6
Ele Bǝ Bafokanɔfɔ Lɔ Bǝtsyuǝ Nti.
1 Lǝ etiki edufǝ lǝ ofokanɔnyǝ ku wǝ utsyuǝ eto ntii, yanle bǝ ufi etiki nyamǝ usuko manfokanɔfɔ ɔflɔ nkǝ bedufǝ lǝ nnya ǝsuǝ bǝtǝ wǝ. Bomu mi nti eto ɔni, wǝ ele bǝ udi etiki nyamǝ nɛ.
2 Biyi biǝ Onanto eto betidi ni mba lookponko kawunsiǝ eto betidi lekpo. Nya lǝ biyi biǝ mi ele bǝ bekponko kawunsiǝ eto betidi lekpoo, ele bǝ befo budufǝ lǝ etiki wɛlɛwɛlɛ esuǝ bɛlɔ bitsyǝ.
3 Biyi wǝǝ biǝ bo bafokanɔfɔ bo ni mba lookponko kato eto batɔkpe lekpo. Lǝ nyamfo esoo, yanle bǝ ibǝ bǝ kawunsiǝ mfo eto etiki wɛlɛwɛlɛ, so bo ani ku bɔlɛ kabe.
4 Nyaso lǝ etiki nyamfo eto okle edufǝ mi lentii, ele bǝ bilǝkǝ betidi ba biembu kakpe lǝ kulesa nti kulaa tsya biǝ bedufǝ lǝ nnya ǝsuǝ, enso bǝ bifi etiki nyamǝ bisuko lekple kalebe bamba.
5 Nlɛ mi etiki nyamfo bɔtɛyi bǝ lǝ kofani lǝ kɔlɛ mi. Nya bɔtɛyi bɛnlɛ biǝ obesibe saa ǝmbǝ mi mba lefo bɛnɔ nti wǝ loofo etiki nyamfo bɔlɔ ketsyǝ.
6 Fɛɛ lǝ ofokanɔnyǝ aakpa wǝ ɔyimitsyuǝ usuko betidi bamba ba ni mamfokanɔfɔ ɔflɔ nkǝ lǝ bedi mǝ etiki bǝtǝ mǝǝ, nyamfo alɛkɛɛ?
7 Nsusu bo nkpǝ mi fɛ biefi mi ǝsuǝ kesuko lekpokakpokɔ aate nkǝ mi bofokanɔ mamflɔ kon. Fe nwǝ léfo ɔnɔ, lǝ utidi utsyuǝ áta fǝ ubu nya fǝmuǝ utu falɛ famankpe wǝ kɛnyɛɛ, yenyifo lesa nǝ lɛlɛkɛ ensoo? Nko ini bǝ lǝ utidi utsyuǝ efi fǝ lesatsyuǝ, mankpe utidi ǝmfo kɛnyɛ.
8 Fɛɛ mi kosate bomu ni bǝtsyǝ léta bibu. Nya bieyu mi bayimitsyuǝ bafokanɔfɔ eto bike kulaa tsya.
9-10 Nya biyi sitinti biǝ betidi ba leeyifo asa bua embudufǝ Onanto eto sekakedikɔ. Bianwɛ mi ǝsuǝ lǝ sibuki ǝsuǝ! Itsyise betidi ba leeyifo akuɛnsa, nye mba lǝǝtǝ bǝfiǝ kedi nye leedi sɛsɔnɔ, nye basani ba laalabe ko mǝ basanitsyuǝ, nye mba leeyu, nye mba laasɛsǝ ǝnǝmi lǝ asa ǝsuǝ, nye mba lǝǝnǝ nte bo nkpǝ ale kǝkpǝ, nye baabiasǝ betidi eto aye, nye mba leefi betidi eto atabi lǝ ǝsuǝale kedi, mǝ nti eto kuutsyuǝ saa embudufǝ Onanto eto sekakedikɔ.
