14
Ou sasehek nadu tinem ari ja
1 Aha kaseken are lau budon tan handru babadok bwe, kewek hawe aha. Ma aha sandres budon tan.
2 Ndramak ari badeh, budon tan abadok, ma eme winiyan mesekei iy aimon nyamon mari. Arile, ndramak ari ja badeh, budon tan babadok bwe ma eme, mesekei iy aimon le nyamon badu bilin.
3 Ya eme iy ndramak ta kaniya nyamon mari, madan sandra-i sala ta ndramak nane aimon nyamon badu bilin le, ndri-iy; ma iy aimon nyamon badu bilin le ale satiye sahou nyarahan sala ta ndramak ta kaniya nyamon mari, ndri-iy. Tasah, Kindrei badeh, baseken iy ari le bwe, iy aseken uru ma la-uh.
4 Ou are ndramak handru ya ou anya asehek ki ta lohowan ta ndramak ari ja? I buku none iy lohowan doh abadok ta ales, o bwe, iy taku ta lahou tan, idoh lahou ta Laban tan le barasehek hawe baraleben iy. Arile, iy kameh abadok ta ales, tasah Laban kameh aseben iy.
5 Ya jo kasehek sahou ari ja doh: Lau rayah abudon hawe aleben anya, “Len rayah badeh, ndrabun ta len rayah;” ya iri rayah abudon anya, “Bwe, len mari i le randra le, ari bala randrah bwe, ya ari bala randrah bwe.” Arile, bwe, uru ma lubuk badeh, budon turu sala la-uh ta nyala kandriyen ta atehei ndrabun ta len rayah.
6 Are lau oro abudon ma aleben anya, “Len rayah badeh, ndrabun ta len rayah” badeh, oro amekes ta atudun Laban; ya are oro ta kaniya nyamon mari badeh, oro amekes ta atudun Laban ale, tasah iy edeu wurah i ta Kindrei ta nyamon nane doh. Ma hawe are lau oro beleben ta baimon nyamon rayah bwe badeh, amekes ta atudun Laban hawe adeu wurah i ta Kindrei i le buku oro ale.
7 Tasah, taha ari ari manyah are kada-ah na budon tataha le bwe, ma taha bamak laleyah na seken tataha bwe le.
8 Ya eme, i buku none iy anya taha amak, taha amak na seken ta Laban le; ya i buku none iy anya taha ado, taha ado na seken tan le. Ya eme, buku none taha ado deh, taha amak, taha mari badeh, badu hawe Laban le.
9 Ya eme ta katin le doh, Krais mene imek, ano iy amak ja, ta iy kasahan Laban ma katondrok lau ndramak ndrasu-u hawe lau bamak bwe.
10 Eme ya aha anya katiye sahou nyarahan ki ta nadu tine aha rayah ja, anya ki sah? Ma mada aha anya kandra-i ta nadu tine aha rayah ja ki sah? Tasah, taha ndramak ndrasu-u, deh, taha bamak bwe, taha mari kameh ales are mada Kindrei ta sahou.
11 I buku none sahou mene ndratorowenei:
“Laban tiye anya, ‘Jo ma mulin kahis le;
Idah kameh, lau mari aluh a andri ma atehei bwili ndru-u iri i andri are madak,
Ma iri mari kameh tiye eme lewen anya, ehe, jo Kindrei handru.’ ” Aisaya 45:23
12 Ya eme ta sendrehendreh ta aliy i buku doh: Idah kameh, taha ari ari kameh asehek sasah taha
amekes ndra-in o mwasin i ta Kindrei.
Taha samekes ari lakou ta amekes nadu tine taha ari ja ato-ak ta aliy
13 Eme ya, ou sasehek ndramak ari ari anya iy badeh, ba-en hamon ta batanau malen bwe, ndri-iy. Arile ou amekes budon tam ki buku doh: Jo badeh, samekes ari lakou ta amekes nadu tine ari ja ato-ak ta aliy, ma jo samekes ari sahou ta sokoso-ou budon tan, ndri-iy.
14 Eme ya, jo katiye kamwenen; jo dah badu hawe Laban Jises. Ya jo ndratanan handru en, ta nyamon mari kede-eh ndra mwasin le, ya ari ndra-in aliy bwe. Arile, i buku none ari ndramak anya iy beleben badeh, mwasin, lakou ta budon tan ai, ma mesekei iy baimon nyamon bwe.
15 Arile, i buku none ou aimon nyamon nane nadu tinem ari ja beleben, ya mesekei budon tan andra-i badeh, ou bamekes mwasin bala tan bwai, ma kandriyen tam leheya ta ou baseken iy handru bwe. Eme ma, nyamon ou aimon badeh, samesekei budon ta nadu tinem sandra-i. Tasah, ndramak doh, Krais mene imek ta aseben iy!
16 Ya, buku ou abudon anya, “Lakou doh mwasin, jo winiyan ta amekes ai,” arile ou abudon amwenen op! Kora-on lakou ou amekes doh kasahan ndra-in udu bolo budon ta ndramak ari ja.
17 Tasah, tondrok ta Kindrei badeh, bala buku none kandriyen ta aimon nyamon ma a-un gwa mari, ma hawe bala buku none kandriyen ta beleben, bwe. Arile, lakou laba tinan ta tondrok ta Kindrei badeh, ndra kandriyen mwasin le, ma kandriyen ta mondrei le, ma hawe kandriyen ta sekesek le i san ta Malawin Ndrabun.
18 Ma eme, buku are lau amekes lahou mwasin ta Krais i buku doh kameh Kindrei sekesek tan handru. Ma hawe iri lau kameh asehek anya, “Iy ndramak kede-eh badeh, manyah mwasin handru en.”
19 Ya eme ta sendrehendreh ta lakou ndrasehek ndra-au i buku doh: Taha kabadok ta amekes budon ta asan mondrei kudu ndrokowa iri lau ari ari, ma taha kamekes sasah le winiyan sebenei iri abadok ta budon mwasin.
20 Aha sasemete-ei lahou ta Kindrei na andres ta nyamon, ndri-iy. Handru, nyamon mari badeh, ndra mwasin le ta aimon. Arile, ndra-in badeh, i buku ou aimon nyamon ari, ma kandriyen tam doh amekes ndramak ari ja ato-ak ma taku.
21 Mwasin handru ta aha sa-un waen hawe aimon oda lakou ma hawe sasah, sasah ja, kora-on kabini nadu tinem ari ja kataku.
22 Ya eme, sasah ou atehei budon tam abadok i ta aliy anya mwasin badeh, lakou ta ndrokowa ah Kindrei le. Eme ya, buku ndramak amekes ari lakou, ma ndrinen ma budon tan basehek anya lakou doh, ndra-in, bwe, iy kasekesek.
23 Arile, are ndramak androndro ta aimon nyamon badeh, iy bala tanan Kindrei sekesek ta aliy deh, bwe. Ya, buku iy ili le aimon nyamon doh, budon tan badeh, tiye iy ndramesekei kandriyen ndra-in. Tasah, budon tan handru badeh, bahas ta nyamon nane iy aimon bwe. Ya eme i buku doh: Sasah, sasah ou amekes ya batehei budon tam handru ba-en ta aliy bwe, badeh, ou ndrandra-i kabwe.