5
Bilǝkǝ Sɛsɔnɔdidi Lǝ Mi Mba Léfo Bɛnɔ Eto Nti.
1 Nya mɔmɔɔ, betidi lɛ bɔtɛyi kpǝ bǝnkǝ, sɛsɔnɔdidi kpe lǝ mi nti. Nya mamfokanɔfɔ kulaa tsya anla nnya okle buyifo. Bátɛyi mɛ bǝnkǝ osani utsyuǝ ku wǝ anto eto usiǝ ákɔ okla.
2 Nya beso biate ǝsuǝ nko? Keku bomu ele bǝ bikewi. Nya utidi wǝ díyifo nyamfo eto okle, ele bǝ bilǝkǝ wǝ lǝ mimba léfo bɛnɔ nti.
3 Ite bǝ ntsyo lǝ mi ɔflɔ nya boǝnyǝ bǝtsyuǝ ǝnǝmi ku ǝnǝmi tsyaa, nkpe lǝ mi nti lǝ lɛwɔnɔ ǝsuǝ. Nya se minkpe lǝ mi nti esoo, nlo utidi wǝ díyifo lebua nǝmfo eto okle dikpi
4 lǝ Bonamute Yesu Kristo eto ǝsuǝale ǝsuǝ. Lǝ betsya bisii, ele bǝ bete biǝ mintsya kpe mi lenti lǝ lɛwɔnɔ ǝsuǝ. Nya Bonamute Yesu Kristo eto ǝsuǝale ebɔkɛ bo lenti.
5 Ele bǝ beyani utidi ǝmfo bitǝ Obonsam lǝ ɔtsylɔsǝ wǝ ǝsuǝ eto sinǝ. Nya lǝ ukpǝ kula tsyaa, wǝ lɛwɔnɔ lǝ dinyǝ bofo lǝ diyi nǝ ǝsuǝ Yesu lookponko kawunsiǝ kenke eto betidi lekpo lǝ Ditiki Sɛɛ nǝmǝ ǝsuǝ.
6 Yanle bǝ bikabesǝ ǝsuǝ kato. Binyi biǝ ǝyǝnkisǝsa sɛkɛ ete laatsyakasǝ ku nnamfo bo banwɔ nnya lǝǝtǝ boataka kabe kato?
7 Bilǝkǝ ǝyǝnkisǝsa saa, nnya ni lebua, bitsyiko lǝ mii nti. Nya biyifo nnamfo fɔfɔ bo bánwɔ, bo ǝsuǝ ǝyǝnkisǝsa saa lǝmbǝ, fe kase minyi miǝ bite seka sitinti. Itsyise bo Ukpǝ Asa Bo Ɔ́yila eto Diyi eboyo. Nya mɔmɔɔ, boolo bo Ukpǝ Asa Bo Ɔ́yila eto Lesambi nǝ ni Kristo.
8 Nyaso, biǝntǝ lǝ budi bo Ukpǝ Asa Bo Ɔ́yila eto Diyi ku abolo nnya ǝsuǝ ǝyǝnkisǝsa koko nkpe, nnya nsusu bua ku asa bua boeyifo. Bomu bitǝ lǝ budi diyi nǝmfo ku abolo wǝ ǝsuǝ ǝyǝnkisǝsa saa lǝmbǝ nya lǝ bote boǝ boenyifo ǝnǝmi ǝnǝmi eto betidi. Bomu lǝ bɔyɛ ku Ditiki Sɛɛ nǝmǝ lǝ ɔnukualɛ ǝsuǝ.
9 Nya lǝ kukue ko míwɔni mintǝ mi kafoo, ńtɛyi mi minkǝ bianyɛ ku betidi ba ni basɔnɔdi.
10 Mɔmɔɔ, inni betidi ba dimamfo banɔ ete minlɛ. Betidi ba minlɛ ni basɔnɔdi nya baasɛsǝ ǝnǝmi lǝ asa ǝsuǝ, mba ni beyu, leeyu betidi eto atabi kedi, ku mba lǝǝtǝ bǝfiǝ kedi tsya. Nya lǝ atɛyi fǝ ǝǝlǝkǝ ǝsuǝ lǝ mǝ ǝsuǝ kenke, ete bǝ ele bǝ lǝkǝ ǝsuǝ etsyiko lǝ kawunsiǝ kamfo kenke ǝsuǝ!
11 Bomu lesa nǝ minlɛ bɔtɛyi ni bǝ nwǝ laakpo wǝ ǝsuǝ nkǝ ɔyimi wǝ díkafo ɔnɔ fɛ weedi sɛsɔnɔ nye onkpǝ kenǝmisɛ nye lǝǝtǝ bǝfiǝ kedi nye laakpo betidi aye bua nye leekpǝ ntǝ nye leeyu, lǝkǝ fǝ ǝsuǝ lǝ wǝ. Nyanle bǝ fǝ ku wǝ kɔ ani lǝ ɔkpɛ ɔni bidi lesa kulaa tsya.
12-13 Iyifo lesa nǝ lekpa bǝ, inni mɔ keyifo keni bǝ nkpo betidi ba lenni bafokanɔfɔ eto itiki eto lekpo. Bomu Onanto ni nwǝ lookpo mǝ etiki eto lekpo. Fɛɛ ele bǝ bokponko bafokanɔfɔ mǝ nti eto lekpo fe kase Awɔnisa Kɛnkɛ eto Kukue nlɛ bɔtɛyi nkǝ, “Bela utidi bua bilǝkǝ lǝ mi katsyakɔ nti.”