11 Asa nyamfo mi bǝtsyuǝ díkeyifo kɔ. Fɛɛ Bonamute Yesu ébuflǝ mi asa bua úwui lǝ mi ǝsuǝ nya úyifo mi kɛnkɛ útǝ Onanto. Nya úsinkli ɔ́lɛkɛsǝ mi ku Onanto eto nti ɛyɛ lǝ Bonamute Yesu Kristo ku Onanto eto Lɛwɔnɔ ǝsuǝ.
Bɛlɛ Mi Ǝsuǝ Ola Kukɔnɔ Nya Lǝ Bifi Dibu Bitǝ Onanto.
12 Mi nti eto utsyuǝ ebɔtɛyi nkǝ, “Nkpǝ kusu meeyifo lesa saa.” Sitinti ini. Fɛɛ inni lesa saa lɛlɛkɛ itǝ fǝ. Moofo bɔtɛyi minkǝ, “Nkpǝ kusu meeyifo lesa saa.” Fɛɛ yanle bǝ ibǝ bǝ lesa saa di mɛ utu.
13 Utidi bamba tsya ebofo bɔtɛyi nkǝ, “Buyifo béyifo didisa itǝ kafo, nya kafo tsya nkpǝ itǝ didisa.” Sitinti ini, fɛɛ Onanto ebutǝ nkǝ nyamfo kenke eto lefe lǝ dibǝ lefe. Nya inni bǝ lǝ bufi bo ǝsuǝ eto sinǝ bukeyifo akɔɛnsa eto asa eso ete. Bomu bǝ lǝ bufi nnya bukeyifo Boanto Onanto eto keyifo. Nya wuutǝ ǝsuǝ eto sinǝ lesa nǝ dińyǝ itǝ se.
14 Fe kase Onanto létakasǝ Bonamute Yesu utsyiko ɔkɔmǝ, nko ke wootakasǝ bo tsya uńyǝnsǝ lǝ wǝ ǝsuǝale nɛ.
15 Biyi biǝ mi ǝsuǝ eto sinǝ eyifo Kristo eto ǝsuǝ eto sinǝ sitsyuǝ. Nya yanlɛkɛ bǝ efi Kristo eto ǝsuǝ eto sinǝ sitsyuǝ akɔ ku utidi wǝ difi sɛsɔnɔdi uyifo wǝ keyifo.
16 Biyi tsya biǝ lǝ utidi éfi wǝ ǝsuǝ ɔkɔ ku nwǝ nsi nkpǝ lǝ sɛsɔnɔdidi ǝsuǝ, uyifo ɔni ku wǝ lǝ ǝsuǝ eto sinǝ ǝsuǝ. Awɔnisa Kɛnkɛ Eto Kukuǝ átɛyi ékpa wuee nkǝ, “Mǝ inuǝ bamǝ ebuyifo bani lǝ sinǝ ǝsuǝ.”
17 Fɛɛ utidi wǝ dífi wǝ ǝsuǝ omanklasǝ lǝ Bonamute ǝsuǝǝ, uyifo ɔni ku wǝ lǝ lɛwɔnɔ ǝsuǝ.
18 Biensiyifo abua ɛyɛ lǝ sɛsɔnɔdidi ǝsuǝ. Lebua bamba saa eto okle nǝ utidi díyifo, diammankla lǝ wǝ ǝsuǝ eto sinǝ ǝsuǝ. Fɛɛ utidi saa wǝ leedi sɛsɔnɔɔ, weeyifo lebua keńyǝ lǝ wǝ kosate eto ǝsuǝ eto sinǝ ǝsuǝ.
19 Biyi wuee biǝ, mi ǝsuǝ eto sinǝ eyifo Lɛwɔnɔ Kɛnkɛ nkpe lǝ mi eto kǝsiǝkɔ nya ini Onanto dífi wǝ útǝ mi. Inni mi mbǝ mi ǝsuǝ.
20 Itsyise Onanto áfo kayo kpǝ lǝ mi disi. Nyaso bifi mi ǝsuǝ eto sinǝ bikeyifo asa nnya laakpe Onanto dibu.