ru ꞌtanaa yani bile gwegen manari lima mbuti!
13 Äny nggwo ndi a je ondaci liru Garany. Ndi ari anaku ru nyi gu dooꞌra dükäjäär ngwüjï ngwuru Garany, äny gwïrïngïnä gu giyiiru yüny
14 nunnu nyi ye geꞌtaji ndi gwogaji ngwüjü ngwüny a je yigor enyanu nje gïlängïdïyï loko.
15 Ma be ari ꞌdünyïnï gwegen gwuma ru gay gidi oꞌrajidiyi dïdläyü, ma be ari gwuma aar ämnï, ya be ru ꞌtaa? Yati be yani midi gwudi ngwüjï ngwanni ngwayo?
16 Manari ngwülä ngwati äpïnï guꞌru gooko aar ru yula yiru yiꞌra aar je gätïjï Ngwaalingalu aar juꞌri, ya be ru ndi ari ngwülä ku kiꞌdu ngwujuꞌru. A manari ngwuuwa ngwudi daꞌri ngwujuꞌru, yiiꞌrina yidi daꞌri yijuꞌru ꞌto.
17 Yiiꞌrina yoko yidi dïmïnïtï danni dïkwüdïnä yani Ngwüyäwüd, yima agirti aar apa yiꞌrina yidi dïmïnïtï diru durdina aar je gu mïdïnïyï. Nga nga liru lanni liru Garany liru nono yiiꞌrina yidi dïmïnïtï danni diru durdina lanni gilo lïmïdïnä gwenene ngwuuwa ngweꞌte pu ngwudi dïmïnïtï danni dïkwüdïnä.
18 Aaꞌti be nga gwïrïngïnälä giyiiꞌrina giyoo. Ma ang ïrïngïnï, nga je be diwayini giyee ndi ari, nga gwäꞌtüdï gwudegeꞌdaja ngwuuwala gwudi dïmïnïtï danni dïkwüdïnä, a be ngwuuwa ru ngwudegeꞌdajanga.
19 Na manari nga gwaru, “Yiiꞌrina yägïrtïnä mbüny nunnu aar nyi gu mïdïnïyï!”
20 Yätï gu ngwäyänü! A be yägïrtïnä gwani nyurtanu gwegen ndi ämnï Ngwaalu aar gu be mätïnälü gwani ämnï Ngwaalu gwunga. Aaꞌti be nga gwa ru diꞌdonggal aar ang be yedeny eny.
21 Ndi ari manari Ngwaalu ngwaꞌti gäbïcä yiꞌrina yidi dïmïnïtï danni dïkwüdïnä aar jalu, gwaꞌti gwa ang gäbïcï ndi jalu ma ang gatu ämnïng Ngwaalu mbüny.
22 Diwayina be jaying liguri na ojemeng yiꞌral gwudi Ngwaalu. Ndi ari ojeme yiꞌral gwüngün ngwüjï ngwanni ngwuma nyurtanu na jayi yiꞌral gwüngün ꞌdanggalu manari nga lïmätïnälü ndi jayi liguri gwüngün. Ma gu ꞌti mätïnälü, nga ꞌto gwa ägïrïtïnï mbüny.
23 Na nga diwayini ndi ari adinari ngwüjï ngwudi Yïjïräyïl gwuma ꞌti ju ndi dirlele aar nyurtanu ndi ämnï Ngwaalu, ladi je Ngwaalu mïdïnïyï gïdïmïnïtï, ndi ari Ngwaalu ngwätï yiima nding je mïdïnïyï mana.
24 A be ꞌdar giyee, manari lüꞌrïdä a je nga nga liru Garany gïdïmïnïtï diru durdina liru ꞌter ara je mïdïnïyï gïdïmïnïtï danni dïkwüdäär, ya be ru ꞌtanaa Ngwaalu ndi ape ngwüjü ngwudi Yïjïräyïl ngwanni ngwuru yiiꞌrina yidi dïmïnïtï danni dïkwüdïnä ngwuje mïdïnïyï gïdïmïnïtï danni diru nanni gwegen?
Ngwüjï ꞌdar ngwïnädï Ngwaalinga
25 A be lani ngwänggärï, äny gwaꞌti mïnä ndi ari ngaa ꞌti lïngïdï yujimida yeꞌte giyee yanni yändälü yima je Ngwaalu ꞌtäjälü gweneno nunnu aaꞌti ngaa la piyi yigoꞌro yalu, ndi ari ngwüjü ngwoko ngwudi Yïjïräyïl ngwundi giyiꞌra nunnu ꞌdi a yiꞌra yidi ngwüjï ngwuru Garany ändä.
26 A no ngwüjï ngwudi Yïjïräyïl ꞌdar ngwa gïlängïdïnï anaku üllïnäär gu kitabanu ndi ari,
“Gilang gwadi ila ngwaalu ngwani Jäyün,
nginde ying je äbräjälü mbüny yanni yäꞌtüdï drü didi Ngwaalu ngwügüürnä ngwudi Yagub.
27 A gekajidi gwüny gwuru nggwee ngindenga le
manari liminje äbräjï keng gwegen.”
28 A be yanni yani ngwujaꞌri ngwanni ngwujaw, ngindenga liru güwän gidi Ngwaalu gwani jayi gwalu a be giyiꞌral yani äbrï gwegen gwanni gwäbrä je gwe Ngwaalu, ngindenga liru ngwüjï ngwanni ngwämnäär je gwani ngwujaꞌri ngwanni ngwuca je ngwe Ngwaalu ngwügürnä ngwegen.
29 Ndi ari urnidi na angidaji gwudi Ngwaalu ngwaꞌti ätï oꞌrang gwodan aꞌtur.
30 Nono nga nga je, gwele gwerre, ngaa liru ngwüjï ngwünyürtïjä Ngwaalinganu, nga nga liru ngwüjï ngwuru Garany, lima be mbuji ïnäng gwani nyurtanu gwudi ngwüjï ngwudi Yïjïräyïl.
31 No gwenene ꞌto ngindenga lani ngwüjï ngwudi Yïjïräyïl lima be nyurtanu nunnu ngindenga ꞌto aar je ïnä gwani ïnä gwanni gwuma aang mbuji Ngwaalu.
32 Ndi ari Ngwaalu ngwügäbïcä ngwüjü ꞌdar giyirna yani nyurtanu, nunnu ꞌdar aar ïnä ngindeng.
Ortada
33 Yäy ꞌda ombaja ꞌdi olenganu gwudi ïrälü gwani yibegeng na bebere gwudi Ngwaalu!
Obalu gwüngün gwola guyanu
na gay güngün gola ngwaalinganu ndi mbüjïnï!
34 Ndi ari gitab garu nu,
“Yärü gwanni gwülïngïdï yaꞌrany ye yoorta ngwaalinga yidi Deleny?
Na yärü gwuru gwanni gwuma ru dibegeng düngün?”
35 “Yärü gwere aꞌtur gwanni gwätädï Ngwaalinga gony gere
nunnu a Ngwaalu gwäꞌräcï?”
36 Ndi ari nginde gwuru gwugeꞌta yiꞌralalu ꞌdar na yiꞌral ꞌdar giyo ꞌdünggüngün na yani nginde.
A näjï gwüngün ru giyomon pipiꞌriꞌti! Yiru gu.